Anoni' amneot anjali sukif noi monit amneot
2
Titus! Naik munees om mok sin! Ho lo he amha'tani tuaf-tuaf he sin nmoni natuin Uisnenog In anoni' amneot. 2 Mutoon moi ale' anaef een he nmonin natuin atolan, anpanat sin kanak foo menik een, ma nmoni nok neek tainine'. Sin lo he nnaa' nahelan Uisnenog In anoni' amneot, ma nakii' nabaaln aa anbi naan. Ma sin lo he anneek tuaf abjaan amsa'.3 On nane msa', noi bifee mnasi een. Mutoon moi sin he sin anpanat sin taos ma mo'et, ma sin lo he nmonin natuin ahaa Uisnenog In alomin. Naik namunu' tuaf abjaan sin kaank een. Naik anmonin anbin mafug. Mes sin lo he nanoni' tuaf abjaan he sin nmonin nok alekot. 4 Nok lalan naan, sin anjalin aleta' noi bifee amatsao muni een, ma nanoni' sin he es-es ate anneek in monel ma in aanh een. 5 Sin lo he nanoni' sin he nmonin nok neek tainine', nmoni nok neek aknino', anpainote nahine sin umel nanan, es-es ate nholmaat in monel kuun, ma maut he in monel nanaak anbi umel nanan. Kalu sin nmonin on nane, of ka tiit fa tuaf he naguab nale'uf Uisnenog In A'an ma Plenat.
6 On nane msa', mfaineek atoni munif een, he sin nmonin nok neek tainine'.
7 Titus! Ho lo he mmoni nok alekot, he mjali leta' moi tuaf abjaan. Ho mmo'e saa'-saa' aah, mmo'el ee nok alekot, nahuum on le' ho munoni' tuaf abjaan sin. Tebes, ho lo he ammepu namneo-namneo. 8 Kalu ho munoni' tuaf abjaan, lo he na'uu na'ko anoni' amneot, he tuaf abjaan sin naik nakle'at ma nasi'ug ko. Nok lalan naan, tuaf-tuaf le' anlaban kit, namaeb ok, natuin sin ka nmu'in fa lalan he nasuub kit.
9 Munoni' ameput sin he nneen sin anakaf anbi ale' kanan lasi ma nhaliin in nekan. Sin naik anmatoen nok sin anakaf. 10 Sin naik nabaak neki sin anakaf in bale een. Sin lo he naklila' nak sin tuak een atoni neek amneot ma mapalsa'ij. Sin lo he anjalin atoni alekot le' naki'an. Kalu tuaf abjaan sin nataiba' ameput een sin amonik een namnees ma natai nok saa'-saa' le' hit tanoni' sin, sin of antebes een nak, anoni' naan naleko nmaat. Fun hit tanoni' tuaf een anmatoom nok Uisnenog le' nsoi nafetin kit.
11 Natuin Uisnenog naklila' nalali In nekan alekot noi ale' mansian ok-oke', ma nasoitan laal a'honis he nsoi nafetin naan mansian na'ko sin sanat sin. 12 Es on naan, hit lo he ttita' tapoitan monit amle'ut ma ale' tenab maufinu. Hit tmoni tbi pah-pinan tabug iij, lo he talan tahiin hit tuak, tmoni tbi neek aknino', ma takii' atbi Uisnenog. 13 Tabug iij, hit tapane he tabug Yesus Kristus ankoen On anfani neem, In neem anbi pina' ma klaha'! Naan anjali tetus-athoen noi kit ok-oke'. In le' naan, hit Usi' le' matani' nneis, le' ansoi nafetin naan kit. 14 In nnona' In tuan ee njali afgua'-tulu', he nsoi nafetin kit na'ko hit sanat sin ok-oke', he nmo'e kit atjali In nonot le' anmonin nok neek aknino', ma nlomin he anmo'en lasi alekot piut.a
15 Titus! Munoni' lasin le' iij ok-oke' moi too slani'. Amha'tani sin he natuin anoni' een. Sekom-sekog anmo'en ansaan, mutonan sin lalan alekot. Ka nabe'i fa he atoni' na'palan ko, natuin ho mmu'i hak he mmo'e lasin naan.