Nai Timotius in taos ma mo'et noi too slani'
5
Naik mukain tuaf een le' namnasin nnesi ko mpake haan matani'. Mes ampake aguab mapalan, on le' ho muguab moi ho aam honi'. Ma noi munif sin, amha'tani sin meik aguab alekot on le' ho aom-abjaan sin. 2 On nane msa', noi bifee mnasi sin. Muguab moi sin on le' noi ho iin honi'. Kalu muguab moi bifee munif sin ate, ampanat sin on le' ho feto' sin. Ho nekam aan lo he namneo ma naknino'.Anmatoom nok bifee banu sin
3-5 Too slani' lo he nbaban bifee banu nuug, le' sin ka nmu'in fa nonot le' he npaloli sin. Mes kalu banu' le' anmu'i anah fe' ate, sin le' naan lo he es anpalolij ee. Munoni' sin, he sin anbalas nahinen noi banu' naan in haet een. Nok lalan naan, sin antuthae Uisnenog, ma nhaliin In nekan. Mes noi banu' le' anmoni nmes-mees, in ka nmu'i fa tuaf antein he npalolij. In alahaa nafneek noi Uisnenog. Faij-manas in n'onen ma ntoti babat na'ko Uisnenog. Too slani' sin lo he npaloli banu' sin on le' naan.
6 Mes noi banu' le' naminab sin tuak een nekin lasi malinat pah-pinan, maski in nmoni fe' amsa', in ka maso'it fa leen, on le' atupas sin.
7 Mumnaub ale' lasin naan noi too slani' sin, mautu he tua teta' sin ka naguab nale'uf fa sin kaank een.
8 Mes kalu nmu'i tuaf le' ka nlomi fa he npaloli kuuk sin nonot, nneis-neis in umel nanan, naan on le' in naiti npolin in lasi palsait noi Uisnenog. In maufinun annesi na'ko tuaf le' ka nahine fa Uisnenog.
9 Kalu mpili banu' he nbaban anaak jema'at sin, in lo he nateba' lasin on ii: in toon anmoni naan, naik ankulan na'ko toon bo' nee; nahunut, in nakii' anbi matsaos nok atonij mese' aah; 10 tuaf nahinel am nak, bijaas in nmo'e alekot noi tuaf abjaan; in npaloli nahine in aanh een nok alekot; le' antuthae tuaf abjaan nok neek malinat; le' anbaban too apalsait een nok mepug aan'-ana'; le' anlomi he nbaban tuaf anbi susal; ma le' naloitan in tuan ee piut-piut he nbaban anbi lasi alekot.
11 Naik ampili banu' le' munif fe' he nbaban anaak jema'at een. Naik-naika sin neek lomit he nmatsaon antenin, ansi'u napoitan sin lasi mnaut noi Kristus. Nok lalan naan, sin of ka napenin fa meinuan anteni' he antuthae too slani' sin nok alekot. 12 Fun kalu sin tabug meinuan noi jema'at ankulan, naan namnees nok sin nale'un sin lasi manpaa' anbi Uisnenog In human ma In matan. Of atoni' nasaan sin. 13 Naik-naika sin napehen, lalit antaisibun ma npoi-ntaman noi tuaf abjaan een sin umen, ma natu'in sin lasi luum-luum, ma naguab nale'uf tuaf abjaan een sin kaank een. Ma lasi le'uf es anteni', es le' sin nlomi nanes-nesib he nhee-heeg ok noi es in lasi, ma naguab een lasi le' ka ma'upa' fa. 14 Leko nneis, banu sin le' munif fe', sin matsaon ntenin, he naleko te, sin nahonin, ma n'ulus kuuk sin umel nanan. Nok lalan naan, tuaf le' anmusun kit, ka napenin fa lalan he nale'u ma nkana'paal kit. 15 Anmu'i banu munif abjaan le' anseken nalalin. Sin natuin nalali nitu le'uf een sin anaak anaek ee in lalan.
16 Kalu nmu'i bifeel le' npalsai noi Usif Yesus, le' nmu'i nonot banu' te, bifeel naan lo he nbaban bifee banu' naan. Naik amfee meinuan moi jema'at een he sin es ansutaij. Nok lalan naan, too slani' sin nabe'i nbaban banu' abjaan, le' amneot ee sin ka nmu'i ntenin fa tuaf abjaan he nsutai sin.
Anmatoom nok anaak jema'at sin
17 Tuaf le' nanaak jema'at nok alekot, hi lo he mholmaat ee namneo-namneo, ma mbaen in sebat ee nok alekot. Nneis-neis noi tuaf le' anmepu matani' he naknutu' Uisnenog In A'an ma Plenat, ma nanoni' ki laal a'honis alekot ma amneot. 18 Fun malula et Uisnenog In Sula Knino' am nak, “Kalu ampake bijael he antali nanofu anel in afguan na'ko in punen, naik amfutu mutemeb in fefan, maut he in naah.” Ma malula anteni msa' am nak, “Sekog anmepu te, lo he napeni sebat.”a
19 Kalu anmu'i tuaf le' nasuub sanat noi anaak jema'at, naik amsimog on naan ee haa! Lo he nmu'i tuaf nuug am teen le' ansaksii ma naguab huma' mese on naan, na' hi mibe'i m'ulus.b 20 Kalu mukain mulalij ee nmes-mees, mes in nmoni fe' anbi sanat naan ate, na' mukain ee anbi jema'at sin humak ma sin matak. Nok lalan naan, tuaf abjaan of ka nbalani fa he nmo'e natuin in sanat.
21 Muteba' ale' lasin le' iij anbi jema'at sin ok-oke', ma naik ampili humaf. Au una'at mepug iij 'oi ho nimam 'bi Uisnenog ma Yesus Kristus Sin humak ma Sin matak. Ahaket sonaf neno tunan le' Uisnenog anpili nalali sin, anjalin saksiij amsa'.
22 Naik ammanaap he mpili tuaf he njali anakaf. Amtai ma mtae milek-leko' ee nahuun. Natuin kalu hi mpili maan tuaf es nok alafgua-lafug, lalit tuaf naan anmo'e nsaan, hi misae sanat naan amsa', natuin in amo'en. Ampanat ho mo'et ma taos he knino' piut.
23 Au 'neen, fa fe' ate ho taim aan nameen. Leko nneis, anmulai tabug ii ho mselo tua min-kase babaun, maut he njali malog. Naik minu haa oel luum-luum.
24 Mail mulek-leko'! Anmu'i tuaf le' in sanat sin nakliil' ok. Sin ka ntee nanan fa fe' noi afeek lasin sin maatk een, too mfaun sin nahine nalalin ee. Mes anmu'i tuaf abjaan amsa', le' al-aloog ate, na' sin sanat sin nakliil' ok. 25 On nane msa' huma' mese noi tuaf-tuaf le' anmo'en alekot. Abjaan nakliil' ok nanin. Ma abjaan anteni' anmo'en alekot mes manifa'. Maski on nane msa', mes saa'-saa' le' sin anmo'e sin naan, al-aloog ate, nakliil' ok amsa'. Ka nabe'i fa he takolo' lasi alekot.