Naik ambeti mak, anaet ai' abaut
2
Aok abjaan ala ki! On meel em es hi mibe'i mak hi mpalsai Yesus Kristus, hit Usi' le' mapina'-maklaha' naan, kalu hi mpili humaf? Naik on naan! 2 Kal-kalu anmu'i tuaf nuug antaman noi hi ume onen. Tuaf es anpake tais nalim-liim, ma ankaleli kaleli mnatu' nahenu in aklulun. Tuaf es anteni anpake liip ma'ug. 3 Lalit hi mtaisibu ma amsenu moi apake tais aklima', he mfee ne 'toko alekot anbi maat. Mes apake liip ma'ug naan, hi mlelug ee mmak, “Amhake mbi kotin nae! Kaah fa te, amtoko moi naijaan!” 4 Nok le' lalan hi mpili humaf naan, hi on le' afeek lasij le' ka natai fa. Salit amle'ut ee, in es le' nastiir ki.5 Aok-abjaan manekat ala ki! Uisnenog anpili naan atoni abaut anbi pah-pinan iij, he sin anpalsain matani' noi Ne, on le' anbin sin nekak een anmu'i amaus. Ma In anpili sin amsa', he sin napenin paaf et Uisnenog In sonaf neno tunan, le' In npaa' he nfeel ee noi tuaf-tuaf le' anneek Ee. 6 Mes nok lalan hi mpili humaf on le' naan, hi mmo'e he mipalan atoni abaut sin. Fun kaah, sin ka nmo'en fa maufinu saa'-saa' noi ki. Hi mniken, ee oo? Atoni amu'it sin es le' nasusab niis ki. Ma sin es le' bijaas namin lasi huma'-huma', ma nheel anfonat ki moi ume feek lasij. Sin es le' anpaal in aminat, ma hi mpaal in amenut. 7 Hi le' naan Usif Yesus In nonot sin. Mes atoni amu'it sin, sin es le' naguab nale'uf Usif Yesus In kanan alekot. On meel em 'es hi maen mituin sin?
8 In alekon ee, hi mmo'e mituin Uisnenog In atolan es, le' matani' annesi nak, “Ho lo he mneek ho aom-abjaan sin, namnees on le' ho mneek ho aom.” Atolan naan malula et Uisnenog In Sula Knino'.a 9 Mes kalu hi mpili humaf, ma mhaliin ahaa atoni amu'it een sin neek een, naan amtanhai milali Uisnenog In atolan. Tatuin Uisnenog In atolan hukum ate, hi msaan milaal je. 10 Tuaf le' anmo'e natuin Uisnenog In atolan hukum sin ok-oke', mes kalu in antanhai mese aah, naan huma' mese on le' in antanhai nani sin ok-oke'. 11 Uisnenog anfee nalali plenat nak, “Naik ammabenu kalu ka feel-monel fa.” In anfee plenat abjaan amsa' nak, “Naik mimate atoni'.” Es on naan kalu hi ka mmabenu fa, mes hi mimate atoni', naan hi mtanhai milali Uisnenog In atolan hukum.b
12 Es on naan kalu hi mlomi he miguab, ai' he mmo'e lasij es, hi lo he mimnau mak: Uisnenog of es nafeek kalu hit atmo'e tatuin In atolan he tmaneek es nok es, ai' kaha. Natuin atolan naan nabe'i nafetin kit na'ko In hukum. 13 Natuin Uisnenog ka nkasian fa tuaf le' ka nmu'i fa lasi kasian noi tuaf abjaan sin. Mes kalu hi mmu'i lasi kasian moi tuaf abjaan, Uisnenog of anmu'i lasi kasian noi ki msa'. Hi naik mimtau mak hi of mipeni Uisnenog In hukum, natuin In anso'i nalali hi lasi kasian sin.
