Nai Paulus anfani nteni' noi koot Efesus
19
Tabug nai Apolos fe' anbi koot Korintus et propinsi Akaya, nai Paulus annao nfuun kuan een abiten anu'af een. Lalit in antee koot Efesus. Anbi naan, in na'eku nok tuaf fauk le' npalsain nalalin noin Usif Yesus.2 Nalalit in antoti sin am nak, “Au aok-abjaan ala ki! Anbi nenog le' hi mpalsai moi Usif Yesus, hi msimo In Asmana Knino' ee, ai' kahaf?”
Sin nataen am nak, “Kahaf. Hai ka amneen miit fa fe', nak Uisnenog nmu'i Asmanaf on le' naan.”
3 Lalit nai Paulus antoti anteni' sin am nak, “Kalu on nanet, sin naslani ki neki slani meel?”
Nalalit sin nataen am nak, “Sin naslani kai, anpake nai Yohanis in aslanit.”
4 Es on naan nai Paulus nak, “Amneen fe'! Nai Yohanis naslani atoni' he anjali taka nak, sin nasnasab sin tuak een na'ko sin sanat sin, ma anbelok anfanin he natuin Uisnenog In lalan amneot. Mes mimnau! Nenog-nenog, in es nekin on nanoni' toog Israel nak, sin lo he npalsain noi Nai Yesus, Tuaf le' Uisnenog of he anleek Ee neem.”a
5 Annenan on nanet, sin antotin he in naslani sin, he sin antaman anjalin Usif Yesus Inin. 6 Lalit tabug nai Paulus antao in animan noi sin ma an'onen, sin nsimo Uisnenog In Asmana Knino'. Es on naan sin anmulai naguab een neki aguab abjaan le' sin ka fe' nahinel fa. Ma Uisnenog anpake sin he natoon saa' le' of he anjali. 7 Sin nabgua, tuaf bo'es am nuug.
Uisnenog anpake nai Paulus anbi koot Efesus
8 Tabug nai Paulus natgua anbi koot Efesus, in bijaas antaam noi atoni Yahudis sin ume onen, ma nanoni' sin antee namnuut anmatoom nok Uisnenog In Aplenat. In naguab ka nakolo' fa saa' es. In nmo'e on nane, tal antee funan teen. 9 Mes anmu'i tuaf le' ka ansimo fa noni' naan, es on naan sin anlaban. Sin nakoke' atoni' anbi balel naan, he sin naik natuin Usif Yesus In Laal A'honis. Nok lasij naan, nai Paulus nok apalsait een nasaitan ume onen naan. Lalit sin annao nabguan anbin ume skool mese. Ume tuaf skool naan, kanan nai Tiranus. 10 Nai Paulus nanoni' sin Usif Yesus In Tu'in Alekot, tal antee toon nuug. Es on naan too mfaun een abiten propinsi Asia anfuun am nateef, sin nneen nalali Usif Yesus In Tu'in Alekot. Anenat sin, es le' atoni Yahudis, ma atonij abjaan amsa'.
Nai Sakewa in anah sin
11 Tabug naan, Uisnenog anfee kuasat noi nai Paulus, he nmo'e lasi sanmakat huma'-huma'. 12 Tu'in, on le' kalu atoni' antoti ntahan nai Paulus in 'pilug, ai' in afutu', ma sin antao balel naan noi amenat een, es on naan sin menas een naan namneku nanin. Tal nitu le'uf een amsa', nasaitan nani amenat sin naan.
13-14 Anbi naan, anmu'i anakaf palsait Yahudi tuaf mese, nok in aan mone sin, sin tuaf hiit. Anakaf palsait naan, kanan nai Sakewa. In aanh een bijaas annaon noin meel am meel ma anli'u napoitan nitu le'uf een na'ko anitu-saet een. Sin nsobal niit he anli'u nitu le'uf neki Usif Yesus In kanan nak, “Ho muhiin Usif Yesus le' nai Paulus natoon Ee, ai' kaha? Tabug iij, au uplenat ko, a'pake Usif Yesus In kanan 'ak, ho mpoi nai ma'ko atonij ii!” Ma anmu'i atoni ahinet Yahudi abjaan le' ansobal he anmo'en on nane msa'.
