Nai Paulus antoti apalsait een abiten Tesalonika he n'onen anteek sin
3
Aok-abjaan ala ki! Naik amniken kai mbi hi onen totis een. Am'onen, he kalu naleko te, Uisnenog In Tu'in Alekot nanaob on labah noi uuf ma pah, tal antee tuaf abjaan anbi meel am meel anholmaat Tu'in Alekot naan, on le' tabug hi msimog. 2 Am'onen amsa', he naleko te, hit tafetin taan ok ta'ko ataisibus een, ma ta'ko amaufinut abjaan amsa', fun na'ko mansian pah-pinan iij, abjaan ka npalsain fa Tu'in Alekot naan.3 Mes Uisnenog annaa' In hanan. In nabe'i anha'tani ki, naneo ma anpanat ki na'ko amle'ut. 4 Ma hai neekm een nateba nak, Usif Yesus anmo'e ki he mituin saa' le' hai mitoon milali sin noi ki, ma hai mimneob ee mmak, hi of ammo'e mituin on le' naan.
5 Hai mifneek moi Usif Yesus, he In es le' nanaak ma nnaa' ki, he naleko te, hi mihine namneo-namneo mak, Uisnenog anneek ki. Ma hi mihine msa' mak, hi malan ambi susal ma hamu'it, on le' Kristus nahunut, In nalan ma ntahan anbi susat-hamu'it ma mane'at.
Mansian lo he tmepu, naik tapeeh
6 Aok-abjaan ala ki! Au utoon 'ani ki 'pake Usif Yesus Kristus In kanan. Hi naik mimnono mok apehet le' nenog-nenog in nnao ma ntoe-bake luum-luum aah. Fun sin ka natuin fa hit leta' le' hit tmepu matani'. 7 Hi ala ki mihine mak, hi lo he maiti leta' na'ko hai monim nenog naan, tabug hai mitgua mok ki. Hi miit kiim. Hai ka mpolin miit fa tabug anjali luum am palsuum. 8 Hai mmepu matani' faij-manas, he hai naik misusab ki. Hai ka msimo fa bukael luum-luum aah. 9 Hai le' iij, Uisnenog In ameput sin. Es on naan hai mmu'i hak he mtoti saa'-saa' na'ko ki. Mes hai ka mpake fa hak naan. Hai le' iij, amjali leta' alekot noi ki. 10 Nenog naa, hai mitoon ki atolan mese nak, “Sekog ka nmepu fa te, naik naah.”
11 Hai mipeni hanaf nak, anmu'i tuaf na'ko ki le' aal annao ntoe-bake natef-teef, ma ka nlomi fa he nmepu. Sin ala ntaisibun ma nselo natuin abjaan een sin ulusan. 12 Tuaf-tuaf on le' naan, hai mimnauba sin ampake Usif Yesus Kristus In kanan, he sin nasnasab sin mo'et een naan. Naleko nnesi, sin anmulai nmepun, he natae ma nasae kuuk sin amonik een anpake kuuk sin nenuk ma haet.
13 Aok-abjaan ala ki! Hi naik misnasab mepug alekot ee, oo!
14 Hi mitaka' milek-leko' tuaf-tuaf le' ka nlomin fa he natuin saa'-saa' le' hai mluul mitoon ki sin anbi sulat le' iij. Naik maen mituin sin, maut he sin namaeb ok. 15 Mes hi naik maan sin on le' hi musun. Mo'en sin ma mikain milek-leko' sin, nahuum on le' hi aom-abjaan een kiim.
Nai Paulus natu'ab in sulat
16 Uisnenog naan, Usif le' neki lasi taimamut ma mahalan nekaf es nok es. Au 'toti he In anfee ki In lasi taimamut naan anbi saa'-saa' aah. Maut he Uisnenog nok ki piut-piut.
17 Aguab amunit een le' iij, au 'luul sin 'eki au nimak ee kuuk, maut he hi mihine mmak, sulat le' iij namneo-namneo na'ko kau. Sulat abjaan sin amsa', au 'luul sin on le' naan.a
18 Au 'toti he hit Usi' Yesus Kristus In neek alekot naan nabgua nok ki ala ki.
Sulat le' iij, antuu' ma nhiu' on le' naan.
Au nai Paulus kau