Amonit le' anhalinab Uisnenog In nekan
4
On ii, aok-abjaan ala ki! Hai mtoti ma mi'paan moi ki, he hi mmoni ma mhalinab Uisnenog In nekan, on le' hai minoni' ki tabug naan. Namneo, hi mmoni mituin sin ok-oke eeh, mes natuin hit attaam atjali nonot toi Usif Yesus, es nane, hai mtoti ki he hi mami lalan matani' antein. 2 Hi ala ki mihine milali saa'-saa' le' hai minoni' ki sin, ampake Usif Yesus In kuasan. 3 Uisnenog In lomin on ii: ammoni knino'! Naik amhainiisj om. Taiti leta' on le': naik amkake ma mmabenu kalu ka feel-monel fa. 4 Hi lo he m'atol mihine hi tuam een kiim he mmoni knino', tal antee tuaf abjaan sin antola ki.a 5 Naik ammoni mituin hi tenab amle'ut le' anpoi na'ko hi neekm een naan, on le' tuaf abjaan sin le' ka nahine fa Uisnenog. 6 Naik anmu'i tuaf le' he niis anmese kuun ma nami lalan he nalukib apalsait een noi Uisnenog. Natuin Uisnenog naan, hit Usi' le' of anbalas amle'ut een ok-oke'. Lasin le' iij, hai mitoon sin noi ki tenij-tenij, ma mimnaub mani ki sin na'ko tabug unu' naan. 7 Fun Uisnenog no'en nalali kit he atjali Inin. In salit, hit lo he tmoni taknino', ka thainisij, ka on fa tuaf-tuaf le' anmapaisa ma anmakaken alafgua-lafug. 8 Nok lasij naan, sekom-sekog le' ka natuin fa anoni' ii, in ka ntita' kai fa haa, mes in amsa' antita' Uisnenog le' anfee nalali In Asmana Knino' noi ki.9 Anbi au tenab, au naik a'luul ufani' 'oi ki lasi le' anmatoom nok lasi manekat anbi hi apalsait balel naan, natuin Uisnenog nekin On nanoni' ki mnak, hi lo he mmaneek es nok es. 10 Hai mneen milali mak, hi mneek hi aom-abjaan sin abiten propinsi Makedonia naan. Mes aok-abjaan ala ki! Tabug ii, hai mtoti ki, he hi mmaneek amtein mok tuaf abjaan amsa'. 11 Mami lalan he hi monim een taimamut ma tainine', ma mmahalan nekaf es nok es. Naik amtaisibu moi tuaf abjaan een sin lasin, mes es-es ate m'ulus kuum ho lasij. Hi lo he mami mepug he mipeni mnahat natuin hi haet ee kiim. Naik ampao ma mifnekan moi tuaf abjaan sin. Lasij ii hai mimnaub ee noi ki na'ko neno ahunut. 12 Kalu hi mmoni on le' nane ate, hi ka misaeb fa mafena' noi tuaf abjaan sin. Of tuaf-tuaf le' ka npalsain fa noin Kristus niit hi monim een on nane, sin nak, “Oin ee! Apalsait een noi Usif Yesus, sin amonik een amne'og namneo!”
Lasi le' anmatoom nok Usif Yesus he nkoen On anfani neem
13 Tabug ii, aok-abjaan ala ki! Au he utoon ki lasij mese, maut he hi mihine namneo anmatoom nok amates een. Hit ala kit tahiin tak, amates sin of anmoni nfanin. Es on naan kalu anmu'i tuaf na'ko Usif Yesus Inin anmaten, hi naik misusab hi tuam een naan, on le' tuaf abjaan sin le' ka nahine fa nak, amates sin of anmonin nfanin. 14 Natuin hit tahine talali tak, Nai Yesus anmaat, mes lalit Uisnenog namonib nafani' Ee. Kalu on nane, of Uisnenog namonib nafani' ale' amates sin amsa' le' anpalsai nalalin, ma nabguab sin nok Usif Yesus.
15-17 Tabug Usif Yesus ankoen On anfani neem, In ansanu neem na'ko sonaf neno tunan noi pah-pinan, of anmu'i hanaf le' naplenat nok matani'. Lalit ahake sonaf neno tunan sin anakaf naplenat sin he anpuu kniit. Lalit Uisnenog Inin le' nmate nalalin, of anmonin nfanin. Lalit sin, nok hit amonit, ta'aiti ok atsae toi nopel, he hit al-ala kit atsenu Usif Yesus In amneman naan. Lalit hit ala kit atmoni tabga-gua piut tok Ne.b