15 Es on naan anbi tabug mese, nai Sakewa in aanh een naplenat een on le' naan, anmu'i nitu abulalut mese natae sin am nak, “Au uhine Usif Yesus. Uhine nai Paulus amsa'. Mes hi le' iij, hi sekog ki?” 16 Lalit tuaf anitu-saet le' naan natoo' matani. Lalit in natiik ma antepo sin amsa'. In napaap sin, ma anpisu nani sin soo balu, tal antee sin naenan moons aah nok neek amtaus na'ko umel naan.
17 Lalit aguab naan nabenob on, tal antee abiten koot Efesus nahinen ok-oke'; es le' atoni Yahudis, ma atonij abjaan msa' nahinen. Es on naan sekom-sekog le' anneen lasij nanet, sin namtaun ma ansanmakan. Es on naan sin na'naeb Usif Yesus, fun In es le' anfee kuasat anaek noi nai Paulus. 18 Lalit apalsait fe'un naan neman noi sin aok-abjaan sin le' anpalsain nalalin, ma nfai sin neek een, lalit sin nmanaku' sin sanat sin. 19 Na'ko sin le' naan, anmu'i atoni ahinit namfau. Lalit sin nabgua' naan sin suul anoni' laut ma hinef een naan, ma notu sin nputu nmaten. Kalu he tso'i sulat een naan, sin upak een nabguan noni muti' nifun bo' niim.b
20 Lalit bifeel-atonij natu'in Uisnenog In Tu'in Alekot anbi faij ma manas anbi meel am meel. Es on naan apalsait een anmalolun piut. Natuin Uisnenog In A'an ma Plenat naan, antaam senan sin, tal antee sin nekak naank een.
Taisibug anbi Efesus
21 Lalit nai Paulus nafeek he anfani noi koot Yerusalem. Mes in nlomi he annao nahunu noi propinsi Makedonia ma propinsi Akaya, lalit na' in he nnao nfini noi Yerusalem. In natenab nalali nak, “Leko nneis au 'nao 'ail apalsait een anbi balen le' iij ee fe', fun maski on meel amsa', au lo he 'tee koot Roma.” 22 Lalit in nlelu in nonot tuaf nuug, es le' nai Timotius ma nai Erastus, he annaon nahunun noin Makedonia. Mes in natgua mas aloog anteni anbi propinsi Asia.
23 Tabug naan, lasi anaek mese le' anmatoom nok Nai Yesus In Laal A'honis, anbool anbi koot Efesus. 24 Lasij naan in uun ee, on ii: anbi naan, anmu'i naan atutu nonij tuaf mese, kanan nai Demetrius. In nbijaas anmo'e ume fuat aan'-ana' amfa-faun na'ko noni muti' noi pah tuaf mese, kanan bi Artemis. Natuin in mepun naan anlaku namneo, es on naan in neki ameput een namfau le'uf. Es manum loit ee ntaam piut namfau. 25 Tabug mese, nai Demetrius nabguab naan in ameput een, ma abjaan anteni', lalit in naguab sin am nak, “Au ama' ma au aok-abjaan ala ki! Hi mihine mani mak hit amonik on le' iij, natuin loit ee neem na'ko hit mepug. 26 Mes tabug iij, hit tiit teki hit matak, ma hit atneen teki hit lukek, naan nai Paulus in amo'en. In nfuli too mfaun nak, bale een le' hit atmo'e sin le' iij, ka ma'upa' fa. In nak, bale fuat le' hit atmo'e sin le' iij, aal pah tuaf een luum-luum aah.
Es on naan ka ala fa abiten koot Efesus es le' anmesen nnenan, mes propinsi Asia anfuun am nateef annenan amsa'. 27 Es on naan amneen milek-leko'! Of hit he tjali saa' antein, kalu too mfaun natuin nai Paulus sin piut? Of atoni' ka nuug fa he ansoos anteni' hit bale fuat een le' ii. Mimnau! Tabug iij, too mfaun nabees noi hit pah tuaf bi Artemis amasat. Anbi propinsi Asia, tal antee pah-pinan anfuun am nateef, es on naan abesat sin naan neman ma nabesan anbi in ume fuat uuf, es le' anbi hit koot Efesus. Es on naan naik-naika atoni' ka nfaloli fa leen, ma sin ka nlomin fa he neman anteni' noin balel ii!”
