Nai Paulus sin anfanin antenin noin propinsi Makedonia
20
Tabug too mfaun een ka ntaisibun ntenin fa anbi koot Efesus, koot naan antainine' ma antaimamut on, on le' bijaas. Lalit nai Paulus nabguab naan apalsait een abiten le' naan, ma nhatani sin neek een. Lalit in naseon, ma annao noi propinsi Makedonia. 2 In nnao na'ko kuan noi kuan anbi pah naan, ma nha'tani apalsait een sin neek een. In nmo'e on naan, tal antee in antaam noi pah Yunani. 3 In natgua anbi naan funan teen. Lalit in nabalab he ansae bnao oel ma annao noi propinsi Siria, mes in anneen am nak, atoni Yahudis sin nmalomis he nlolo nisan. Tabug in anneen on nanet, in ka nlomi fa he ansae bnao oel ma nnao he ntee nani noi propinsi Siria. Es on naan in nnao anfani anpe'o lalan meto' anbi propinsi Makedonia.4 Puuk aan es annao nabgua nok nai Paulus. Sin es le': nai Timotius, aam Pirus in anah nai Sopater na'ko koot Berea; tuaf nuug na'ko koot Tesalonika, sin es le' nai Aristarkus ma nai Sekundus; tuaf es na'ko koot Derbe, kanan nai Gayus; ma tuaf nuug na'ko propinsi Asia, es le' nai Tekikus ma nai Trofimus.
5-6 Lalit au (es le' nai Lukas aluul sulat iij), u'eku a'teni' 'ok nai Paulus anbi koot Filipi, anbi propinsi Makedonia. Nai Paulus in amnono een annao nahunun ma anpao kai anbi koot Troas et tasij panin. Tabug atoni Yahudis sin neno naek Paskaa anfini nalali, hai nua kai msae bnao oel ma mnao moi koot Troas. Tabug naan, hai maan nenog niim. Tabug hai mtee Troas, hai msanu mi'ko bnao oel naan. Hai mi'eku mok hai nonot abjaan sin le' nahunun kai, es on naan hai mitgua anbi naan nenog hiit.
Nai Yutikus anmofu na'ko umel mese in nesu kiso' anbi koot Troas
7 Nenog naan, neno klii. Nai Paulus nafeek nalali nak, “Au aok-abjaan ala ki! Anmiut, au he 'nao 'fiin.” Es on naan hai nonot apalsait een ok-oke' iim he miloitan bukael. Natuin nai Paulus he annao, es on naan in naguab nok kai tal antee faij ee natnaan. 8 Hai mibgua anbi umel mese in atuta' le' tenu. Faij naan, sin notun pakug namfau le'uf.
9 Tabug naan anmu'i aan mone munif mese, kanan nai Yutikus,b antoko anbi nesu kiso'. In nok anneen nai Paulus amsa'. Ka loog fa, in matan een anma'fenan, es on naan in antuup anfiin. Nok askeken, in anmofu na'ko nesu kiso' naan. In nmate naan. 10 Nai Paulus ansanu natuin amoufut naan, ma nhoo naan, ma in naguab am nak, “Naik mimtau. In anmoon.” 11-12 Hai ala kai mmaliin, fun aan munif naan anmoni. Lalit sin neki nafani' noi in umel. Es on naan hai msae mfaan, ma hai mbukae mibgua. Lalit nai Paulus naguab tal antee anmiu nfiin. Tabug manas anpee', hai miseon sin ma mnao misaitan sin.
Na'ko koot Troas annaon noin koot Miletus
13 Lalit hai mmalomis ma mbatis om, tal antee hai mi'eku mteni' ambi koot mese, kanan Asos. Es on naan hai msae bnao oel moi Asos. Mes nai Paulus annao laal meto' noi koot naan.
14 Tabug hai mi'eku mteni' nai Paulus anbi koot Asos, nai Paulus ansae bnao oel iij, ma hai mnao piut moi koot Metilene. 15 Na'ko naan, hai mnao mfiin. Anmiut, hai mpaumak-maak pulau mese, kanan Kios. Anmiu ntein, hai mnao mfiin moi pulau Samos. Esah, hai mtee koot Miletus. 16 Mes nai Paulus in nekan anlomi, he kalu lekog, hai amtee labah moi koot Yerusalem, he in napeni meinuan henati nok na'naeba' neno naek Pantekosta. Lalit in ka nlomi fa he npolin tabug, he nnao ansae noi koot Efesus, natuin in ka nmu'i nteni fa meinuan.
Nai Paulus naguab nok atoni mnasi Kristen abiten koot Efesus
17 Nalalit anbi Miletus, nai Paulus anfee hanaf noi atoni mnasi' Kristen abiten koot Efesus, he sin neem na'eku nokan. 18 Tabug sin neem anteen on nanet, nai Paulus naguab noi sin am nak, “Au aok-abjaan ala ki. Hi mihine mani au 'monik iij, anmulai na'ko neno un-unu' au 'talin au haek anbi propinsi Asia, tal antee tabug ii. 19 Hi mihine msa' au 'mepu matani' 'bi hi tnaanm een, mes au ka u'naeb ok fa. Anbi au mepug sin, au matak nuuk een ansain, ma hamamu'it ka babaun fa. Au upeni ha'mu'it namfau na'ko atoni Yahudis sin. 20 Tabug au unoni' ki, au upoitan 'ani ale' lasi alekot le' au uhine sin noi ki. Ma au unoni' ki maat-maat. Au 'nao 'oi umel mese-mese, he umnaub sin anmatoom nok Uisnenog In lomin. 21 Au utoon 'oi atoni Yahudis, ma atoni' 'teta', 'ak sin lo he nasaitan sin saant een, he natuin Uisnenog. Ma sin lo he anpalsain noi hit Usi', es le' Usif Yesus.
