Au 'luul sulat le' ii, ma 'sonu neti noi ki atoni Yahudis le' hi mituin milali Usif Yesus, le' hi mitgua et ale' pah-pah.^{a b}

2 Aok-abjaan ala ki! Au he utoon ki on ii: kalu hi mi'eku mok susal huma'-huma' ate, naik amneek aklati. Amsimo susal naan nok neek malinat, natuin namuni te, of naleek. 3 Fun hit tahine tak, kalu hi malan ambi susal on nane, ma nafetin ki na'ko fulit pah-pinan, ma hi mpalsai piut fe' moi Uisnenog, naan anmo'e hi neekm een naan antaininen, kalu hi mipeni lasi fulit pah-pinan abjaan. 4 Hi naik amtet-koot jom ma'ko susal. Maut he hi mibe'i minoni' he malan ambi susal, tal antee hi minokab ma mitiis jom. Nok lalan naan, hi mjali tuaf le' mimnasi mbi 'taos ma mo'et, ma ka mkulan fa saa' es amsa'.

5 Kalu na'ko hi ala ki, le' amnaben hi tuam een ka mihine fa laal poit na'ko susal, hi mibe'i mtoti moi Uisnenog, le' nahine ale' saa'-saa'. In es le' nabe'i naklila' laal poit noi ki. In es le' nasoitan lalan nok neek malinat, ma In ka nato'an ki fa, kalu hi mtotij Ee. 6 Mes kalu amtotij Ee, lo he neekm aan naik na'oni'. Hi lo he mpalsai namneo-namneo mak, In nabe'i nfee saa'-saa' le' hi mtotij naan. Fun kalu hi mtoti nok neek a'oni', hi mjali on le' okin le' anpee' ma nsikasaan ok piut-piut natuin ani naek. 7-8 Tuaf-tuaf le' nekan ka nakii', labah ate in nekan ka naheel fa nbi ale' kanan lasij. In naik nafneek nak, in of napeni saa'-saa' na'ko Uisnenog.

9 Atoni amamu'it sin le' anpalsain nalalin noin Usif Yesus, sin lo he nhaliin sin neek een, natuin Uisnenog naiti sin anjalin In nonot sin.

10-11 Ma atoni amu'it sin le' anpalsain nalalin noin Usif Yesus, sin lo he namlilan amsa', natuin Uisnenog nanoni' sin he naik nanaeb ok. Tabug ii, sin nahinen namneo mnak, sin amu'ik een of namnekun, on le' sufaf le' lekon ee kah, mes ka loog fa te, manas ansae ma anhoi nisan, lalit an'uknene'. On nane msa', atoni amu'it sin. Maski sin ntaisibun nok sin ulusan sin, mes sin namnekun nfinin amsa'.^c

12 Uisnenog anfee tetus-athoen noi tuaf-tuaf le' nalan anbi lasi fulit pah-pinan tal antee anpoi nkoon. Lalit in ansimo in upa 'honis le' Uisnenog anpaa' nalali he anfeel ee noi tuaf-tuaf le' anneek Ee. In ansimo in upan on le' atopu aklaa mnatu'.^d

13 Mimnau milek-leko'! Kalu anmu'i tuaf na'ko hi ala ki le' napeni lasi fulit pah-pinan, ma nlomi he anmo'e sanat, naik misuub am mak, “Naan, Uisnenog es le' ansobal kau!” Fun Uisnenog ka nlomi nani fa he anmo'en nsaan. Ma In ka nsobal niit fa es amsa', he tuaf naan anlomi he anmo'e nsaan. 14 Fun sanat anpoi na'ko atoni' in nekan ee kuun. Nahunut, in nekan naan anlomi he nmo'e amle'ut, lalit in anmulai natenab nuu-mneem he nmo'e lasi amle'ut. 15 Es on naan in anmo'e natuin tenab amle'ut naan. Namuni te, Uisnenog anhukum namate tuaf-tuaf le' anmo'en amle'ut.

16 Aok-abjaan manekat ala ki! Naik tuaf es namoe ki npake lasin le' ii.

17 Lasi maufinun ka na'uun fa na'ko Uisnenog. Mes In anfee kit tetus-athoen alekot, ma ale' saa'-saa' le' knino' amsa'. In es le' anmo'e manas, funan ma maklafu' een. Sin ala sin an'onis ok et nenog atnanan, ma nmo'e sin mafok een nabaino' een piut-piut. Aal Uisnenog kuun es le' ka nabaino' niit fa. 18 Uisnenog naloitan nalali noi kit on ii: In anfee In A'an ma Plenat amneot noi kit. Ma In anpake In A'an ma Plenat naan, he namonib kit. Na'ko ale' kanan saa'-saa' le' In anmo'e sin anbin pah-pinan ii, In anpili nalali kit he atjali In hau fgua unun.

19 Aok-abjaan manekat ala ki! Mimnau! Lasi-noni' alekot, on ii: naik miguab luum-luum aah. Leko nneis, kalu nmu'i tuaf abjaan naguab alekot, hi mneen milek-leko'. Ma naik mitoo' labah. 20 Natuin kalu mitoo', atoni' ka nuug he nmo'e fa lasi alekot natuin Uisnenog In alomin.

21 Es on naan hi lo he misnasab hi tuam een ma'ko mo'et sanat, nahuum on le' atoni tani antoof in lelel, lalit notu mapasu' een naan. Ma hi lo he msimo Uisnenog In A'an ma Plenat nok neek palan amsa'. A'an ma Plenat naan, on le' finij le' natolob ma ansenan sin et hi neekm een. Kalu hi mmo'e on nane, Uisnenog of ansoi nafetin nani ki na'ko hi sanat sin ok-oke', ma In ansimo ki, lalit hi mmoni mok Ne nabal-baal.

22 Ma kalu hi mihine milali Uisnenog In A'an ma Plenat sin ate, hi lo he mmo'e mituin sin. Naik amneen aah! Kalu hi mneen ahaa, ma ka mmo'e mituin fa, hi mimoe hi tuam een kiim. 23-24 Kalu atoni' anneen nalali A'an ma Plenat naan, ma ka nmo'e natuin sin fa, in on le' tuaf le' nail in human et nino'. Mes tabug ankiso nalali ma nasaitan nino' nane, in anniken nani in human. 25 Mes hi naik amniken he mpalekas milek-leko' Uisnenog In A'an ma Plenat le' namtiis, le' nabe'i ansoi nafetin naan atoni' na'ko in sanat sin ok-oke'. Uisnenog of anfee tetus-athoen noi ki anbi ale' kanan saa'-saa' le' hi mmo'e sin, lamun hi mneen ma mituin In A'an ma Plenat. Naik aal antaam anbi hi lukem aliij, lalit anpoi nkono anboni hi lukem ane'ug.

26 Kalu tuaf anpaas on nak in atoni amakoet anbi lasi Uisnenog, mes ka nkaal nahiin fa in fefan, tuaf naan in namoe in tuan ee kuun. In lasi palsait naan, palsuum sona' aah. 27 Natuin lasi palsait le' knino, ka nhainiis kuun fa. Naan es le' anhaliin Ama' Uisnenog In nekan. Lasi palsait le' namneo on naan, in anmo'e tuaf anlomi he nbaban bifee banu sin, aan manat ma aan lalep sin. Tuaf le' nakii' anbi lasi palsait on le' naan, ka nlomi natuin fa fulit na'ko lasi amle'ut, ma anpanat in kanan foo menin.