2 Kalu sin anteen balel mese le' nmu'i ume onen, nateef nok atoni Yahudis sin neno snasat, nai Paulus bijaas ntaam ma nok an'onen nok abiten naan. Anbin Tesalonika msa', in nok antaam anbi sin ume onen. Es on naan in nok anmafeen penit nok sin anbi naan, sin anpake Uisnenog In Sula Knino'. In nok an'onen nok sin anbi neno snasat haef tenu natuut aah. 3 In naguab noi sin am nak, “Kalu hit attae talek-leko' tbi Uisnenog In Sula Knino' naan, hit tahiin tak sin naguab nalalin na'ko un-unu' nak, Tuaf le' Uisnenog anpaa' he anleek Ee neem noi kit, of In napeni ha'mu'it namfaun. In of anmaat. Mes lalit Uisnenog of anpake In kuasan he namonib nafani'. Tabug iij, hit tahine talali tak, Tuaf le' Uisnenog anpaa' nanij, es le' Nai Yesus!”

4 Annenan on nanet, anmu'i atoni Yahudis abjaan ansimo nai Paulus in aguab een, lalit sin nabguan nok nai Paulus sin. Na'ko tuaf-tuaf le' ansimo aguab een naan, anmu'i msa' atoni Yunanis le' sin namnau niis Uisnenog, nok bifeel abjaan le' nmu'in kaan leko mateka' anbin koot naan.

5 Mes atoni Yahudis sin anaet een nas'unu' ma anneek menan. Es on naan sin nakoke' ale' atoebakes een he sin ntaisibun. Tabug too mfaun een nabguan nalalin on nanet, sin anmulai anmo'en taisibug anbi koot naan. Sin nami nai Paulus ma nai Silas he sin anheel neki sin noi too mfaun een le' antaisibun fe'. Lalit sin annaon nale'un nai Yason in umel, natuin nai Paulus nok nai Silas natgua ntaahn een anbi naan. 6-7 Mes sin ka napeni fa nai Paulus sin anbin naan. Lalit sin anheel neki nai Yason ma nonot apalsait abjaan noi bale feek lasi. Sin nasaeb sanat noi nai Yason am nak, “Tabug iij, anmu'i asusit le' neman et hit koot. Sin annaon noi balel meel am meel, sin anmo'en taisibug! Tabug iij, sin neman he nale'un hit atolan anbi balel iij, lalit anseek neki sin atolan! Nai Yason le' iij, ansimo nalali tuaf een naan, ma anfeen sin balel 'tupa' anbi in umel! Ma sin ala sin anlaban hit atolan, natuin sin ka nlomin fa he nmanaku' noi hit usi naek, kesel. Sin aal anmanakun noi sin Usi Anaek mese aah, kanan Nai Yesus.”

8 Annenan on nane, anaet een ma atonin le' anbin balel naan, sin teenb een ansikasaan ok. 9 Lalit anaet een koot naan anlelu nai Yason ma nonot apalsait een he nbaen een loit he sin nmana'fefan am nak, sin of ka anmo'en fa taisibug antenin, ma ka naenan fa. Anbaen een nalalin, sin nafetin nai Yason sin.

10 Faij naan, nonot apalsait een abiten koot Tesalonika naten-teenb een, nak naleko nneis sin anleek nai Paulus ma nai Silas he annaon noi balel abjaan. Lalit sin nlelu atoni nua' een naan annaon noin koot mese, kanan Berea. Anteen nanet, sin antaman noin atoni Yahudis sin ume onen. 11 Mes atoni Yahudis abiten Berea naan, ka on fa abiten Tesalonika. Sin nlomin anmaten he anneen ma nabalab ok he ansimo nai Paulus sin aguab een. Fun abiten Berea anneen nalek-leko' nai Paulus sin, es on naan sin nail ma ntae nalek-leko' Uisnenog In Sula Knino'. Sin namin he nahinen nak, nai Paulus sin aguab een naan namneo, ai' kaha. Es on nane, faij-manas sin npalekas Uisnenog In Sula Knino' naan, tal namnuut. 12 Natuin lalan naan, atoni Yahudis namfau anbi balel naan, anpalsain noin Usif Yesus. On nane msa', atoni Yunanis sin. Apalsait een noin Usif Yesus naan, es le' bifeel ma atonij, le' anmu'in pengaru naek.

13 Mes tabug naan, atoni Yahudis abiten Tesalonika annenan nak nai Paulus sin nanoni' Uisnenog In A'an ma Plenat anbi koot Berea. Sin neem natuin een, ma sin nakoke' toog, he anmo'en taisibug anteni anbi balel naan. 14 Es naan, abiten Berea neki nai Paulus annaon laabn aah noi tasij ninen. Mes nai Timotius ma nai Silas natgua nabaaln aa anbin Berea. 15 Atonin naan, annaon neki nai Paulus anteen koot mese, kanan Atena. Lalit sin nasaitan nai Paulus anbi naa, ma sin anfanin noin koot Berea. Sin nekin aguab manba'an na'ko nai Paulus nak, nai Silas ma nai Timotius lo he neman labah nai he nabguan nokan.

16 Tabug nai Paulus anpao nai Silas ma nai Timotius sin amneemk een noin Atena, in nekan ansuus, natuin in niit bale fuat namfau anbi koot naan.

