Anbi pulau Malta
28
Tabug hai mtee milali nok ao-mina' mbi meto', na' hai mihine mak balel naan, pulau Malta. 2 Abiten pulau naan ansimo kai nok alekot. Natuin tabug naan na'uul, ma mainikin ee kah, es on naan sin nahobin aij, lalit sin nak kai he mlaal. 3 Nai Paulus naini neki hau meto' amsa'. Tabug in anlaal hau nuug noi aij, nok askeken ate, kaun lasog mese anpoi neem, natuin in ka nabe'i fa maputu'. Es on naan kauna' naan, ansau ma nakii' anbi nai Paulus in animan. 4 Tabug abiten Malta niit kauna' naan nakii' anbi nai Paulus in animan, sin naguab een es nok es am nak, “Of oni' atonij ii, anlolo atonij. Maski tasij fe' nafetin ee, in aguan ee on naan. Es on naan es in ka nabe'i fa he nmoon. Sekog es le' anmo'e amle'ut, of in nsiu afguan.” 5-6 Atonin naan nateenb een nak, of ba-baun anteni' te, nai Paulus in animanl of anmu'an. Ma nok askeken, of in anmaat.
Mes nai Paulus antekal kauna' naan noi aij. In ka annaben fa menas saa'-saa'. Lalit sin anpaon babaun es, mes nai Paulus ka saa'-saa' fa. Es on naan sin nateenb een nak, “Naik-naika atonij ii, pah tuaf!”
7 Ka naloo' fa na'ko balel naan, gubernur ee in sonaf een ma in amnela' een. Gubernur pulau naan, kanan nai Publius. In neem ansenu kai anbi tasij ninen, lalit in anhone kai he hai mitgua mokan anbi in sonaf. Anbi naan, in n'ulus kai nenog teen.
8 Tabug naan, gubernur aam honij ee nameen. In anhoen on. Es on naan nai Paulus annao nail anbi in ke'an. Lalit in npooh, ma an'onen. Es on naan in naleko naan. 9 Tabug sin niit gubernur ee in amaf ee naleko on naan, amenat abjaan amsa' neman noi nai Paulus. Sin antotin he naleko' sin. Es on naan in naleko' sin amsa'. 10a Lalit sin seun bani kai, neki bale' namfau.
Nai Paulus sin annao na'ko pulau Malta noi Itali
10b-11 Hai mitgua mtahan anbi pulau Malta funan teen, tal antee ani naek ma okin naek naan nasnaas. Tabug naan, abnaog mese na'ko koot Aleksandria le' in anhake nani anbi pulau Malta. Abnaog naan kanan Li'aan Koen,a natuin anmu'i naan pah tuaf ankoen, le' bnao tuaf ee nmo'e sin na'ko haug, lalit anpasan nakfilit sin anbi bnaog naan in matan. Es on naan hai he msae bnaog naan, ma amnao mfiin moi koot Roma. Es on naan tabug hai msae moi bnaog naan, abiten Malta neki kai bukael ma bale' abjaan le' hai mpaluu sin ambi bnaog.
12 Hai mnao babaun-babaun, tal hai mtee koot Sirakusa et pulau Sisilia. Hai misnaas ambi naan nenog teen. 13 Na'ko naan, hai mnao mteni' am'abnono pulau Sisilia in ninen, lalit hai mtee koot Regium. Anmiut, anin na'ko ane'ug anfuu nok matani', es on naan hai mnao mfiin ma bnaog naan in manaap. Anmiu nteni, hai mtee koot Putioli. 14 Anbi naan, hai msanu misaitan abnaog naan. Lalit hai mnao mami Nai Yesus in apalsait een anbi balel naan. Tabug hai mi'eku mok sin, sin antotin he hai mitgua mok sin. Es on naan hai mitgua mtahan mok sin nenog hiit. Lalit hai mnao laal meto' moi koot Roma.
15 Tabug apalsait een abiten koot Roma annenan nak hai he iim moi koot Roma, sin neman nsenu kai anbi lalan. Abjaan na'eku kai anbi 'masa' Apius, abjaan na'eku kai anbi balel es, kanan Ume Snasat Teen.b Tabug nai Paulus niit sin on nanet, in nbo'is Uisnenog, ma in nekan ee naheel.
