Atoni Yahudis sin neman a'an lasi nok nai Paulus anbi Kaisarea
24
Nenog niim namunit, atoni Yahudis le' he n'a'an lasij nok nai Paulus, sin neman anteen anbi Kaisarea. Amneemt een naan, es le: nai Ananias, lasi palsait Yahudi sin anaak anaet; anaet een abjaan; ma tuaf mese, kanan nai Tertulus, le' fefan anmapiip. Es on naan sin nekij, he anjali asaah lasij he sin anlaban nai Paulus. 2-3 Tabug too mfaun een naan nabguan anbi balel he nafekan lasij, gubernur ee anlelu he neki nai Paulus neem. Lalit nai Tertulus anfeen anhake ma naguab nanofu nai Paulus. Nahunut, in antola noi gubernur ma naguab am nak,“Au 'baisenu ko, ama' gubernur! Na'ko aal aloog le' iij, anmulai na'ko ho mnaa' aplenat ambi iij, ho muhine muhuun saa' le' alekot noi kai. Lalit ho mmo'e lasi alekot huma'-huma', tal antee hai atoni Yahudis mibe'i mmoni nok taimamut ma maliin. Es on naan hai he ampake tabug iij, he mtoti makasi moi ama' gubernur. Fun sekog anteni es le' he nabe'i nmo'e on le' ho, anbi meel am meel. 4 Mes au naik uguab amnanu. Au he uguab 'oij aa lasij iij in uun. Es on naan au 'baisenu ko aam, he mneen mulek-leko' saa'-saa' le' au he 'baisenu he utoon ko sin anmatoom nok tuaf le' ii.
5 On ii. Noi hai atoni Yahudis, nai Paulus le' iij, nahuum on le' menas mese, le' antilaak na'ko balel mese noi balel abjaan. In bijaas anlaban hai atolan palsait, ma in nale'un hai atolan halat anbi meel am meel. In anbi balel meel am meel ee haa, hai atoni Yahudis sin of lo he nmaklasi een es nok es. In le' iij, anjali on le' anaak mantutan aguab na'ko pukan palsait le' natuin atoni Nasaret tuaf mese, le' hai amteek mani sin am mak, ‘pukan Nasarani’. Mes saa' le' sin nanoni' sin, nasuli naek na'ko hai palsait ee in anoni'. 6 Atoni' iij amsa', in nsobal niit he nhainisi hai Ume Onen Uuf le' in knino' kuun, ma in neki atoni mesi'okan antaam noi naa. Es on naan hai amhekel. [Natuin hai lomim, hai he mhukum ee natuin hai atolan. 7 Mes solalu 'nakaf nai Lisias, neem nasiik naan ee na'ko hai 'nimam. 8 Lalit in naplenat am nak, kalu nmu'i tuaf le' he nmo'e lasij nok nai Paulus, sin lo he neman ma anbaisenu ko anbi Kaisarea. In tenab ee, maut he gubernur ee, es le' an'ulus lasij naan.]a Es on naan tabug iij, hai iim ambi iij, he ho es le' ampalekas lasij ii. Of ho mekin om muhiin mak, saa'-saa' le' hai miguab sin le' iij, lo teeb.
On le' naan, usi'.”
9 Nai Tertulus naguab nalali on nanet, atoni Yahudis abjaan sin antebes ee mnak, “Teeb, on naan, usi'.”
Nai Paulus namneob on anbi gubernur Feliks in matan
10 Lalit gubernur ee nasneku' nai Paulus am nak, “Tabug iij, au 'fee ko meinuan he ho mumneob om.”
Lalit nai Paulus anfeen anhake, ma naguab am nak, “Ama' gubernur! Ho muplenat anbi propinsi iij, aloog een. Es on naan ho muhine mulali hai atoni Yahudis hai 'tokom ma hai 'hakem. Es nanet, au ka umtau fa he au umneob ok anbi ho humam ma ho matam. 11 Of ai' nenog bo'es am nuug afinit, au 'nao 'bi Yerusalem he 'onen anbi Ume Onen Uuf. Ho mube'i mtoti kuum tuaf-tuaf le' an'onen een nokan anbi tabug naan. 12 Anbi Ume Onen Uuf naan, au ka 'matoe fa 'ok tuaf mese amsa'. Ma anbi ume onen abjaan sin, au ka ubguab fa tuaf he au 'mo'e taisibug. On nane msa', anbi Yerusalem, au ka 'mo'e fa taisibug saa'-saa'.