28 Annenan on nane, sin namaunun namneo-namneo. Lalit sin anhunun een am nak, “Artemis, neek alekot! Artemis namaas! Hai abit Efesus, mi'naeb Artemis!” 29 Too mfaun een anneen sakanat naan, ma sin naen neman, tal antee koot naan nahenu nok too mfaun. Sin namkakan. Es on naan atonin anmulai anmo'en taisibug npe'on anbonij haa lalan, tal antee koot naan in amnela naek.c Sin anheke naan tuaf nuug, ma annone neki sin noi balel naan. Sin kaank een: nai Gayus ma nai Aristarkus. Atonin le' anheke sin, natuin sin nua sin le' naan, nai Paulus in amnono sin na'ko Makedonia. 30 Anneen on nanet, nai Paulus anlomi he nnao ntaam noi too ataisiubut een naan sin atnaank een, mes too apalsait een ka nlomin fa. 31 Anaet abjaan na'kon propinsi Asia nokan anbi naan, sin nahine nalek-leko' nai Paulus. Sin anlelu tuaf he natoon am nak, nai Paulus ka nabe'i fa he antaam noi too mfaun le' anmo'en taisibug naan.
32 Anbi mnela' naan, atonin anmulai nami lasij naan in uun. Abjaan anhunun neki haan amoel am nak, “On ii!” Abjaan ankoa' een am nak, “On naan!” Fun kaha, too mfaun een naan ka nahinen fa lasij naan in anaon. Sin naen nookn aah. 33 Anbi balel naan, anmu'i atoni Yahudis amsa' le' anmulai namtaun. Sin natenab nak, naik-naika too mfaun een nasaeb sin sanat nak sin es le' anpese namonib lasij ii. Es manum sin nahakeb naan tuaf mese antoom maat, anfani atuut hanaf noi too Yahudis sin. In kanan nai Aleksander. Sin ntotin he in namneob sin am nak, atoni Yahudis sin ka nahine fa lasij naan. Lalit nai Aleksander na'aiti in animan, he nakain sin he an'elah. Lalit in naguab he namneob atoni Yahudis sin. 34 Mes tabug sin nahinen nak, in le' naan atoni Yahudis, sin ansakanan piut am nak, “Artemis neek alekot! Artemis namaas! Hai abit Efesus mi'naeb Artemis!” Sin ansakanan on le' naan, tal jam nuug.
35-36 Lalit anakaf koot Efesus anhake ma nakain sin am nak, “Au aok-abjaan ala ki, abiten koot Efesus! Ale' uuf ma pah nahinen nak, hit pah tuaf bi Artemis, in amneman na'ko neno tunan noi kit. Es on naan hit abit Efesus, es le' atpailoli talek-leko. Ka tiit tani fa tuaf mese, naiti nani hit paa' naan, natuin lasij naan anjali tu'in anmoni piut ma ale' pah-pah nahinen nalalin. Es on naan, nansaa' am es hi msakaan on naan? Maski anmu'i amoel natuin sin alomik een, mes hi naik ammoe' taisibug human on le' ii! 37 Hi mheel meki tua nua' een le' iij, nahuum on le' sin anmo'en lasi amle'ut. Fun kaha, sin ka nabakan fa saa'-saa' na'ko bi Artemis in ume fuat uuf. Sin ka naguab nanofu fa hit pah tuaf bi Artemis in kanan. Es on naan hi he misaan sin natuin lasi saan saa'? 38 Mimnau! Hit tmu'i bale he tafeek lasij. Afeek laeen sin amsa', sin anpao nanin. Es on naan kalu nai Demetrius sin he anmo'en lasi, sin lo he natuin in atolan, he sin neki lasij naan noi balel feek lasij. 39 Ma kalu nmu'i lasi 'teta' antein le' sin he naitij, maut he sin annaon anmalomis nok atoni mnasi een. 40 Naik-naika anaa' aplenat pah Roma nasaan kit, natuin taisibug le' ii. Kalu sin he namin lasi le' iij in anaon, hit of he tatae on mee? Natuin lasi ii, ka ma'uug fa!” 41 Naguab nalali on nanet, anakaf naan anlelu sin he sin anbatis ok. Es on naan sin natuin een.