Amnao mutoon Uisnenog In A'an ma Plenat
4
1-2 Yesus Kristus of ankoen On anfani neem noi pah-pinan, he naplenat on le' Kesel. Amonit ma amates of anhaken anbin In matan, he In nafeek sin lasin. Natuin lasij naan, anbi Uisnenog ma Yesus Kristus Sin humak ma Sin matak, au 'toti namneo-namneo noi ko, he mnao mutoon Uisnenog In A'an ma Plenat. Muloitn om piut! Naika mutenab mak, tabug alekot, ai' kaah. Muklila' sin sanat, mes mukain sin nok neek alan. Amha'tani sin neek een meki lasi-noni' amneot.3 Fun of ka loog fa te, tuaf-tuaf ka nlomi fa he anneen lasi-noni' amneot. Sin of nabgua' kulug sin le' nabe'i naguab een natuin sin alomik een, he nhaliin sin tabug sin nneen. 4 Sin ankehe natau sin lukek een he ka nneen fa lasi-noni' amneot. Mes sin nneen noi lasi tu'in luum-luum.
5 Maski on mee-on mee msa', ho nekam aan lo he ntainiin. Malan ambi hamu'it. Amnao mutoon Tu'in Alekot, he tuaf-tuaf anpalsain noi Yesus Kristus. Amtuthae tuaf-tuaf nok neek malinat, tal antee mepug naan namsoup. Naik ammepu stena'-stena'.
6 Anmatoom nok au tuak, naik mitenab moi kau, natuin au tabug he namsoup gue. Au on le' oel anbi aklaas, in nat'oop ma he oke' eeh.a 7 On le' amnaenat, au 'aen ma 'tee ulali nok alekot. Au utuin piut noi Yesus Kristus, ma ka 'belok 'iit fa 'oi meel am meel. 8 Tabug iij, au 'pao-pao lasi mese fe'. Es le', klaa mnatu le' Usi' napaal' ee noi sekom-sekog le' in amonin namneo ma namnoon. Hit Usi' naan, afeek lasi amneot. In ka npili fa humaf. Antee in tabug, In of annona' kau aklaa mnatu' naan. Ka noi au 'mese fa, mes sekom-sekog le' anneek Ee, ma anpa-paog Ee he nkoen On anfani neem, sin napeni aklaa mnatu' on nane amsa'.
Nai Paulus anba'an lasi huma'-huma'
9 Tius! Naleko te, uum amkiso maan kau labah fe'! 10 Tabug iij, au 'mes-mees kuuk. Nai Kreskes annaog een et propinsi Galatia. Ma nai Titus annaog een et pah Dalmatia. Mes nai Demas anlomi nanesib lasin amle'ut anbi pah-pinan iij, es on naan in nnao nasaitan kau. In nnao et koot Tesalonika.b 11 Aal nai Lukas es le' natgua nok kau et ii. Am'etu maan nai Markus he nua ki iim mibgua. Natuin in nabe'i nbaban kau anbi lasi huma'-huma' anbi ii.c 12 Au 'leek nai Tekikus annao et koot Efesus.d 13 Kalu ho uum, naik amniken he maiti meki maan kau au soo-balu mainikin le' au ubelak ee et nai Karpus in umel, et koot Troas. Ma naik amniken he maiti meki au lulat een naan, nneis-neis le' au 'luul sin et pasug.e
14 Nai Aleksander, atutu noni molo' naan, anmo'e maufinu noi kau tenij-tenij. Maut he nmo'e. Uisnenog of es anbalas noi ne, natai nok in amo'en naan.f 15 Ho lo he ampaant om ma'ko atonij le' naan, natuin bijaas ate in anlaban hit aguab een.
16 Tabug au 'hake 'bi afeek lasi he umneob au tuak, ka tiit tani fa tuaf es he nok kau. Sin ala sin annaon nasaitan kau. Maut he on le' naan. Maut he Uisnenog anniken nani sin sanat sin. 17 Maski on naan amsa', mes Uisnenog ka nasaitan kau fa. In nha'tani kau, he au ube'i unaob In Tu'in Alekot, ma au ka 'kulan fa saa'-saa'. Au utoon 'oi tuaf een le' ka Yahudis fa, he sin nneen niit Tu'in Alekot naan. Ma Uisnenog nafetin nalali kau na'ko amle'ut anaek. 18 Ma In of nafetin kau na'ko lasi maufinun ok-oke'. Ma In neki kau nok tainine' ma taimamut, lalit nataam kau noi sonaf neno tunan. Anbi naan, In es le' annaa' aplenat.
Uisnenog naan, apinat ma aklahat! Au 'pules u'naeb Ee ka natfeek niit fa! Amin.
Nai Paulus natu'ab in sulat
19 Naik amniken he mfee tabe noi bi Priskila,g ma in monel, nai Akila. On naan amsa' noi nai Onisiforus ma in nonot sin ok-oke'.h 20 Nai Erastus natgua et koot Korintus. Nenog naa, au 'nao usaitan nai Trofimus anbi koot Miletus, natuin tabug naan in nameen mafena'.i 21 Am'etu lalan he kalu naleko te, ho uum amtee mani iij, tabug mainikin ka ntaam fa fe'. Hit amnono abiten iij, es le': nai Ebulus, nai Pudes, nai Linus, ma bi Klaudia, ansonu een tabe noi ki. On nane msa', noi hit aok-abjaan Kristen abjaan sin.
22 Au ufneek he Uisnenog nok ko piut-piut. Maut he In naklila' In nekan alekot noi ki ala ki.
On le' naan,
au nai Paulus kau