Anmatoom nok usif ma atel
6
Anmu'i usif le' sin aten anpalsain noin Usif Yesus. Sin lo he nholmaat sin usif een, maut he tuaf abjaan sin naik napenin lalan he naguab nanofu Uisnenog In kanan, ma nkana'paal hit anoni'. 2a Anmu'i atel le' sin usif anpalsai noi Usif Yesus. Aten naan sin naik ankana'paal sin usif naan, natuin in npalsai noi Usif Yesus. On mee-on meel emsa', sin lo he antuthae naleko' nneisi nteen noi sin usif naan, natuin sin ala sin palsait mese, ma sin lo he nmanekan es nok es.Anoni' le' ansaan, ma upaf alekot
2b Tius! Munoni' lasin le' iij ok-oke', ma mha'tani too slani' sin meki aguab alekot, he sin anmo'e natuin ee ok-oke'. 3 Hit anoni' le' amneot naan, anjali sukif na'ko laal a'honis le' anhaliin Uisnenog In nekan. Mes tuaf le' nanoni' naik na'ko anoni' le' iij, sin le' naan antita' napasib Usif Yesus Kristus In anoni' le' amneot. 4 Tuaf on le' naan, nanaeb in tuan, mes in ka malole' fa! Sin menas, es le' anlomin he namin lasi matoes nok lasi luum-luum ahaa. Lasin ii, anneek-menab tuaf abjaan, anmatoeba' tuaf, nale'un atonij abjaan sin kaank een, ma anmaktino een luum-luum aah. 5 Tuaf human on le' naan, anmo'e lasi taisibug piut-piut. Sin teenb een namle'un. Sin ka nahinen ntenin fa, mee es le' amneot ma amnonot. Sin natenab nak kalu sin anmakoen anbin lasi palsait, sin nabe'i anjalin atoni amu'it.
6 Namneo, lasi palsait nabe'i nmo'e mansian napeni mnisat anaek. Fun monit le' anhalinab Uisnenog In nekan, maselo' nok lasi tenab manokab anmatoom nok saa' le' sin anmu'i, naan lo lasi palsait namneo!
7 Mimnau milek-leko'! Tabug nahonis kit, hit ka teki fa saa' es attaam toi pah-pinan ii. Ma tabug hit tmate msa', hit ka teki fa saa'-saa' atpoi ta'ko pah-pinan ii. 8 Es on naan, lamun amnahat, amninut, ma bale pakel nanookb on, mtainineb hit tenab nai!
9 Mes tuaf le' anlomi he njali atoni amu'it, labah ate, in of napeni lasi fulit huma'-huma', ma anmofu nbi kle'og aliij ma ane'ug, natuin sin nateenb ahaa mu'if. Ale' kanan lasin naan of neki amleut ma nale'un sin amonik een. 10 Atneek tanesib loit ee te, naan anjali uuf noi lasi maufinu huma'-huma'. Anmu'i tuaf abjaan le' sin n'etun ahaa loit, tal antee sin antanhai sin lasi palsait amneot. Nok lalan naan, sin nekin ok nale'un sin amonik een.
Amnaa' muhel-helan anoni' le' ho msimo mulaal je leen
11 Timotius! Ho mjali Uisnenog Inij ko. Es on naan amteet-koti muloo-loo' ma'ko lasi amle'ut sin ok-oke'. Ammoni mok neek aknino'. Ammoni mbi lasi le' anhaliin Uisnenog In nekan anbi ale' kanan lasi. Ampalsai piut moi Yesus Kristus. Amneek sekom-sekog ahaa. Ho lo he malan ambi susal. Ammoni mok sekom-sekog ahaa msa', lo he nok neek palan. 12 Ammepu namneo-namneo, he munaob ale' anoni' sin le' hit atpalsai sin. Uisnenog no'en nataam ko moi lasi 'honis abal-balat. Es on naan amnaa' ma mhoo muhel-helan lasi 'honis naan, naik mufetin. Ma ho mutoon mulali ho lasi palsait moi Usif Yesus anbi too mfaun een sin humak ma sin matak. 13-14 Es on naan tabug ii, au 'toti ko he muhakeb lasi manpaa' on ii: ammo'e mutuin Usif Yesus In apleent een ok-oke'. Naik amtanhai plenat mese amsa', maut he tuaf abjaan sin naik niit ma napenin sanat na'ko ko. Ammo'e mutuin ee ok-oke' nok amneot, tal antee hit Usi', Yesus Kristus, ankoen On anfani neem. Au 'toti ko he muhakeb lasi manpaa' on naan anbi Uisnenog In human ma In matan. In es le' anfee snasaf noi ale' kanan amonit. Au 'toti ko he ho muhakeb lasi manpaa' on le' naan anbi Yesus Kristus In human ma In matan. In es le' nekin On natoon maneo goah anmatoom nok In tuan ee, anbi gubernur Pontius Pilatus in human ma in matan.a
15 Usif Yesus le' matani le'uf naan, In es le' annaa' kuasat!
In le' naan, Kesel Naek annesi na'ko ale' kesel een.
Ma In le' naan, Anaak Anaet annesi na'ko ale' kanan anaakf een.
Antee in tabug ate,
Uisnenog of naklila' ale' kanan lasin ii.
16 Aal In mese kuun, es le' ka nmate fa ma nmoni nabal-baal.
In nmoni anbi miu-sine' le' mansian ka nabe'i fa he nail ee.
Ka tiit tani fa tuaf es, le' nabe'i he nail Ee.
Ale' kanan lasi holmaat nasaeb ok noi Ne!
Ale' kanan kuasat et In animan tal antee nabal-baal!
On le' naan, aam! Amin!
Anmatoom nok amu'it sin
17 Tius! Mutoon moi amu'it sin pah-pinan iij, he sin naik nanaeb ok, ma naik na'panen sin amonik een noi mu'if pah-pinan. Fun amu'ik een naan of oke' een. Leko nneis sin na'pane ok anbi Uisnenog Ahonis. Fun In es le' nathoeb kit saa'-saa' le' hit atpaluu sin, he hit tabe'i tnaben tiit monit ii in minonin. 18 Mutoon moi sin he sin anpake sin amu'ik een he anmo'en lasi alekot. Sin lo he nmakoen anbin mo'et alekot. Sin lo he nnona' sin aniimk een he nfiti ma mbaab tuaf, ma nlomi he nfee athoen na'ko Uisnenog noi sin. 19 Nok lalan naan, sin naloitan ma nabua' amaus he anjali sukif matani' noi sin amonik een anmiu ma nsina'. Nok lalan nane msa', sin nafena' lasi monit le' ma'upa'.
Nai Paulus natu'ab in sulat
20 Tius! Ampanat mulek-leko' ale' kanan lasij le' Uisnenog nana'at ko sin. Naik amtaisibu moi lasi moel luum-luum. Naik amluut mok ambi aguab amle'ut een, le' ka neki fa lasi holmaat noi Uisnenog. Mumnau, oo! Anmu'i tuaf anpaas in abaasn ee mnak, in atoni ahinet. Fun kaah, sin ‘hinek een’ naan, ka nmu'i fa sukif. Naik amnao he ammaluut-fefa' mok sin. 21 Anmu'i tuaf abjaan le' anpalsai lasi puta-kliun sin, tal antee sin nbelok na'kon sin lasi palsait le' amneot ma amnonot noi Uisnenog.
Au 'toti he Uisnenog naklila' In nekan alekot noi ki ok-oke'.
Saloom,
au nai Paulus kau