Nai Paulus namnau in mepug anbi Tesalonika
2
Aok-abjaan ala ki! Hi ala ki mihine, tabug hai iim ma mmepu mbi Tesalonika, hai ka mpolin fa hai haet naan luum-luum. 2 Hi mimnau msa', tabug hai ka iim fa fe' ambi koot Tesalonika, abiten koot Filipi sin nasusab ma nhamu'i nalali kai. Mes Uisnenog anha'tani kai, he hai mbalani he mitoon Uisnenog In Tu'in Alekot noi ki, maski too mfaun sin anmusun kai.a 3 Tabug naan, hai meki Tu'in Alekot noi ki anbi koot Tesalonika, hai ka meki fa anoni' le' neki ki noi lalan amle'ut. Hai ka iim fa he mteef-lae, ai' mputa'-kliun ki.4 Tabug naan, hai iim nok neek aknino' ma mne'og. Uisnenog nekin On anlulu ma anleek kai, he hai meki Tu'in Alekot noi ki. Hai ka mlomi fa he mhaliin mansian in nekan, mes hai mlomi he mhaliin Uisnenog In nekan, natuin In es le' ansuu' hai neekm een nak, anmaneo ai' anpeen.
5 Hi mihine msa' mak, hai ka mfuli ki fa, saa' antein he mami lalan he mipeni loit na'ko ki. Uisnenog nahine nani hai neekm een. 6 Hai mmepu msa', ka noi fa he mipeni bo'is na'ko mansian, ai' na'ko ki, ai' na'ko tuaf abjaan sin. 7 Hai le' ii, Kristus In haef een. Hai mmu'i hak he mmoo'l om on le' anaet een, mes hai ka nuug fa he minaeb om on le' naan. Tabug naan, hai mmoo'l om on le' li'ana' le' natgua nok ki.b Hai miklila' amsa' lasi manekat noi ki, on le' bifee asusu' li'ana'. 8 Hai ka iim fa nuug ahaa he mfee ki Tu'in Alekot, mes hai mnona' ki hai aom een ii ok-oke', natuin hai mneek miis ki.
9 Aok-abjaan ala ki! Hi of mimnau fe' amsa', hai ammepu faij-manas nok matani', he hai mitae ma misae kiim hai monim naan. Hai ka misusab ki fa, tabug hai meki Tu'in Alekot naan noi ki. 10 Hi ala ki miit ma msaksii, ma Uisnenog anjali saksiij amsa' nak, tabug hai mok ki apalsait een abiten balel naan, hai mmoni nok neek aknino' ma amneot, ma ka mmo'e fa sanat mese amsa'. 11 Hi mihine mak, hai m'ulus ki ok-oke' on le' aam honi' n'ulus in aanh een, 12 es le' hai mha'tani hi neekm een, mimnaub ki nok lasi huma'-huma', ma mfuli ki, he hi mmoni nok lekog ma mhalinab Uisnenog In nekan. Fun In le' anjali Kesel, es le' no'en ki he mtaam amjali In nonot, ma mipeni paaf ambi In pinan ma aklahan amsa'.
Uisnenog anmepu et hi neekm een
13 Hai misaeb makasi ka natfeek niit fa noi Uisnenog, natuin tabug hi mneen Tu'in Alekot naan na'ko kai, hi ka msimo fa mansian in aguaban, mes hi mneen ma msimo Uisnenog In Aguaban. In es le' nekin On anmepu nbi hi neekm een naan sin naank een.
14 Aok-abjaan ala ki! Hi fe' mmulai mituin Uisnenog In lalan, mes hi aom-abjaan sin le' hi mok sin pah mese, nasusab ki. Nok lalan naan, hi mnaben miit amsa' mok apalsait een propinsi Yudea, le' sin napenin susal ma hamu'it na'ko sin atoni Yahudis kuuk, natuin sin anpalsain noin Yesus Kristus.c
15 Anmu'i atoni Yahudis le' ka ntoe natuin fa Uisnenog In lomin. Es on naan tabug Uisnenog anleek haef In mafefa knino' een neman noi sin ate, sin nasusab ma nhamu'i sin, ma namate sin. On nane msa', sin namate Usif Yesus. Tabug iij, sin namin lalan he antita' napoitan kai ntein. Sin nmusun nok sekom-sekog haa. Natuin ale' kanan lasin naan, es on naan Uisnenog ka nlomi sin fa.d 16 Lasij es antein, sin anmo'en ekat huma'-huma', he hai naik meki Uisnenog In Tu'in Alekot iij moi tuaf anbi pah abjaan antein. Atoni Yahudis sin ka nlomin fa he Usi' ansoi nafetin tua teta'. Nok lalan naan, sin antao sin sanat sin natupub ok piut. Es on naan Uisnenog natoo' ma nhukum sin.
Nai Paulus anlomi he nateef nok apalsait een abiten Tesalonika antein
17 Aok-abjaan ala ki! Maski tabug iij hit tmakloo', mes hit neek een naik on le' naan. Hai mami tabug, he kalu naleko te, hai mfani iim amtein he mi'eku mok ki, natuin hai mimnau le'u ki. 18 Au kuuk, au 'sobal ufan-fani he 'eti 'kiso ki, mes nitu le'uf een sin anakaf, an'eka' kau piut. 19 Hi mihine mak, nansaa' am es hai he iim amkiso ki? Hai he iim, natuin hai mifneek moi ki. Hi es le' amhaliin ma minaeb hai neekm een. Fun sekog anteni es le' annaa' nahelan Usif Yesus In kanan, kalu ka hi fa! Kalu hit Usi' ankoen On anfani neem, hai mibe'i he mi'aiti hai naakm een, natuin hi lasin een naan. 20 Namneo! Hi es le' minaeb hai neekm een ma mhalinab kai.