Amaufinu le'uf ee neem fe', na' Usif Yesus ankoen On anfani neem
2
Aok-abjaan ala ki! Hai he mitoon moi ki lasij anmatoom nok hit Usi', Yesus Kristus. In tabug le' he nkoen On anfani neem, ma tabug hit ala kit tabgua tok Ne.a 2 Naik ampalsai labah, tuaf es neem namoe naan ki, hi mlomi mituin aah. Hi of amtaka'mana' kalu hi mneen abjaan sin nak, Usi' ankoen On anfani neem nalaal je. Maski sin naguab een nak, sin napenin hanaf na'ko Uisnenog In Asmanan, ai' sin anneen na'ko abjaan sin, ai' sin napenin sulat na'ko kai, mes naik ampalsai sin. Natuin lasin naan, amoel ok-oke'! 3 Naik amfee meinuan moi abjaan sin he na'oleb ki. Fun of anmu'i naan tuaf amaufinut mese, neem nahunu fe', lalit na' Usif Yesus ankoen On anfani neem. Tuaf amaufinut le' iij, of anlaban matani' noi Uisnenog, tal antee too mfaun sin natuin ee ma nlaban Uisnenog amsa'. Tuaf le' iij, in maufinun matani le'uf! Es on nane, in amneot, in lo he ntaam noi ai malala' abal-balat. 4 In nanaeb in tuan ee nalaat annesi na'ko ale' kanan pah ee atguan, ma anlaban nani ale' kanan usi fuat le' mansian naluli' ma nabesan noi sin. Ma in ntaam noi Uisnenog In Ume Onen Uuf amsa', lalit in npaas in a'baasn ee mnak, “Au le' iij, Uisnenog kau!”b5 Hi mimnau, ai' kaha? Tabug au ubgua 'ok ki fe', au utoon 'ani ki anmatoom nok tuaf le' naan. Namneo!
6 Tabug iij, tuaf amaufinut naan ka ntee in tabug ee fa fe' he naklila' in tuan, natuin anmu'i tuaf an'eka' ma ntaahn ee. Ma hi mihine msa' mak, saa' ne es le' antaahn ee on le' naan. 7 Tabug iij, tuaf le' he nmo'e taisibug, anmepu nakool-kolo', natuin anmu'i tuaf an'eka' ma ntaahn ee. Mes anmu'i tabug he tuaf le' an'eka' ma ntaahn ee naan, of he nafetin. 8 Lalit tuaf naan, anpoi neem ma nmo'e in mepug maat-maat. Mes nateef nok Usif Yesus In tabug amasat le' ankoen On anfani neem, In naguab hanaf mese' te, tuaf naan anle'u nfiin.c
9 Mes tabug Usif Yesus ka nkoen On anfani neem fa fe', nitu le'uf een sin anakaf anaek anfee kuasat matani' noi tua amaufinut naan, he in nabe'i nmo'e lasi sanmakat huma'-huma', tal antee mansian nateenb een am nak, of oni' tuaf anpake Uisnenog In kuasan.d 10 Nok lalan naan, tuaf naan namoe ma nputa-kliun naan kuun too mfaun sin. Sin le' naan, of anbatis ok na'ko Uisnenog. Maski In nasoitan lalan he ansoi nafetin naan kuun sin, mes sin antita' ma napasib In salit naan, ma ka nlomin fa he npalsain lasi amneot ma amnonot. 11 Es on naan Uisnenog anpooh naneku sin neek een na'ko lasi amneot ma amnonot, mautu he sin anpalsain noi lasi puta-kliun sin. 12 Nok lalan naan, Uisnenog anfee hukum mafena' noi tuaf een naan, natuin sin ka npalsain fa noi lasi amneot ma amnonot. Fun sin nlomin nanesib noi mo'et amle'ut.
Apalsait een lo he nalan matani'
13 Aok-abjaan ala ki! Hai mtoti makasi piut noi Uisnenog, natuin In anneek ki. Natuin tabug In ka nmo'e fa pah-pinan iij fe', In nafeek nalali he ansoi nafetin naan ki. Lalit In nfee In Asmanan he naknino' ki, natuin hi mpalsai lasi amneot ma amnonot. 14 Tabug hai mitoon Tu'in Alekot noi ki, Uisnenog anpake Tu'in Alekot naan he no'en ki, maut he hi mnaben mihine hit Usif Yesus Kristus In pinan ma klahan.
15 Amnono ala ki! Hi lo he mtahan piut, mpooh ma mnaa' mihel-helan saa'-saa' le' hai mitoon ki sin, ma saa'-saa' le' hai mluul miit sin amsa'.
16-17 Hai m'onen piut moi hit Ama' Uisnenog, ma hit Usi' Yesus Kristus. Hai mtoti he Sin nha'tani ki, maut he hi mibe'i mmo'e ale' kanan lasi alekot. Hai mtoti on le' naan, natuin hai mihine mmak, Uisnenog anneek niis kit ok-oke'. Natuin In nekan ee naleek, es on nane, In ka nasnaas niit fa fe' na'ko mepug le' he anha'tani kit. Nok lalan naan, hit tabe'i tafnekan toi Ne piut-piut.