Ampaant om ma'ko tuaf-tuaf le' nanoni' alafgua-lafug aah noi too slani'
4
Mes Uisnenog In Asmanan natoon maat-maat am nak, too slani' abjaan of antita saa' le' hit atpalsaij. Lalit sin natuin asmanaf abjaan le' nasekeb mansian, ma natuin nitu le'uf een sin anoni' sin. 2 Tuaf le' neem ma nanoni' on le' naan, naguab ate, nasuli nok mo'et. Puta-kliun ee in tuan! Tuaf een naan sin nekak naank een, anmesi'ook nalalin. 3 Sin nanoni' bifeel-atonij he naik anmatsaon. Sin nanunin amnahat huma'-huma'. Fun kaah, Uisnenog es le' anmo'e mnahat een naan. In nmo'e mnahat een naan, he kalu apalsait een anbukaen, sin antotin makasi noi Ne. Fun sin nahinen noi lasi saa' es le' namneo. 4 Ale' saa'-saa' le' Uisnenog anmo'e sin naan, lo lekog. Es on naan naik minuni huma'-huma'. Mansian sin lo he nsimo sin ma antoti makasi noi Uisnenog. 5 Fun hit tahine tak Uisnenog In A'an ma Plenat, ma hit onen naan naknino' nani ale' bukael sin naan.Usif Yesus In amepu alekot een
6 Tius! Mumnauba' lasin le' iij noi hit aok-abjaan apalsait een. Kalu ho mmo'e on naan, ho mjali Yesus Kristus In amepu alekot es. Uisnenog In A'an ma Plenat sin anmo'e ko he ho mpalsaij Ee, ma nanoni' ko he muhine anoni' mee es le' amneot. Ho mnaa' muheel mulali Uisnenog In A'an ma Plenat sin. Naan on le' bukael le' anha'tani ho aom aan. 7 Naik ampolin tabug he mpe'o aguab moel, le' ka natuin ma namnees fa nok Uisnenog. Naik amloe mutuin tu'in na'ko anaef am bifee naef le' nanunin huma'-huma'. Leko nnesi munoni' ho aom aan he mmoni mutuin Uisnenog In alomin.
8 Ambijaas ho aom aan he nabe'i, naan naleek.
Mes in alekon, babaun aah.
Mes munoni' ho aom aan anbi ale' kanan lasij, he mmoni mutuin Uisnenog In alomin,
naan, in naleko nmaat.
Fun in alekon,
ka alahaa fa noi tabug atmoni tbi pah-pinan,
mes anbi monit neno amnemat amsa'.
9 Aguab een le' iij, lo namneo! Es on naan mumnau mulek-leko', ma naik amniken sin. 10 Hit tafneek toi Uisnenog Ahonis. In es ansoi nafetin ale' mansian ok-oke', anneis-neis noi hit apalsait. Es on naan hit tmepu taheel ma at'etu lalan matani'.
11 Munoni' lasin iij ee ok-oke', ma mlelu tuaf-tuaf he nmo'e natuin anoni' een naan. 12 Naik amfee meinuan moi tuaf abjaan sin he nanebet ko, natuin ho munif ko fe'. Ho lo he mjali leta' noi too apalsait een, tabug ho muguab, ho mo'em, ho manekam moi tuaf, ho neek palsait moi Yesus Kristus, ma ho monim aknino'. 13 Tabug hi mpao kau he au 'uum ate, naik amniken he mtae Uisnenog In A'an ma Plenat noi too apalsait een. Amha'tani sin, ma munoni' sin lek-leek.
14 Ampake ho manoem le' Uisnenog nana'at kog ee naan, le' ho msimog tabug anaak too slani' an'onen ma ntao niman noi ko. Tabug naan, sin natoon Uisnenog In alomin amsa' anmatoom nok ho monim ma ho mepug. Es on naan naik musaitan manoef le' ho msimog ee naan. 15 Ammakoe he munaoba' lasin le' naan! Mautu he tuaf abjaan sin nitan am nak, ho monim ma ho mepug nanaob ok piut. 16 On le': ampanat ho aom aan, he ho mmoni nok neek amneot. Ma ampanat amsa' he ho munoni' lasi amneot. Kalu ho muheel ambi lasin naan, Uisnenog of nasoitan lalan noi ko, ma noi too mfaun le' nneen ko, he hi mitsoi ma'ko lasi amle'ut sin.