Anbi tabug neno amsoput, mansian ee in amonin on le' mee?
3
Timotius! Tabug antee pah-pinan iij in neno amsoput sin ate, in susal sin namfau le'uf. Au utoon 'ani ko on le' naan. 2 Mansian of namnau nanesib sin tuak een, ma nsinimakan haa loit. Sin nanaeb sin tuak een, ma napala' tuaf abjaan sin, naguab nale'uf tuaf abjaan, ka nlomin fa he nneen amaihonit een, ka ntoti nahinen fa makasi, ka asimo anoni' fa, ka nlomi nani fa lasi Uisnenog, 3 ka nmaneek nahinen fa, ka nlomin fa he nmahalan nekaf es nok es, anlomin he namunu', ka ntahan nabe'i fa sin tuak, maufinu bainesi', ka nlomin fa lasi alekot, 4 anlomin he nasosa' sin aok-abjaan sin, natenab paal' aah, nmoo'l ok on ahinet, anlomin he natuin sin neek lomit annesi na'ko Uisnenog In alomin. 5 Sin anmoo'l ok on le' anaob lasi palsait, mes luman. Uisnenog In kuasan ka natgua fa nbi sin neek een. Naika mumnono leko mok tuaf-tuaf on le' naan!6 Tuaf-tuaf on le' naan antaman noi es in umel, nok huma' moel, he nfuli bifeen le' nekan ka naheel fa, ma labah ate napeni fulit. Bifeen on le' naan, sin amonik een anlomi ma nbaun sanat na'tuup, ma nmoni natatuina sinimakat ma neek palu' huma'-huma'. 7 Sin nneen kulu fe'ug le' neem nanoni' lasi fe'ug, ma sin natatuin een aah. Mes sin ka ntai nahinen fa, meel es le' antoom, ma meel es le' ansaan. 8 Ho mumnau tu'in anmatoom nok nai Yanes ma nai Yamres,a ai' kaha? Tabug naan, sin anlaban baba nai Musa. Kulug sin le' tabug ii, sin huma' mese on le' sin. Sin anlaban lasi-noni' amneot. Sin teenb een namle'un, ma sin palsait een, anbeon. 9 Kulu moel on le' naan, ka nuug he ntahan fa aloog. Ka laloog fa, too mfaun nahine sin olek een! Nahuum on le' nahunut, too mfaun sin nahine nai Yanes ma nai Yamres sin puta-kliun nuug.
Amnaa' muhel-helan lasi-noni' le' ho msimo mulali
10 Tius! Ho muhine mulali au monik ok-oke'. Ho muhine mulali ale' saa' le' au unoni' sin. Ho muhine au salit. Ho muhiin saa' le' au 'palsaij. Ho miit kuum au neek alan 'oi too mfaun, ma au manekak noi sin. Ma ho muhine msa' mak au 'alan au tuak. 11 Ho muhine msa' mmak sin ntali kau, ma nasaeb kau hamu'it ma mane'at huma'-huma'. Au upeni hamu'it ma mane'at on le' naan, anbi koot Antiokia, Ikonium, ma Listra. Mes Uisnenog ansoi nafetin kau na'ko lasin naan.b 12 Namneo, ale' apalsait een noi Yesus Kristus le' nlomin he nmonin nok neek aknino' natuin Uisnenog In lomin, lo tebes atoni' of anhamu'i sin. 13 Anluut anteni, amafiunut een ma aputa-kliun nuug, anmo'en lasi maufinu piut-piut. Sin namoe namofu tuaf abjaan sin. Fun kaah, tuaf abjaan namoe naan sin amsa'.
14 Mes ho lo he mnaa' muhel-helan lasi-noni' le' ho msimo mulali sin. Ma saa' le' ho mpalsaij ee naan, lo he mutuin ee piut. Natuin, naan es le' amneot! Ho muhiin namneo, sekog es le' nanoni' ko lasin naan. Ho mube'i ampalsai sin!c 15 Anmulai na'ko ho aan'-ana' fe', ho msimo mulali anoni' na'ko Uisnenog In Sula Knino' ee in nesan. Sula Knino' naan in nesan, es le' natoon Laal A'honis. Fun kalu ho mpalsai moi Yesus Kristus, naan anfai lalan he ho mube'i mmoni mmafutu mok Uisnenog ambi sonaf neno tunan. 16 Ale' saa'-saa' le' malula et Sula Knino' naan, lo tebes Uisnenog kuun es nana'at sin he mansian anluul sin. Lulat een le' naan, mapake' he: nanoni' tuaf anmatoom nok saa' es le' namneo, naklila' tuaf een sin sanat, natuku nafani' tuaf aseket noi lalan amneot, ma nanoni' mansian he nmoni nenog-nenog anbin Uisnenog In lomin. 17 Nok lalan naan, Sula Knino' ee, nabe'i namtisib Uisnenog In tuaf een nok be'if ma manoef, he sin nanaob een ale' kanan mepug alekot.