Nai Paulus in sulat ha'el nuug
noi apalsait een abiten Tesalonika
2 Tesalonika
Tabe
1
Tabe na'ko au nai Paulus kau, ma au amnono nai Silas ma nai Timotius.Sulat le' iij, hai msonu' noi ki ala ki too slani abiten koot Tesalonika. Hi le' naan, es le' ampili he mituin hit Ama' Uisnenog, ma mituin hit Usi' Yesus Kristus.a 2 Hai mtoti he Sin naklila' Sin nekak alekot noi ki, maut he hi mmoni ambi taimamut ma tainine', ma mahalan nekaf es nok es.
Nai Paulus antoti makasi noi Uisnenog
3 Aok-abjaan ala ki! Hai lo he mtoti makasi piut-piut moi Uisnenog, natuin hi lasi palsait naan matani' piut noi Ne, ma hi lasi manekat naan amsa' matani' piut. 4 Es on nane, hai mitoon noi Uisnenog In jema'at een anbi meel am meel anmatoom nok ki. Hai mitoon am mak, maski tuaf abjaan sin antali ki ma nhamu'i ki, mes hi malan anbi hi lasi palsait naan.
5 Lasin le' iij nakliil' ok am nak, Uisnenog of nafeek hi lasij, anmatai. Fun hamu'it le' hi misael ee tabug iij, lo pantas neki ki mtaam amjali Uisnenog Inin. In le' naan, hi Kesel. 6 Naik mimtau, natuin Uisnenog naan, atai lasij. Mail! In of anbalas noi tuaf-tuaf le' anhamu'i ki. 7 In of naiti nani hamu'it een le' hi misae sin naan amsa'. In of anmo'e noi kai on nane msa'.
Lasin le' iij ok-oke' of anjalin tabug Usif Yesus ansanu neem, nok In ahake matani een na'ko sonaf neno tunan. 8 Sin of ansanu neman anbin ai pina' naek. In anbalas sin ala sin le' ka nlomin fa he nahine Uisnenog, ma le' ka nlomin fa he natuin Usif Yesus In Tu'in Alekot. 9 In anfee hukum manenu le'uf le' nabal-baal noi sin ala sin, tal antee sin nle'un nfinin. In anli'u napoitan sin na'ko In human ma In matan, he sin naik annaben anteni In kuasan le' anpiin ma naklaah le' naan.b 10 Mes tabug In ankoen On anfani neem, ale' apalsait een nanaeb ma nalatan In kanan, ma nholmaat Ee. Hi of ambi apalsait een sin atnaank een amsa', natuin hi msimo Tu'in Alekot, le' nenog naa hai mitoon kij ee naan.
11 Es on nane, hai m'onen faij-manas ma amteek ki nbi hai onen, maut he Uisnenog nail ki nak, hi lo pantas he mjali In nonot. Hai mtoti he In anfee In kuasan amsa' noi ki, he hi mibe'i mmo'e ale' lasi alekot mituin saa' le' hi mifeek he mmo'e, ma mituin saa' le' hi ampalsaij. 12 Kalu hi mmoni nok lalan le' nane, of abjaan sin naiti nalatan Usif Yesus In kanan. Ma hi of mipeni pules ma bo'is amsa', natuin hi mituin Ee. Lasin le' ii ok-oke' of anjalin, natuin hit Ama' Uisnenog, ma hit Usi' Yesus Kristus, Sin neek alekot.