13 Mes tabug iij, atonin iij he nanofu kau. Saa'-saa' le' lelon sin naguab een, ka nmu'in fa bukti saa'-saa'. 14 On iij, aam gubernur. Au he 'manaku 'aan lasij mese. Au 'ok pukan fe'ug mese, le' atoni' nakanab ee mnak, ‘Usif Yesus In Laal A'honis’. Au 'onen 'oi Uisnenog namnees on le' au baba sin an'onen een amsa' noi Ne. Au utuin baba nai Musa in apleent een ok-oke' amsa', ma au 'palsai teb-teeb saa' le' Uisnenog In mafefa' knino' een anluul nani sin na'ko unu' noi kai. 15 Au ufnekan 'oi Uisnenog on le' tuaf een le' iij, le' anmaklasi een nok kau. Hai mpalsai mak, of Uisnenog namonib nafani' amates: es le' amo'e alekot ma amo'e amle'ut. 16 Es on naan au 'mepu matani', he on meel et, au ube'i a'moni nok neek amneot ma amnonot, anbi Uisnenog ma mansian ii sin humak ma sin maatk een. On nanet, ka tiit fa es he nabe'i nanofu kau.
17 Au 'mepu toon fauk een anbi pah abjaan, ka anbi fa pah Isra'el, na' au 'fani 'uum 'oi Yerusalem. Tabug au 'uum, au 'eki loit le' atonin nabguab sin, he njali babat noi tuaf-tuaf le' anmonin anbin susal. Lalit au 'nao 'bi Ume Onen Uuf he 'onen, ma 'fee fua'-tulu' huma'-huma' 'oi Uisnenog anbi naan.b 18 Tabug au uknino ok a'bi Ume Onen Uuf utuin hai atolan halat, sin neman ma anheke kau. Mes tabug naan, ka nmu'i fa too mfaun anbi naan, ma ka nmu'i fa taisibug saa'-saa' amsa'. 19 Aal anmu'ij haa atoni Yahudis fauk le' sin neman na'kon propinsi Asia, he n'onen een anbin naan amsa'. Es on naan kalu sin anmu'in lasi nok kau, lo sin le' naan es le' he an'a'an lasij nok kau. Ka sin ama' le' iij fa! 20 Mes atonin naan, sin ka neman fa. Es on naan ho mtoti miit kuum sin le' iij, au 'saan saa'? Nenog naan, tabug sin npalekas kau anbi bale feek lasi palsait, sin ka napenin fa au sanat mese msa'. Ho mtoti kuum sin. 21 Aal of anmu'i naan lasi nono mese, le' anmo'e sin tal antee sin ntaisibun ma ka nlomi kau fa. Tabug au hanak ansae, ma au 'ak, ‘Hi he mhukum kau, natuin au 'palsai Uisnenog le' nabe'i namonib amates!”’c
22 Nai Paulus naguab on naan, mes gubernur Feliks nahine nalali lasij namfau anmatoom nok ‘Usif Yesus In Laal A'honis’. Es on naan in nasnasab aa' lasij naan am nak, “On ii! Au he 'o'en solalu 'naak anaet Lisias, he 'neen in hanan ee fe'. Kalu au uguab ulali 'okan, na' au ube'i ufeek lasi ii.” 23 Lalit in nlelu solalu nakaf mese he ntahan nai Paulus. Mes in naplenat ee he nfee ne meinuan maut he in aon-abjaan sin neman ma nail ee ma antuthael ee.
Nai Paulus naguab nok nai Feliks ma in fenaij bi Dorsila
24 Gubernur Feliks in fenaij, bifee Yahudis, kanan bi Dorsila. Naan nenog fauk, in nami lalan, he in nok in fenaij he naguab een nok nai Paulus. Es on naan in anlelu he neki nai Paulus he neem noi sin nua sin. Ma nai Paulus natoon noi sin, lalan on le' meel, he atoni' nabe'in anpalsain noi Usif Yesus Kristus, Tuaf le' Uisnenog anpaa' nanij na'ko unu'. 25 In natoon noi sin amsa', lalan on meel he atoni' nabe'i anmoni nok amneot, ma on meel he atoni' nabe'i anpaant on he naik anmo'e sanat. In natoon noi sin nak, Uisnenog of anhukum mansian ee ok-oke.
Tabug nai Feliks anneen on nanet, in namtau nmaat. Lalit in nak nai Paulus am nak, “Paulus! Noog aah nai! Mutuu'b ee nai! Kalu au upeni meinuan, au he 'o'en a'teni' ko.” 26 Tabug naan, nai Feliks nami lalan on meel, he nai Paulus anfee ne loit, he in nafetin ee. Es nanet, in no'en nai Paulus piut he naguab nokan.
27 Mes anbi lalan abjaan, gubernur Feliks nami anaak palsait Yahudi sin neek een. Es on naan in ka nlomi fa he nafeek nai Paulus in lasij labah. In nasnasab lasij naan, tal antee toon nuug. Lalit anmu'i gubernur fe'ug le' neem anseek nai Feliks, kanan Porkius Festus. Mes sin fe' antahan nai Paulus.