Nai Paulus in sulat ha'el nuug
noi in amnono nai Timotius
2 Timotius
Tabe
1
1-2 Timotius, atoni alekot!Sulat le' iij na'ko au, nai Paulus kau, le' Uisnenog nekin On anlulu kau he 'jali Yesus Kristus In haef. Sin anleek kau he 'nao utoon lasi anmatoom nok monit le' namneo, le' Uisnenog anpaa' he nfeel ee noi ale' apalsait een noin Yesus Kristus.
Timotius! Ho on le' au aanh ee kuuk. Es on naan au 'onen he hit Ama' Uisnenog, ma hit Usi', Yesus Kristus, anneek ko, naklila' Sin neek alekot noi ko, ma nfee ko monit ambi taimamut ma tainine', ma mahalan-nekaf es nok es.a
Nai Paulus antoti makasi noi Uisnenog
3 Au 'onen faij-manas ma 'teek ko. Au 'toti makasi piut-piut noi Uisnenog, natuin ho mutuin Ee piut. Au 'tuthael Ee nok neek aknino', on le' hit babaf sin antuthael Ee. 4 Au umnau, tabug hit atbatis ok nenog naan, ho mkae mse'-se'ul. Es on naan au 'lomi he u'eku a'teni 'ok ko, maut he au 'maliin.
5 Au umnau nenog naan, tabug ho mmulai mpalsai namneo-namneo moi Usif Yesus. Lasi palsait human on le' naan, na'uu ma na'baa' nani na'ko ho oin baba bi Luisa, ma ho ina' bi Yunika in nekan. Ma au a'tebes amsa' 'ak lasi palsait human on le' naan anmoni et ho nekam amsa'.b
Nai Paulus antoti he nai Timotius anpake manoef ma mahinef le' Uisnenog anfee ne sin
6 Nenog naan, tabug au 'aiti au niimk een ma 'tao sin noi ko, lalit au 'onen a'teek ko, tabug naan Uisnenog antao ko manoef ma mahinef he ho mube'i mmepu noin. Es on naan tabug ii, au 'toti ko he munaob mufani' ho manoef ma mahinef naan. 7 Fun Uisnenog In Asmanan ka nmo'e kit fa he atjali amtaus. Mes In anmo'e kit atjali tuaf-tuaf le' tabe'i ma tpalsai hit tuak een, le' atmaneek tahiin, ma atkaal tahine in tuan ee lek-leek. 8 Es on naan naik mumaeb om he muguab anmatoom nok hit Usi'. Ma naik mumaeb om natuin anhukum kau et ume buij. Au 'taam ume buij le' ii, natuin au 'tuthae hit Usi'. Es on naan kalu ho mutoon Tu'in Alekot nane, ho lo he mubalab ho aom aan he musae susal-mane'at on le' hai. Kalu ho mupeni susal-mane'at on le' naan, Uisnenog of anha'tani ko.
9-10 Natuin Uisnenog es ansoi nafetin naan kit na'ko hit sanat ma penu sin.
Ma In es anpili naan kit he atjali In tuaf een le' atmoni knino'.
In naklila' In nekan alekot ee noi kit, natuin In anneek kit.
Fun kaah, hit ka tmo'e tiit fa saa'-saa' es, he hit maso'it he tsimo In alekon.
Uisnenog ka nmo'e pah-pinan iij fa fe', mes In nafeek nalali he anleek Yesus Kristus neem,
he naklila' In nekan alekot, ma ansoi nafetin kit.
Lalit Yesus Kristus neem nalali, ma nasoitan nalali salit naan.
Ma In naseel lasij maten in kuasan!
Iij anjali Tu'in Alekot!
Es on naan sekom-sekog le' anpalsai noi Yesus Kristus, ka nmate nteni fa lee, mes anmoni piut nok Uisnenog.
11 Es on naan Uisnenog naiti kau 'jali haef noi Yesus Kristus, he au utoon In Tu'in Alekot, ma unoni' sekom-sekog anbi meel am meel.c 12 Lasin le' naan ok-oke' anmo'e kau es na' au upeni hamu'it et ume buij iij in nanan. Mes au ka umaeb ok fa! Natuin au uhine sekog es le' au 'palsaij. In es le' Usif Yesus. Ma au uhiin namneo-namneo 'ak In es le' nana'at kau mepug le' iij, In es le' anpafa' ma anpanat mepug le' iij, ma In es le' anha'tani kau he au ube'i unaob mepug le' iij, tal antee In nkoen On anfani neem. 13 Es on naan mutuin nai tu'in nbi monit na'ko anoni' amneot, le' au uklila' sin noi ko. Kalu ho mpalsai piut-piut, ma amneek sekom-sekog, ho mutoon ma muklila' mak ho mmafuut mok Yesus Kristus. 14 Uisnenog nana'at nalali amaus ma'upa' huum es et ho nimam, es le' anoni' alekot ma amneot. Es on naan ampanat muleko'-leko' amaus le' naan! Ampake Uisnenog In Asmana Knino' le' et hit nekak, maut he In nbaban ko, he mpanat amaus naan lek-leek.
Nai Onisiforus anbaban nai Paulus anbi ume buij
15 Ho of amneen mulali mak nai Figelus ma nai Hermogenes, sin atoni teta' na'ko propinsi Asiad sin nasaitan kaug ee. 16-18 Mes nai Onisiforus ka on fa naan. In ka nasaitan kau fa. Ho muhine kuum, tabug au 'bi koot Efesus fe', in nbaab kau piut. Tabug iij, in natguag een et koot Roma ii. Tabug in neem antee, in nami kau nuu-mneem anbi meel am meel. Namuni te, in nateef nok kau anbi ume buij. Mes in ka namaeb on fa. Tenij-tenij in neem anbi ume buij iij, ma anha'tani au nekak.
Es on naan au 'onen ma 'baisenu 'oi Uisnenog he naklila' In nekan alekot noi nai Onisiforus nok nani in nonot sin. Anbi neno amsoput, tabug Uisnenog nafeek mansian een sin lasin, au ufneek he kalu naleko te, Uisnenog nafeek lasi alekot noi nai Onisiforus sin.