Hit le' amtuinas Kristus, lo he tmoni on le' solalus sin le' nneen sin anakaf
2
Timotius, au aan neka'! Yesus Kristus naan, Atoni neek alekot. Tabug iij, ho mmafutu mokan, ma In naloitan he nha'tani ho nekam. Es on naan ho lo he msimog! 2 Nahunut, au unoni' ko 'bi too mfaun een sin humak ma sin matak anmatoom nok Uisnenog In laal a'honis le' amneot. Es on naan tabug ii, au 'toti ko, he ale' saa'-saa' le' ho mneen mulali sin na'ko kau, ho meki sin ma mnao munoni' amteni sin moi tuaf-tuaf le' mapalsa'ij. Tuaf een le' naan, lo he nmanoen he nanoni' anteni tuaf abjaan.3 Hit al-ala kit le' ii, tahuum on le' Yesus Kristus In solalus sin. Es on naan hit al-ala kit atsutai hamu'it on le' In. Natuin ho le' naan, solalus alekot mese, ho lo he amsutai ho paam. 4 Solalus le' nanaob in mepug, ka ntaisibug on fa nok ulusan abjaan anteni. Nok lalan naan, in nabe'i nhaliin in anakaf.
5 Taiti leta' abjaan na'ko mali'ut. Kalu he tmali'u tok, lo he tatuin mali'ut naan in atolan. Mes kalu ka tatuin fa, of napoitan kit, ma ka tapeni fa mnisat. On nane msa', kalu he tanaob Uisnenog In mepug, lo he tatuin In atolan.
6 Mail atoni tani msa'. In nmepu matani' anbi in lelel. Es on naan in es le' annaben nahunu noi in lelel in nesan. 7 Mutenab mulek-leko' aleta' een lelon naa. Uisnenog of namnaub ma natonan sin otek een noi ko.
8 Mutenab mulek-leko' Yesus Kristus. In le' naan, kesel nai Daut in sufan-ka'un. In anmaat, mes Uisnenog namonib nafani' nalaal Je lee. Naan anjali Tu'in Alekot le' au 'ekij ma utoon ee nbi meel am meel. 9 Natuin au utoon Tu'in Alekot naan, es na' au upeni mane'at ii. Saa' anteni sin anfutu kau anpake konelit, nahuum on le' au le' iij atoni amaufinut. Mes sin ka nabe'in fa he nfutu' ma ankonelit Uisnenog In Tu'in Alekot. 10 Es on naan au uloitan au tuak le' iij, he usae kuuk mane'at huma'-huma'. Lamun Uisnenog In tuaf een le' In anpili naan sin naan, napenin sako sanat ma lasi 'honis. Fun Uisnenog of naiti nalatan sin piut, natuin sin antaam anjalin Yesus Kristus Inin. 11 Aguab een le' ii, lo namneo:
“Kalu hit tsimo tak, Kristus anmate anseek kit,
naan on le' hit tmate tasaitan monit amnaa'.
Lalit hit of atmoni tabgua tok Ne msa'.
12 Kalu hit talan anbi mane'at,
hit of atnaa' aplenat tok Ne msa'.
Mes kalu hit tatotan Ee,
In of natotan kit amsa'.a
13 Maski hit ka takii' fa,
mes In nakii' piut,
natuin In ka nabe'i namoe fa. In naguab saa', In nmo'e natuin ee.”
Ameput le' Uisnenog anbo'is
14 Tius! Mumnaub apalsait een, he sin naik anniken lasin le' iij ok-oke'. Amleek sin ampake Uisnenog In kanan, he sin nasnasab aguab een le' anmatoena' lasi anmatoom nok aguab tuuk es in oten. Lasin naan ka ma'afa' fa. Aal nale'un haa anenat een sin tenab. 15 Am'etu lalan lek-leko he mmo'e ho tuam aan on le' ameput le' maso'it anbi Uisnenog. Tuaf on le' naan, naik namaeb on, natuin in nanaob in mepug nok alekot. Ho lo he mjali tuaf le' munoni' namneog aah anmatoom nok Uisnenog In A'an ma Plenat. Fun In A'an ma Plenat naan, lo namneo! 16 Muskotub ho tuam aan na'ko aguab een le' ka ma'uu' fa, ma na'ko aguab een le' ka neki fa holmaat noi Uisnenog. Natuin lasin naan anmo'e mansian een anmaufinun anmasaatg ok. 17 Sin aguab maufinu een naan annonok nahuum on le' menas mese, le' anteek ee nak, kanker. Nai Himenius ma nai Filetus sin aguab een on le' naan! 18 Sin anoni' sin ansanan. Sin nak, atoni amates sin anmonin nfanin een. Mes naan ansaan! Nok lalan naan, sin anbeon nalalin na'kon anoni' amneot. Saa'-saa' le' sin nanoni' sin naan, nale'un tuaf abjaan sin neek palsait.
19 Mes asukif le' Uisnenog nateke nalaal je naan, ka nabeko' fa. Anbi sukif naan malula mnak, “Uisnenog nahiin nalek-leko' In nonot sin”, ma “Sekom-sekog le' naluli' ma nabees noi Uisnenog, lo he naskotub in tuan ee na'ko maufinu.” Asukif naan, es le' Uisnenog Inin.b
20-21 In naleta' anbi atoni amu'it een sin umen. Anbi naan, anmu'i bale huma'-huma'. Abjaan anmo'e sin na'ko noni mnatu' ma abjaan na'kon noni muti'. Mes abjaan na'ko haug ma tepa leog. Bale een le' mamasa', ume tuaf ee npake sin anbin fesek anaek. Mes bale een le' ka amaast een fa, ume tuaf ee namaeb on kalu in anpake sin anbi too mfaun een sin maatk een. On nane msa' mansian. Kalu anmu'i tuaf naskotub in tuan na'ko maufinu, in on le' bale amaast een. Ume tuaf ee anmaliin he npakel, natuin in mapake' he anmepu alekot huma'-huma'.
22 Munif een nabe'i anmofun labah natuin sin neek lomit een. Mes ho lo he mpanat ho tuam aan mulek-leko', naik mutuin ho neek lomit aan. M'etu moi mo'et alekot piut-piut. Ampalsai piut moi Uisnenog. Ammoni mbi manekat, halan nekaf ma taimamut mok tuaf abjaan. Ale' apalsait een noi Uisnenog, le' anmonin nok neek aknino' naan, sin anlomin he anmo'en lasi alekot piut-piut. Es on naan Timotius, ho lo he on le' sin! 23 Au utoon ufani' ko sin! Naik amtaisibu gom he mnao mmatoe lasi-lasi le' ka ma'uu' fa. Natuin lasin naan aal neki ki noi matoes ma mabanat. 24 Ameput noi Uisnenog ka npantas fa he njali amatoes. Mes sin lo he nneek-palan nok too mfaun, nanoni' nahinen tuaf abjaan, ma nneek amnanu' noi amatoes sin. 25 Sin lo he natuku nok alekot noi tuaf-tuaf le' bijaas anlaban. Nok lalan naan, kalu naleko te, Uisnenog nabaino' sin neek een he na'pisan, lalit sin ansimo saa'-saa' le' alekot amneot. 26 Nok lalan naan, sin nabe'i nate'un sin neek een antenin, lalit sin nafetin ok na'ko nitu le'uf een sin anakaf anaek ee, le' anfutu sin he natuin in alomin.