Miloitan he msenu Usif Yesus In amneman
5
Aok-abjaan ala ki! Hai naik amluul he mitoon moi ki mak, Usi' In amneman naan, nateef leku fauk aa, ai' funan antaam nenog fauk. 2 Natuin hi ala ki mihine mmak, In amneman naan nok askeken, on le' abakat le' antaam nabaak tabug faij.a 3 Tabug naan, of mansian een anmonin anbin taimamut ma tainine', mes nok askeken ate, sin napenin amle'ut. In amneman naan, nahuum on le' bifee ma'apu', nok askeken ate, meen maihonit antee. Kalu lasij naan anbool, hit he ttita' atenij on mee? On nane msa', hit Usi' In amneman on le' naan.4-6 Aok-abjaan ala ki! Naik-naika In amneman naan napeni ki on le' abakat antaam noi umel anbi tabug fai atnanas, nateef hi mtuup amfiin. Hi naik on le' naan! Hit ka tmoni fa et mesi'okan ee nanan, on le' tuaf abjaan sin le' antupan nfinin fe'. Natuin hit es le' atpalsai talali toi Nai Yesus, atmoni talali tbi miu-sine', miloitan hi tuam een naan he msenug, ma mpanat milek-leko' hi tuam een naan. Lasin le' ii, hi mihine milali sin. 7 Fun kalu ttuup ate, ttuup tabug faij. Ma tahan lalu mafu, tinu lalu mafu, tinu tabug faij. 8 Mes hi naik on le' naan, natuin hit le' iij, tmoni talali tbi miu-sine'. Hi lo he mpanat hi tuam een naan. Kalu hi mpalsai piut-piut moi Uisnenog, ma mmaneek es nok es, naan on le' solalus le' anpake soo-balu besij le' npafa' naan in abasan. Ma kalu hi mifneek piut-piut moi Usif Yesus le' anpafa' ma anpanat ki na'ko Uisnenog In to'as, naan on le' solalus le' natobe' tobe besij.b
9 Uisnenog ka npili kit fa he hit tapeni In hukum. Mes In anpili ma anbeti kit he hit tapeni 'honis, natuin hit atpalsai toi Yesus Kristus, hit Usi'. 10 Fun In anmaat he anseek kit. Es on naan kalu In nkoen On anfani neem, hit of atmoni tok Ne nabal-baal, maski hit tmate talaal je, ai' tmoni fe'.c 11 Nok lasij naan, ampake au aguab een le' iij, he mmafainekan ma ammahelan nekaf es nok es, on le' hi mmoo'l ee tabug ahunut.
Nai Paulus anfee anoni' noi too slani' et Tesalonika
12 Aok-abjaan ala ki! Mimnau he mholmaat ma mipaaln om sin ina'-ama' le' antaman amepu kliij he natuku ki. Fun sin le' naan, anmepun matani' noi ki, ma namnauba' ki he hi naik miktuun ma mtiloot. 13 Amfiti ma ambaban sin nok hi lasi manekat, natuin sin anmepun matani' noi ki. Ammoni anbi taimamut ma lasi mahalan nekaf es nok es.
14 Aok-abjaan ala ki! Anmu'i lasi abjaan fe' le' hai he mimnaub ki sin, on ii: tuaf-tuaf le' napehen lo he amkeko' sin he sin nmepun namneo-namneo. Tuaf le' in nekan ee nabaat, amha'tanij. Tuaf le' ka abe'it, mmesij. Lalit amneek amnanu moi too mfaun.
15 Mimnau! Naik ambalas mo'et amle'ut nok mo'et amle'ut. Miloitan hi tuam een naan he mmo'e lasi alekot noi ale' too mfaun. Naik ammo'e alekot aah noi hit aok-abjaan sin kuuk, mes noi tuaf abjaan amsa'.
16 Miloitan hi neekm een naan he mmaliin piut-piut. 17 Am'onen faij-manas. 18 Anmu'i saa'-saa' aah, et susal ai' malinat, misaeb sukuul ma makasi moi Uisnenog. Fun Uisnenog anlomi nok mo'et on le' naan noi sekom-sekog le' natuin Yesus Kristus.
19 Naik am'eka' Uisnenog In Asmanan In mepun. 20 Kalu anmu'i apalsait es nak, in napeni hanaf na'ko Uisnenog, naik mail misbitin! 21 Hi lo he ampalekas milek-leko' hanaf naan, hena' hi mihine mak, namneo na'uu ma na'baa' na'ko Uisnenog, ai' kahaf? Kalu namneo te, mituin. 22 Mes miklo'ab hi tuam een na'kon mo'et amle'ut een ok-oke'.
Nai Paulus natu'ab in sulat
23-24 Au 'onen a'toti Uisnenog he naknino' hi neekm een ma hi monim een ok-oke'. In es le' nabe'i nmo'e kit he hit tmoni tbi taimamut ma lasi mahalan nekaf es nok es. Nok lalan naan, tabug hit Usi' Yesus Kristus ankoen On anfani neem, na' hi mibe'i mhake mbi In human ma In matan, meki hi aom een, hi neekm een, ma hi smanam een, le' ka nmu'i fa sanat saa'-saa'. Namneo! Natuin Usif Yesus In es le' no'en ma n'ao-nape ki mjali In nonot naan, In ka namoe fa. Fun saa' le' In naguab, In anmo'el ma anjali. Lalit In neki ki mnao moi Uisnenog In human ma In matan nok aknino'.
25 Aok-abjaan ala ki! Naik amniken kai anbi hi onen.
26 Au 'toti ki he mfee hai haan tabes ma manekat noi Uisnenog In too slani' sin et balel naan, oo!
27 Au 'toti ki 'eki Usif Yesus In kanan, he mtae au sulat le' iij moi jemaa't een ok-oke'.
28 Au 'toti he hit Usi' Yesus Kristus naklila' In nekan alekot noi ki ala ki.
On le' naan.
Saloom,
au nai Paulus kau