Nai Paulus antee Roma
16 Tabug hai mtee koot Roma, [solalus een nataam atoni ume buij nuug noi ume buij.]c Mes nai Paulus, sin ka nataam ee fa. Sin nfinin he in nseeb kuun umel. Anbi naan, in natgua nok solalus mese, le' anpaog faij-manas. Sin aniimk een nua sin anmatopub sin neki konelit.d
17 Nenog tenu nfini, nai Paulus anhone atoni mnasi' Yahudi anbi balel naan, he neem na'eku nokan. Tabug sin nabguan, in natoon noi sin am nak, “Au aok-abjaan ala ki! Au 'uum a'tee ii, natuin atoni Yahudis sin anheke kau anbi Yerusalem. Lalit sin nana'at kau noi anaa' aplenat pah Roma. Fun kaah, au ka 'mu'i fa sanat. Au ka 'mo'e fa sanat saa'-saa' le' anlaban noi hit atoni Yahudis. Au ka 'mo'e fa sanat saa'-saa' amsa' le' antanhai hit atolan halat, le' hit tsimo tani sin ta'ko hit babaf sin. 18 Anaa' aplenat een anpalekas nalali au lasij anbi nael. Mes sin ka niit fa au sanat mese amsa', le' namnees nok hukum amaten. Es on naan sin he nafetin kau. 19 Mes anaet een atoni Yahudis ka nsimo fa lasi fekat na'ko anaa' aplenat le' nak he nafetin kau. Es nanet, au usaeb ukonob au lasij 'oi pah Roma in uun. Au 'mo'e on naan, mes au ka 'mu'i fa tenab he 'oki au atoni Yahudis sin.e 20 Lasij naan, es le' anmo'e kau tal au 'toti he hit tabgua tbi ii. Mautu he hit tabe'i taguab saa' le' hit atoni Yahudis atpa-paog: es le' hit tafneek Usif le' Uisnenog he anleek Ee neem, he anfee 'honis noi kit toog Israel. Lasij le' ii, in amo'en tal sin anfutu kau neki konelit le' ii.”
21 Lalit sin nataen am nak, “Antee tabug iij, hai ka msimo miit fa sulat mese na'ko Yudea le' he natoon kai anmatoom nok ho lasij. On nane amsa', le' amneemt een na'ko naan, sin ka naguab niit fa ho lasij. 22 Mes hai mlomi he mneen saa' le' ho mpalsai mulalij, natuin hai mneen milali ambi meel am meel, nak too mfaun sin antita' pukan Kristen sin anoni'. Mes in amneot ee, on mee, hai ka mihine maan ee fa. Es on naan ho mutu'in miit kai.”
23 Es on naan sin malomis he nami naan tabug mese, he na'eku nfanin. Antee in tabug, toog sin namfau le'uf neem nabguan anbi nai Paulus in umel. Es on naan in anmulai natu'in sin Uisnenog In aplenat. In naiti baba nai Musa in lulat een, ma Uisnenog In mafefa knino' een abjaan sin lulat een, he anheel sin he npalsain noin Nai Yesus. In naguab na'ko nok-noka' antee manas anmaab.
24 Tabug sin anneen nalali nai Paulus in aguab een, abjaan anpalsain, mes abjaan kahaf. 25 Sin nasulin es nok es, tal tuaf abjaan he nfanin. Mes nai Paulus naguab am nak, “Teeb! Hi sulij le' ii, namnees nok saa' le' Uisnenog In Asmana Knino' natoon nani sin noi baba nai Yesaya 26 mnak,
‘Ho mnao mutoon moi pah le' iij am mak,
“Of hi mneen ma mitniin Au 'guab ee piut,
mes ka mihinel fa utu' mese!
Hi mail tenij-tenij saa' le' Au 'mo'e ma 'taog,
mes hi ka mfalolij fa.”
27 Natuin atonij le' pah iij, sin nekak een lo fatug.
Sin lukek een ka nlomi he nnenan fa lee!
Ma sin maatk een nahuum on le' he nfolon nalalin!
Toki tsuu' he sin naik annenan nai,
ma toki tsuu' he sin maatk een anfolon.
Ma toki tsuu' he sin neek een nateme anfinin.
Tal antee sin ka nahinen fa lalan he nbelok anfani neman noi Kau antenin,
es on naan Au ube'i uleko' sin, on mee?”’f
28 Nalalit nai Paulus natu'ab in tu'in naan, ma naguab am nak, “On ii, au aok-abjaan ala ki! Hi lo he mihine mak, tabug iij, Uisnenog nabalab nalali he ansoi nafetin noi atoni' 'teta' le' ka atoni Yahudis fa, natuin sin anlomin he anneen ma natniin Ee.” 29 [Nai Paulus naguab nalali on nanet, too mfaun sin naan anbatis ok. Mes sin nteenb een ka na'ekun fa, natuin sin nasulin es nok es.]g
30 Nai Paulus natgua anbi ume seba' naan, antee toon nuug. In ansimo sekom-sekog le' neman noi ne nok neek malinat.
31 Natuin lalan naan, in napeni meinuan he natu'in Uisnenog In aplenat, ma nanoni' Usif Yesus In Laal A'honis noi sin. In naguab nok neek balani, ma ka tiit fa 'ekat amsa'.
Aam Teofilus. Au tu'in iij tuk-tuka' ma pal-pala' on le' iij ee nai.
Na'ko au,
nai Lukas kau