Kalu apalsait een nabguan ate, lo hit atmo'e on meel?
2
Nahunut, au 'toti ki he hi m'onen amteek ale' too mfaun sin ok-oke'. Kalu hi mbaisenu Uisnenog ate, amtotij Ee he In anbaban ale' too mfaun sin anbin susal. Ma mtoti makasi amsa', natuin In es le' anmo'e lasi alekot noi sin ok-oke'. 2 Amteek ambi onen amsa' anmatoom nok kesel een ma anakaf sin. Nok lalan naan, hit ala kit tabe'i tmoni tbi tainine' ma taimamut, mahalan nekaf es nok es natuin Uisnenog In lomin, ma tmoni tbi laal amneot, on le' tuaf-tuaf le' nabees noi Ne. 3 Am'onen on le' naan ate, lekog. Naan anhalinab Uisnenog le' ansoi nafetin kit. 4 In nlomi he ale' too mfaun sin ok-oke' napenin a'honis, ma nahinen meel ee es le' amneot ma amnonot, es le':5 Uisnenog mese aah.
Ma anmu'i haa anete-lalan mese aah, le' anmahalan-nekaf Uisnenog nok mansian ala kit, es le' Yesus Kristus.
Nai Yesus naan, mansian namneo-namneo.
6 In annona' In tuan ee he nsoi nafetin kit na'ko hit sanat sin ok-oke'.
Nateef nok in tabug, Uisnenog anfai lasi alekot naan knino'-knino' noi ale' too mfaun sin. 7 Lalit Uisnenog anpili naan kau 'jali In haef, he 'nao utoon tuaf le' ka atoni Yahudis fa a'bi meel am meel, ma unoni' sin he sin anpalsain noi Usif Yesus ma anmonin natuin lalan amneot ma amnonot. Saa'-saa' le' au utoon sin le' iij, namneo on naan. Au ka umoe fa!a
8 Au lomik on ii: anbi meel am meel, kalu hi mibgua he m'onen, hi lo he mitaib nekaf es nok es. Naik ammanto'an. Naik ammatoe. Kalu hi mi'aiti hi nimam tabug hi m'onen, hi neekm een lo he knino' een.
9-10 Bifee nuug on nane msa'. Au 'lomi he sin n'atol sin tuak een ma sin npaken lo he npantas. Naik anmo'es on he abjaan sin antao mataf noi sin, anaak funu een le' anso'i ma nbu'i sin huma'-huma', ai' anpaken tai ma'upa' le' ka npantas fa, ai' natoon ok bainesi' nok sin anpaken amnatu ma mutiara sin. Le' anmo'e bifeel sin namasan naan, es le' neek aknino', ma sin amo'ek een nalekon. Le' naan es le' anmatai nok bifee nuug he nabesan noin Uisnenog.b 11 Kalu too slani' sin nabguan ma annenan anoni' te, bifeel sin antoko nokan ma anneen nokan lek-leek anmatoom nok anoni' een naan. Naik ta'se'og ma taloot. 12 Anbi au, ka naleko fa kalu bifeel ee naiti in tuan ma naplenat atoni', ma nanoni' sin. Naleko nneis bifeel een sin neek een natees ma naik mafeef een bainesi'. 13 Fun Uisnenog anmo'e nai Adam nahuun. Lalit, na' bi Hawa.c 14 Ma ka nai Adam fa es antopu aguab moel nahunu na'ko nitu le'uf een sin anakaf, mes bifeel. Anmulai tabug naan, mansian antanhai Uisnenog In atolan.d 15 Maski on nane msa', mes bifee nuug napenin a'honis, natuin sin nahonin. Lamun sin anpalsain namneo-namneo noi Kristus, anmonin anbin lasi manekat, anmu'in neek aknino', ma sin amonik een anpantas ma naik anbainesin.e