Tabug naan, nai Paulus annao nasaitan koot Atena, ma in nnao noi koot Korintus amsa'. Anbi naan, nai Paulus anmakhine een nok nai Akila ma bi Priskila, natuin in amo'e bale na'ko pasug amsa'. Sin natgua nabguan, ma anmepu nabguan.

4 Kalu antee atoni Yahudis sin neno snasat, nai Paulus antaam noi sin ume onen. Anbi naan, in nsobal he nfuli' atoni Yahudis ma atoni' 'teta' sin, he sin anpalsain noin Usif Yesus.

5 Mes tabug nai Silas ma nai Timotius neman na'kon propinsi Makedonia, nai Paulus nasnasab mepu pasug naan. Faij-manas in anmepu matani' ma natoon noi atoni Yahudis sin am nak, “Atonij le' hit tpa-paog na'ko un-unu', le' Uisnenog anpaa' he anleek Ee neem naan, neem nalaal jen. In es le' Nai Yesus!”

6 Mes anmu'i atoni Yahudis le' anlaban nai Paulus piut, ma sin naguab nanofug. Lalit in ntekal afu skuku na'ko in bale pakel, anjali taka nak, in ka nfaloli nteni sin fa, natuin sin ka nlomin fa he ansimo Tu'in Alekot le' in natoon noi sin. Es on naan in naguab am nak, “Hi le' iij, lo bainesi' ki! Hi on he mikosob kiim hi lukem een! Mes maut nai! Hi of msutai kiim hi saant een. Anmulai na'ko tabug iij, au ka 'mu'i 'teni' fa ulusan 'ok atoni Yahudis ki. Au he 'nao unoni' uuf abjaan le' ka atoni Yahudis fa.”

7 Anmu'i umel mese anpaumaak ume onen naan. In tuan ee, kanan nai Titius Yustus. In ka atoni Yahudis fa, mes in nekan anmaliin noi Uisnenog. Lalit tabug nai Paulus annao nasaitan atoni Yahudis sin, in annao ma ntaam noi aam Titius in umel.

8 Ka loog fa, ume onen naan in anakaf anpalsai noi Usif Yesus amsa'. In kanan nai Krispus. In umel nanan nok atoni Korintus abjaan le' anneen nai Paulus, sin anpalsain noi Usif Yesus amsa'. Lalit nai Paulus naslani sin ok-oke'.

9 Anbi faij mese, anbi mnitas, nai Paulus anneen Uisnenog naguab am nak, “Paulus, ho naik mumtau, ma naik amlimae' moi mepu iij, natuin ho 'sutais een ka oke een fa fe'. Ho lo he munoni' sin piut meki Tu'in Alekot na'ko Kau. 10 Mumnau! Ho ka mmepu mmese fa. Au 'ok ko. Maski atoni' nasusab ko, mes Au 'pasan Au haek 'oi ko. Ma Au 'ail ko faij-manas. Naik amniken, anbi koot le' iij, Au nuug namfaun.”

11 Anneen on nanet, nai Paulus natgua mas aloog anbi koot Korintus. In nanoni' Uisnenog In Laal A'honis anbi naan, tal antee toon mese ma stena'.

12 Tabug naan, sin nasaeb tuaf mese anjali gubernur anbi propinsi Akaya. In kanan nai Galio.^a Es on naan atoni Yahudis sin anma'akolan ma sin anheel neki nai Paulus annao noi gubernur fe'ug, anbi balel feek lasij. 13 Es on naan sin ankalakan nai Paulus am nak, “Atonij le' iij, anfuli' too mfaun he natuin palsait fe'ug. Maski anaa' aplenat pah Roma ka nahinen fa palsait naan!”

