Lasij antoom nok anaak jema'at
3
Saa' le' tuaf abjaan sin naguab sin naan namneo, nak, “Tuaf le' he njali anaak jema'at, in anpili naan kuun mepu alekot es.” 2 Anaak jema'at ee, lo he tuaf le' in kanan alekot. In lo he nakii' anbi matsaos nok bifeel mese. In lo he nalan nahiin in tuan, in nekan lo naheel, atoni' nholmaat ee, antopu amnemat anbi in umel, ma nanoni' nabe'i tuaf abjaan. 3 Naika tuaf amafu lalug, ma naik amabanat. Tuaf le' namneo, es le': atoni neek mahoe', nami nahiin lasi halan nekaf, ma ka nsinimakan fa loit. 4 In lo he n'atol nahine in umel nanan. In aanh een lo he nneen ee ma nholmaat ee. 5 Fun kalu in ka nabe'i n'atol fa in umel nanan, nok lalan mee he in nabe'i n'atol Uisnenog In jema'at een?6 Leko nnesi ampili maan tuaf le' in tenab, mo'et ma taos namnasi nbi Kristus. Naika misaeb ma minaeb maan anaak jema'at na'ko tuaf le' fe' natuin Usif Yesus; naik-naika in nanaeb on. Naik-naika Uisnenog antoij, on le' Uisnenog antoi nitu le'uf een sin anaak anaet. 7 Kalu hi he misaeb tuaf es he njali anaak jema'at, m'etu tuaf le' in kanan naleek ma atoni teta' anholmaat amsa'. Nok lalan naan, in ka namaeb on fa. Ma nitu le'uf een sin anakat ka nabe'i nakleo nanofug ee fa.a
Tuaf le' he nbaban anaak jema'at
8 On nane msa', noi tuaf le' he nbaban anaak jema'at. Sin ala sin le' naan, lo he tuaf le' kanan anfoo-meni, tuaf le' ka namoe nahine fa, tuaf le' ka ninu fa lalug mafu, ma naik tuaf le' apalut. 9 Sin neek een lo he knino' een, ma sin lo he nnaa' nahelan anoni' le' Uisnenog anfeel ee ma naklila' ee noi kit, toog apalsait een. 10 Ampalekas sin amonik een ma sin mepuk een lek-leek. Kalu ka mipeni fa sin sanat sin ate, na' maiti sin anjalin tuaf le' he nbaban anaak jema'at sin.
11 On nane msa' sin feek een.b Bifeen naan sin amonik een lo he namneon ma namnonon. Naika bifeel le' naguab nale'uf tuaf abjaan een sin kaan foo-menin. Sin lo he nalan nahine sin tuak een, ma tuaf abjaan anpalsai sin amsa'.
12 Tuaf le' he nbaban anaak jema'at een, lo he atonij le' nakii' naheel anbi matsaos nok bifeel mese. In lo he n'atol nahine in umel nanan nok alekot, ma nanoni' nahine in anah sin amsa'. 13 Tuaf le' anjali atuta'-abha'et noi jema'at lek-leko, lo teeb tuaf abjaan sin of anholmaat sin. Ma sin nbalani ma ka namtaun fa he naguab een anmatoom nok sin lasi palsait noi Yesus Kristus.
Hit lasi palsait in asukin
14-15 Tius! Au ufneek he babaun es anteni' te, au 'eti 'kiso ko. Kalu au ubake' kle'og, sulat le' iij of antee nahuun. Au 'luul sulat ii, he utoon ko m'ak, Uisnenog In nonot sin lo he nmonin on le' mee. Naik amniken, Uisnenog naan, Usi Amonit. Inin nahuum on le' umel le' nahakeb anbi fatu sukif ma nii inaf le' matani'. Nok lalan naan, sin lo he natnaat Uisnenog In anoni' amneot.
16 Uisnenog anfai nalali lasi manifa' anaek na'ko hit lasi palsait. In a'sukin, on ii:
Kristus neem nalaal jen anbi pah-pinan ii,
anpake humaf ma masaf mansian on le' hit.
Uisnenog In Asmanan ee msa' naklila' bukti mnak,
Nai Yesus naan, Tuaf neek amneot ma amnonot.
Ma Uisnenog In ahake een anbi sonaf neno tunan niit Ee msa'.
Uisnenog naiti nasaeb Ee ntaam noi sonaf neno tunan,
lalit nanaeb ma ntuna' nalatan Ee.
In tu'in naneenb on ma nabenob on anfuun am nateef uuf ma pah anbi pah-pinan iij amsa'.
Anbi meel am meel anbi pah-pinan iij, tuaf anpalsain nalaal Je leen.
Hit tpalsai on le' naan!