Nai Paulus nafeek he anleek nai Timotius he nnao noi Tesalonika
3
1-2 Lamun hi mihiin, tabug hai misaitan ki anbi naan, ka natuin ma ka namnees fa nok hai lomim. Hai neekm een anmalinan nmaten he iim amkiso ki, mes ka njali fa. Al-aloog ate, hai ka mibe'i mteni fa lee, es on naan hai mifeek he mlelu nai Timotius neti nkiso ki. Mes au 'ok nai Silas mibaal ambi koot Atena. Nai Timotius naan, hai aom-abjaan. In le' naan, hai nonot anbi mepug le' hai mibgua tabug hai minaob Yesus Kristus In Tu'in Alekot. Hai mleek ee neti he in nanoni' ki ma nha'tani ki, he hi lasi palsait moi Uisnenog naan nakii' ma naheel antein.a 3 Nok lalan naan, kalu hi mipeni susal, hi neekm een naan ka na'onin fa. Ampooh ma mnaa' mihel-helan hi lasi palsait naan. Fun hi mihine mak, apalsait een noin Kristus, lo tebes of napenin susal on le' naan. 4 Tabug hai mok ki fe', hai mimnaub mani ki mmak, tuaf-tuaf le' npalsai noi Usif Yesus, of napenin susal huma'-huma'. Tabug ii, ale' kanan susal naan, anjalin nalalin, ai' on mee?5 Natuin au 'susa 'maat 'ok hi 'tokom ma hi 'hakem, es nane au 'leek nai Timotius neti noi Tesalonika, mautu he hai mipeni hanaf mak, hi mpalsai piut fe' moi Uisnenog, ai' kahaf. Natuin au nekak ii nabati msa', naik-naika nitu le'uf een sin anakaf anaek neem ma nfuli ki he hi maikoti Uisnenog. Kalu anjali on nane, hai mepug nenog naan, luman am palsuum!
Nai Timotius anfani neem ma neki hanaf na'ko apalsait een abiten Tesalonika
6 Tabug ii, nai Timotius anfani neem een na'ko Tesalonika, ma neki hanaf le' nhaliin kai. In natu'in am nak, hi mpalsai piut moi Kristus, ma mmaneek piut. Lalit in natoon am nak, hi mimnau kai msa', on le' hai mimnau ki.b
7-8 Aok-abjaan ala ki! Maski hai abit ii amnaben ma'fena' natuin hai mipeni susal huma'-huma' ka ba-baun fa, mes nai Timotius in neki lasi hatanis namneo-namneo noi kai. Natuin lasij naan, tabug iij hai mihine mak, hi mpalsai Uisnenog piut-piut ma mmafuut lekog mok Ne.
Nai Paulus an'onen anteek too slani abiten Tesalonika
9 Es on naan hai misaeb sukuul makasi na-naek moi Uisnenog nok neek malinat, natuin hi mituin Ee piut. 10 Hai m'onen faij-manas, he naleko te, hit ala kit tabe'i tateef attein. Hai he minoni' minokab ma mimtisib moi ki Uisnenog In laal a'honis.
11 Hai mifnekan hai tenab ii noi hit Ama' Uisnenog, ma hit Usi' Yesus Kristus, le' nasoitan lalan, he hai iim mi'eku mok ki mtein. 12 Hai mtoti he Uisnenog anmepu nbi hi neekm een he hi lasi maneekt een nanaob on piut. On nane msa' mok hi aom-abjaan sin ok-oke', on le' hai mneek ki msa'. 13 Nok lalan naan, Uisnenog anha'tani ki, he mmoni nok neek amneot ma knino', tal antee Usif Yesus ankoen On anfani neem nok Inin, hi mhake mok amsa' anbi hit Ama Uisnenog In human ma In matan, ma hi ka misae ma mloi meki fa sanat mese amsa'.