3 Natuin unu' fe', tabug hit ka tahine fa Usif Yesus, hit ka tahine fa saa'-saa', ma namoe kit ate, labah. Hit ka tlomi fa he atneen tuaf abjaan. Hit tmoni tbi haa le' he tatuin hit neek maufinu, ma takleob hit tuak nok lasi sinimakat huma'-huma'. Hit atputa'-kliun maufinu toi tuaf abjaan. Hit amonik nahenu nok maktino'. Hit tlomi he tabelak neek to'as toi tuaf abjaan, tal antee atmaufinu toi sin. Lalit sin on nane msa' noi kit.

4 Maski hit amonik namle'u on nane msa', mes Uisnenog es nekin On ansoi nafetin kit, In naklila' nalali In manekan ma In neek alekot noi kit. 5 In ansoi nafetin kit, ka natuin fa hit lasi mnamit anbi mo'et alekot, mes natuin In anneek kit. In anboe naknino' hit sanat sin, anpake In Asmana Knino', he nafe'ug hit amonik, nahuum on le' nahonis nafani' kit. 6 Natuin Yesus Kristus anmate nalali he nsoi nafetin kit na'ko hit sanat sin, es on naan Uisnenog nathoeb In Asmana Knino' noi kit. 7 Natuin Nai Yesus In nekan ee naleek, es on naan In naleko' hit lasi mafutus tok Ama' Uisnenog, nahuum on le' hit atjali In anah sin. Ma hit tahine tak, hit of atmoni piut-piut tokan. Monit naan, anjali hit pusaak. 8 Saa' le' au uguab sin le' ii, namneo on le' naan!

Saa' le' au unoni' sin le' ii, maso'it ma ma'upa' noi ale' mansian sin ok-oke'. Es on naan ho lo he mtultaku' ma mha'tani tuaf-tuaf he nmo'e natuin lasi-noni' amneot. Ale' apalsait een noi Uisnenog lo he namin lalan piut-piut he anmo'en lasi alekot. 9 Naik amtaisibug om moi lasi moel sin luum-luum, on le' hi amteef-lae moi lasin le' ka ma'uu' fa, mmatoe alafgua-lafug es nok es, ammatita'-loin noi uuf ma ka'uf mee es nanae nneis, ma ammabaan nok lasi atolan halat atoni Yahudis sin. He saa'? Lasin naan ka tiit tani fa es he maso'it! Ampolin mineku tabug luum-luum aah. 10 Amnao he mfaineek tuaf le' nlomi he nale'un too slani' tal anpe'an ma nbatis ok. Kalu sin anmo'en fe' on nane, mukain sin nok matani'. Kalu sin anmo'en piut fe', naik amlae mituin sin. 11 Tuaf-tuaf on le' naan, sin teenb een ka namneo fa lee. Sin amo'ek een kuuk es le' naklila' sin sanat noi too mfaun sin.

12 Au uloitan he 'leek nai Artemas ai' nai Tekikus, he neem nateef nok ko nbi pulau Kreta. Kalu in neem anteel ee, ho mami lalan he uum labah, he mu'eku mok kau anbi koot Nekapolis. Natuin tabug mainikin, au 'lomi he utgua 'bi naan.^a 13 Ho muhine atoni ahine atolan hukum, le' in kanan nai Senas, nok in amnono nai Apolos, ai'? Sin he nnaon noi balel aloog. Es on naan ambaban maan sin he sin naik anmu'in kulan-labu' anbi lalan.^b 14 Natuin tuaf-tuaf le' natuin Usif Yesus naik antoko ma naloip-haen luum-luum aah. Sin lo he nanoni een he anmo'en lasi alekot, ma nbaban tuaf-tuaf le' ankulan-labu' le'-le'uf. Nok lalan naan, sin amonik een maso'it.

15 Titus. Hai ala kai msonu' tabe alekot noi ko. Tabe amsa' noi hit amnono abjaan le' anpalsain noin Usif Yesus.

Au 'onen ma 'toti Uisnenog he naklila' In nekan alekot noi ki ala ki.