14 Mes tabug nai Paulus he nfai in fefan he namneob in tuan, gubernur ansenu nfeek in aguaban. In nakain nani atonin le' ankalaka nai Paulus am nak, “Haeh! Atoni Yahudis ki. Mneen fe'! Kalu hi amkalakan kau lasi amle'ut, ai' lasi malolot, au lo he 'neen hi lasij naan. 15 Mes lasij le' hi mekij neem le' iij, naan lasi et hi umel nanan! Ala hi misuli lasi le' anmatoom nok atolan lasi palsait Yahudi, ma nok in aguab een, ma nok in kaank een. Anaa' aplenat ka n'ulus fa lasin on le' naan!”^b

16 Lalit gubernur naan anli'u napoitan sin na'ko bale feek lasij naan. 17 Es on naan atoni Yunanis sin anheke naan tuaf mese, kanan nai Sostenes. In le' naan, anakaf na'ko atoni Yahudis sin ume onen. Es on naan sin anheel nekij, ma antepog anbi gubernur ee in matan. Mes gubernur naan ka nfaloli sin fa.

18-19 Lalit nai Paulus natgua nabala anbi Korintus. Mes ala loog, in naseon noi apalsait een abiten naan. Lalit in, bi Priskila ma nai Akila, annaon noi koot mese, kanan, Kengkrea, he npaon abnao oel. Anbi naan, nai Paulus anpiu in anakan funun he anjali taka nak, saa' le' in npaa' nalalij nok Uisnenog, tabug iij, in nmo'el een.^c Lalit sin ansaen abnao oel, ma annaon noi koot Efesus. Anteen naan, sin ansanun na'kon abnao naan. Lalit nai Paulus nasaitan tua nua' een naan, ma in antaam noi atoni Yahudis sin ume onen. Anbi naan, in nmafeen penit nok atoni Yahudis sin. 20 Sin nagu-guab een on naan, atoni Yahudis sin antotin he nai Paulus natgua nteni nok sin mas aloog. Mes in ka nlomi fa. 21 Lalit in naseon sin am nak, “Au aok-abjaan ala ki, naik hi neekm een nabatin! Kalu Uisnenog nasoitan lalan noi kau, of au 'fani 'uum he ail a'teni' ki.” Naguab nalali on nanet, in nnao nasaitan koot Efesus.^d

22 Lalit in ansae bnao oel nteni ma nnao nfiin tal antee koot Kaisarea. Ma in nsanu anbi naan. Lalit in nnao neki ansae noi Yerusalem, ma nmatabe nok apalsait een anbi naan. Lalit in nfani noi koot Antiokia. 23 In natgua mas aloog anbi naan, lalit in nnao nteni, he in annao anfuun am nateef anbi propinsi Galatia ma propinsi Frigia. Anbi naan, in nha'tani apalsait een sin neek een.

24 Tabug naan, anmu'i atoni Yahudis tuaf mese na'ko koot Aleksandria et pah Masir. In kanan, nai Apolos. In le' naan, atoni mafefa'. In nahine Uisnenog In Sula Knino' in nesan namnuut. In fe' neem antee koot Efesus. 25 In nneen nalali tu'in anmatoom nok Usif Yesus, ma in anmaliin he natu'in nafani' noi tuaf abjaan. In natu'in nok malinat, ma saa' le' in naguab ee naan, lo namneo. Aal in ka nahine nalali fa fe' ale' lasij naan ok-oke'. In aal nahine nak, nai Yohanis naslani atonij, kalu sin nasaitan sin saant een. 26 Tabug mese, in naguab ka na'nifa' fa anbi atoni Yahudis sin ume onen. Bi Priskila nok aam Akila sin nok annenan amsa'. An'onen een nalalin, sin anhone nekij noi sin umel. Anbi naan, sin natonan Usif Yesus In Laal A'honis, tal antee namnuut.

27 Lalit nai Apolos nafeek he nnao noi propinsi Akaya. Apalsait een koot Efesus anneek mesen natuin in lomin. Lalit sin anluul sulat mese noi sin aok-abjaak een abiten Akaya, ma ntotin he sin ansimo nai Apolos nok alekot. Ansimo sulat naan, lalit in annao antee Akaya. Anbi naan, in anbaban apalsait een namneo-namneo. 28 In anmafeen penit nok atoni Yahudis sin anbi too mfaun een maatk een, mes sin ka nekij fa. In nlomi he anpake Uisnenog In Sula Knino' he nanoni' sin nak, “Tuaf le' Uisnenog anpaa' he anleek Ee neem, le' hit tpa-paog ala loog, In es le' Nai Yesus!”