Haan tabe na'ko au, nai Paulus kau. Uisnenog anpili kau 'jali haef 'oi Yesus Kristus. Ma hit tafneek toi Usif Yesus, le' anfee kit a'honis piut-piut tok Ne, natuin Uisnenog ansoi nafetin nalali kit na'ko hit sanat ma penu sin.

Tius! Ho on le' au aanh ee kuuk, natuin au ululu' ulali lalan he ho mpalsai moi Kristus. Au 'onen 'oi hit Ama' Uisnenog, ma hit Usi' Yesus Kristus, he Sin naklila' Sin neek alekot ma lasi kasian noi ko, maut he ho mmoni mbi taimamut ma tainine', ma mahalan nekaf es nok es.^a

3 Nenog naa, hit nua kit tabgua tbi koot Efesus. Tabug au he 'nao 'oi propinsi Makedonia, au 'ak ko he mubaal ambi koot Efesus. Tabug naan, anmu'i tuaf le' ntaka'manab Usif Yesus In too slani', anpake anoni' le' ansaan ma nbeo. Es on naan au 'toti ko, he mnao mukain sin, he sin naik nakonob sin anoni' een naan. 4 On nane msa', tuaf een le' naan anpolin tabug palsuum sona haa, kalu sin annaon ma nmatotin een penit anbi lasi leta' moel sin. Ma sin anmasau-fefan nok ala haa mape'o uuf ma 'naof le' ka natfeek niit fa. Lasin on le' naan, ala neki mansian ee anmatoen ma anmabanan. Ma ka npaumakab sin fa noin Uisnenog ma ka nha'tani fa sin lasi palsait.

5 Au 'faineek ko he munoni' apalsait een noi Usif Yesus, he nmonin nbin lasi manekat nok neek aknino', tenab amneot, ma lasi palsait le' tebes aknino'.

6 Mes anmu'i kulug abjaan le' sin anbelok nalalin, ma naiti npolin fainekat naan. Lalit sin anpolin een tabug, ma nmasau-fefan ma naguab een alafgua-lafug. 7 Sin naklila' sin tuak een am nak, sin le' naan kulug le' nanoni' nai Musa in atolan een. Sin natoon ok on le' kulu naek, mes sin ka nahinen fa saa' le' sin nanoni' sin naan.

8 Hit ala kit tahiin nai Musa in atolan sin naan, naleek. Lamun hit tanaoba' sin namnees nok Uisnenog In salit amneot. 9 Atolan een naan, ka nluul sin fa noi atoni amo'e alekot. Mes anluul sin noi anaak-fatus, alaban aplenat, naloog na'ko Uisnenog, atoni amaufinut, tuaf le' ka nfaloli fa Uisnenog, le' ka nfaloli fa lasi knino', anlolo atonij, ma anlolo amaihonit. 10 Atolan sin naan anluul sin noi mansian le' nmapaisa' alafgua-lafug, le' nmapaisa' atonij nok atonij, le' anheke nakolo' tuaf he naseke' tuaf abjaan he napeni loit, le' aputa-kliun, amoet, ma noi tuaf-tuaf le' anlaban lasi anoni' amneot. 11 Anoni' le' amneot een, neman na'kon Uisnenog In Tu'in Alekot, le' In nana'at ee noi kau. Ma Uisnenog naan, Usi mapina'-maklaha'. Mansian lo he ntuna' nalat-latan Ee.

12 Au 'toti makasi na-naek 'oi hit Usi', es le' Yesus Kristus, natuin In npalsai kau, ma anfee kau be'if matani' he unaob In mepug. 13-14 Fun kaah, nahunut, au es le' ule'un Usif Yesus In kanan. Au ususab ma 'hamu'i tuaf-tuaf le' natuin In laal a'honis amsa'. Au 'tali sin. Au maufinu on le' naan, natuin tabug naan, au ka uhine 'aan fa saa' le' au 'mo'el ee le' naan, ma au ka 'palsai 'oi hit Usi' Yesus Kristus fa fe'. Mes In ka nniken kau fa. In naklila' In manekan Ee noi kau.^b Saa' anteni', In naklila' In neek leek gue noi kau piut. In anfee kau tetus-athoen he au ube'i 'palsaij Ee nok neek aki'at, ma au ube'i 'neek sekom-sekog on le' In anneek kau.

15 Bijaas hit atneen aguab am nak, “Yesus Kristus neem nalaal je anbi pah-pinan, he nsoi nafetin mansian asaant een.” Namneo on naan! Na'ko mansian asaant een ok-oke', au es le' amaufinut anneis-nesij. 16 Maski au 'maufinuk een kah, mes Uisnenog nafeek he ka nhukum kau fa. Natuin In he npake kau 'jali leta' he uklila' Yesus Kristus In sabaar ee noi atonij le' maufinun matani le'uf on le' au. Nok lalan naan, abjaan sin le' anmo'en sanat amsa', nabe'i anpalsain noi Ne, henati' sin nabe'i anmonin piut-piut nok Ne.

18 Timotius, au aan leko! Au he utoon ko saa'-saa' le' ho lo he mmo'el ma ho mmepug. Ale' saa'-saa' le' iij, natuin mafefa' knino' Uisnenog sin aguab een anmatoom nok ho tuam naan. Kalu ho mutuin muleko' aguab een naan, ho on le' solalus le' amakeen alekot, anlaban amle'ut. 19 Amnaa' muhel-helan ho lasi palsait noi Kristus. Ampanat ho neek aknino' naan piut-piut. Tuaf abjaan ka nlomin fa he nneen hanaf na'ko sin neek aan'-aan' ee ntein, le' anmo'e sin neek palsait een naan namle'un, on le' abnao oel antuu ma natutu' niis on anbi fatu putun een. 20 Nai Himenius ma nai Aleksander sin, amo'ek een namnees nok lasin le' naan. Es on naan au una'at sin noi nitu le'uf een sin anakaf. Au 'mo'e on le' naan, he sin nanoni een he naik nale'uf anteni Uisnenog In kanan.