17 Mes anbi naan, anmu'i atoni Yahudis nok atoni' 'teta' abjaan le' an'onen een noin Uisnenog. Nai Paulus antaam noi sin ume onen, ma anmatotin een penit nok sin. Nenog-nenog, in annao noi amasa' ma naguab nok tuaf sekom-sekog aah anbi naan. 18 Lalit in anmatotin een nok kulug abjaan na'kon pukan nuug anbin koot naan. Pukan mese, es le' Epikoros, ma pukan es anteni', es le' Stoa.^a Mes tabug in naguab anmatoom nok Usif Yesus nak, In anmoni nfaan na'ko In amaten, anmu'i tuaf le' npolin hapel am nak, “Thfoe'! Amoel ee tuan ee, es le' iij!” Abjaan na'akan een am nak, “Ka ka ka! Atoni' iij he naseke' kit, he hit atfua toi sin pah tuaf abjaan een!”

19-21 Abiten Atena ma anao-amneemt een abiten koot naan, kalu nneen lasi fe'ug mese te, on le' noni fe'ug, penit fe'ug, sin bijaas antoko nabguan ma nmatotin een penit anbi katubu aan es, sin anteek nak, Areopagus. Lalit anmu'i tuaf na'ko sin neki nai Paulus annao noi balel naan, ma sin antotij am nak, “Neu! Mutoon miit kai noni fe'ug naan! Natuin ho muguab lasi fe'ug le' nmo'e kai he mtaka'mana' kle'og. Es on naan hai mtoti he ho muguab amteni' fe', he hai mihine namneo.”

22-23 Lalit nai Paulus anhake ma naguab am nak, “Hi atoni Atenas ala ki! Au 'nao anono ulali hi koot iij, ma au 'iit ulali 'ak namneo, hi ammakoe he minaoba' atolan lasi palsait. Au 'iit hi bale fuat een et meel am meel. Mes au 'iit bale fuat mese malula' nak, ‘Iij fuat noi pah tuaf ka mahine fa’. He tabaino' ee tak, hi mfua milali moi Uisnenog, mes hi ka mihiin Le fa fe'. In es le' au utoon kij Ee naan.

24 Natuin In es le' anmo'e neno tunan ma pah-pinan nok in nesan ok-oke'. In es le' Usif noi ale' saa' anbi neno tunan ma pah-pinan. Es on naan In ka natgua fa anbi ume fuat le' mansian anmo'el. 25 In es le' anfee snasaf ma namonib hit mansian. Es on naan In es anfee ale' saa' le' hit paluug. Mes In ka npaluu fa saa'-saa'. Es on nane, mansian ka nabe'i fa he anbaab Ee.^b 26 Na'ko tuaf mese, In namonib too anbi pah-pinan anfuun am nateef. In es anbati noi ale' uuf ma pah, es-es nok in pah. Ma In es an'atol ale' uuf ma pah sin a'hakek ma sin a'mofuk een, mese-mese nok in tabug ma in etin.

27 In nmo'e on naan, natuin In nlomi he hit mansian kit, tamij ma tahinel lek-leek. Mansian sin lo namin kal-kalu sin nabe'i nateef Nokan. Mes in amneot, In ka naloo' fa na'ko kit. 28 Anmu'i tuaf naguab niit nak,

Anmu'i hi amnaiti neel amsa', naguab een am nak,

29 Naan lo namneo. Hit ala kit le' iij, Uisnenog In sufan kit. Es on naan naik mitenab mak Uisnenog nahuum on le bale fuat mahuma', le' mansian nabe'i nmo'el neiki mnatu', ai' noni muti', ai' fatug, natuin sin teenb een kuuk. 30 Nahunut, namneo mansian ka nahine fa lasij naan. Es on naan es le' Uisnenog nafetin kit he hit tmonit tatuin hit olek. Mes tabug iij, In ka nlomi fa he hit tmonit on nane ntein. Es manum In nfee plenat nak, hit lo he tnao tasaitan ma tbaken fuat een le' naan, lalit atnao tatuin Ee nai. 31 In an'atol nani tabug mese, he nhukum ale' mansian anbi pah-pinan iij, natuin sin sanat sin. Ma In anlulu ma anleek nani Tuaf mese anjali In Afeek Lasij. Tuaf naan of nafeek lasij, namnees ma natai. Tabug iij, hit tahiin nok namneo-namneo Afeek Lasij naan es le' sekog. In es le' anmate nalali, mes Uisnenog namonib nafani'.”

32 Mes tabug le' abguat een naan anneen nai Paulus nak, anmu'i atoni amates anmoni nfaan, sin anmanis. Mes anmu'i tuaf abjaan anlomin he nneen ee. Sin naguab noi nai Paulus am nak, “Hai mloim fe' he mneen ho aguab een naan. Mes maut he anbi tabug mese anteni'.” 33 Lalit nai Paulus annao nasaitan balel naan. 34 Mes anmu'i tuaf fauk le' annao nabgua nokan, natuin sin anpalsain nalali noin Usif Yesus. Tuaf mese na'ko sin le' bijaas an'atol lasij anbi Areopagus, kanan nai Dionisius. Nok bifeel es, kanan bi Damaris. Ma anmu'i abjaan anteni' le' annaon nabguan nok sin.