22 Es on naan au he uguab on ii: tabug iij, au 'lomi he 'nao 'oi Yerusalem, fun Uisnenog In Asmana Knino' anheel neki kau 'nao 'oi balel naan. Au utuin aah, maski au ka uhine fa saa' le' of he anjali noi kau anbi balel naan. 23 Mes na'ko koot mese noi koot mese, Asmana Knino' natoon nahuun noi kau mnak, of au he 'taam ume buij ma 'sutai hamu'it namfau anbi balel naan. 24 Au uhine ulali on naan, natuin Usif Yesus es le' nasaeb kau mepug iij, he au 'nao 'etun Tu'in Alekot 'ak, Uisnenog anneek kit, ma In manekan ee kah. Kalu au ka utuin fa In alomin, he usopu In mepug, au 'naben au 'monik iij ka ma'upa' fa.c
25 Tabug iij, au uhiin 'ak, hi of ka miit amteni' kau fa leen. Es le' hi le' au unoni' ki ala loog le' iij, anmatoom nok lasi he attaam atjali Uisnenog In aanh een ma In nonot. 26-28 Es on nane, amneen. Au usopu ulali au mepug sin 'oi ki. Es on naan tabug iij, hi lo he mmepu piut. Kalu anmu'i tuaf na'ko ki, le' ka ntaam fa anbi Usi' In nonot apalsait, hi es mitae ma mbaab sin, oo! Au ka usanab fa. Mimnau! Au utoon 'ani Uisnenog In alomin ok-oke' noi ki. Ka tiit tani fa lasij mese le' makolo' noi ki. Es on naan hi lo he mpanat hi 'monim, ma mpaloli mani ale' tuaf le' Asmana Knino' ee anlelu ki he ampanat sin. Naika mniken mak, Usif Yesus anmate nalaal jen, he nbaen nafeek sin uupk een neki In naa' ee Kuun. In anlulu ki msa', he hi mail sin, nahuum on le' atukus natuku in a'bibi-kasen.
29 Tabug iij, au 'nao usaitan ki. Mes mimnau! Of anmu'i atoni' neem ma nanoni' lafgua-lafug anbi hi sonam ma hi tnaanm een. Sin nahuum on le' asu fuij antaam anseel gon noi 'bibi-kasen anbi pa'an. 30 Anmu'i tuaf aputa-kliun on le' naan, na'ko balel abjaan. Mes mimnau. Abjaan anteni' nbool ma npoi na'ko ki. Es on naan sin nanoni' lasi luman noi ki. Sin anlomin he atoni' natuin ahaa sin. Es on naan sin ansoobl een he anheel neki tuaf he naik natuin Usif Yesus In lalan amneot ma amnonot anteni'. 31 Es on nane, hi ampaant om lek-leek. Naika mniken, fun au utgua 'ok ki, toon teen. Au 'faineek ki faij-manas amsa', ma au ka utenab fa au susal ma au haet. Au matak nuuk een ansain noi ki.
32 Tabug iij, hit he tbatis ok. Es on naan au 'nona' ki 'oi Uisnenog In animan, he In npaloli ki. Hi mnaa' mihel-helan saa' le' au utoon ki na'ko anmulai, le' anmatoom nok Uisnenog In nekan alekot. Uisnenog In nmu'i kuasat he nha'tani ki. In npaa' he nfee tetus-athoes noi In apalsait een amsa'. Es on naan kalu hi mituin piut mok neka knino' moi Uisnenog, of hi mipeni In tetus naan.
33 Tabug au 'mepu 'bi hi tnaanm een, au ka 'sinimakan fa saa' es na'ko ki. Au ka 'toti 'iit fa hi bale mnatu', ai' noni muti', ai' pakel, ai' bale saa'-saa'. 34 Hi mihine msa', tabug au utgua 'ok ki, au 'mepu matani' he au ube'i a'moni. Ka noi au mese fa, mes au 'mepu msa' noi sin le' nok kau. 35 Es on naan nok lasin le' iij, au utoon ki lalan he hi msa' mok ambaban atoni asusat, le' ka nmu'in fa saa'-saa'. Mimnau, oo! Usif Yesus naguab niit nak, ‘Hit tfee, leko nnesi na'ko hit tsiim.”’
36 Nai Paulus naguab nalali on nanet, in nli'tuu ma n'onen nok sin ok-oke', ma ntoti he Uisnenog anpanat sin. 37-38 Sin neek een ansusan nmaten, natuin nai Paulus nak, sin of ka nateef anteni' fa nokan. Es on naan tabug sin he nbatis ok, sin nhoo ma anneek nai Paulus, ma nkaen anme'-me'ul een. Lalit sin annaon neki kaid noi bnao oel.