Kalu hit atpalsai namneo-namneo toi Uisnenog, hit lo he atmo'e tatuin In A'an ma Plenat
14 Aok-abjaan ala ki! Kalu anmu'i tuaf nak in anpalsai Uisnenog, mes ka nmo'e fa saa'-saa' he naklila' in lasi palsait naan, naan ka ma'upa' fa. Lasi palsait on le' naan, ka nekij fa noi lasi 'honis. 15 Kalu anmu'i atonij ai' bifeel le' anpaluu namneo-namneo, es le' ka nmu'i fa bale pakel, ai' ka nmu'i fa mnahat. 16 Kalu hi aal mak, “Amnao mulek-leko'! Maut he Uisnenog es anfee ko tetus-athoen. Naik anin ee antaman ko! Naik mumnaah ammaat!” Aguab een naan ka ma'upa' een fa, kalu hi ka miklila' fa lasi babat moi sin.
17 Es on naan ka namno'un fa, kalu ho mak, ho mpalsaij aah! Kalu ho mpalsaij aah, mes ka mmo'e mutuin fa ho lasi palsait naan, in ka ntaam fa ‘lasi palsait’ antein. Kalu on nane, in on le' lasi palsait le' anmate nalali, ma ka ma'upa' fa saa'-saa'.
18 Anmu'i tuaf abjaan nabe'i naguab am nak, “Tuaf es nabe'i npalsaij aah noi Uisnenog, mes ka nmo'e fa lasi alekot. Tuaf es antein nabe'i anmo'e lasi alekot, mes ka neki fa Uisnenog In kanan.” Mes in lasin on ii: bukti na'ko ho lasi palsait naa, es le' ho mmo'e lasi alekot. Mes kalu ho ka mmo'e fa lasi alekot, au ka ube'i fa he 'iit bukti na'ko ho lasi palsait naan. Au ube'i uklila' au lasi palsait natuin lalan au 'mo'e lasi alekot. 19-20 Ho mutuin anoni' le' nak, “Uisnenog naan, In mese kuun. Ka nmu'i nteni fa abjaan.” Lekog amsa'! Mes nitu le'uf een sin leko nnesin na'ko ko, natuin sin anpalsain on le' nane msa', tal antee sin namtau nmaten. Es on naan naik mitenab mak, mihine meki hi lolem een te, namnou'. Kahaf!
Naan, 'olel! Kalu lasi palsait ka manesa' ma ma'afa' fa, lasi palsait naan ka ma'upa' fa msa'.
21 In leta' na'ko baba nai Abraham. Nenog naan, in anmo'e natuin saa' le' Uisnenog naplenat, ma neki in anah nai Isak he natulu' ee noi Uisnenog anbi me'i fuat. Es on nane, Uisnenog nak, “nai Abraham anmo'e namneo goeh!”c 22 Nai Abraham anpalsai namneo, tal antee in anmo'e natuin Uisnenog In aplenat naan. Es on naan nok lalan naan hit tahine mtak, in anpalsai nok neek bubu' noi Uisnenog, natuin in anmo'e natuin In aplenat. 23 Es on naan lasin le' iij on le' malula et Sula Knino' le' nak, “nai Abraham anpalsai Uisnenog, lalit Uisnenog ansimog ee anjali atoni neek amneot.” Ma malula amsa' am nak, “nai Abraham naan, Uisnenog In soba' neek alekot.”d
24 Lasij ii nakliil' on een, ai' kahaf? Hit tahine mtak, Uisnenog ansimo mansian kalu in lasi palsait noi Uisnenog naan, es le' anmo'el ma nlomi he nmo'e lasi alekot. Palsaij ahaa te, ka namno'u fa.
25 Aleta' abjaan es le' bi Rahap, bifee fetog tabug unu'. Tabug atoni Yerikos sin nami he nlolo namate atoni Israel sin amata' een, bi Rahap nakolo' sin. Lalit in anlelu sin he naenan npoin anpe'o lalan abjaan, he atoni sin naik anheke sin. Es on naan Uisnenog ansimo bi Rahap anjali bifee neek amneot, natuin in nmo'e lasi alekot naan.e
26 Lasi palsait le' ka manesa' fa, nahuum on le' aof le' ka masnasaf fa, es le' anmate. On nane msa', kalu anmu'i tuaf nak in anpalsai Uisnenog, mes ka nmo'e fa lasi alekot, in namoe! Naan, lasi palsait le' ka nmoni fa lee.