Nai Timotius nabgua nok nai Paulus ma nai Silas
16
Lalit nai Paulus sin annaon anfinin noin koot Derbe. Lalit sin annaon anfinin noin koot Listra. Anbi naan, sin nateef nok atoni munif mese, kanan nai Timotius. In amaf, atoni Yunanis. Mes in inaf, bifee Yahudis le' npalsai nalali noi Usif Yesus. Nai Timotius anjali apalsait noi Usif Yesus amsa'. 2 Ale' apalsait een abiten koot Listra ma koot Ikonium nahinen nak nai Timotius naan, atoni alekot. 3 Nai Paulus anlomi he nai Timotius nok sin. Mes anmu'i atoni Yahudis anbin balel naan nahinen nak nai Timotius in amaf atoni Yunanis, es on naan in le' naan fe' ka maheli fa, natuin halat atoni Yahudis. Es on nane, nai Paulus naloitan ma sin anheli nai Timotius.a 4 Lalit sin annaon na'ko balel noi balel, he natoon lasi fekat le' Usif Yesus In haef een ma atoni mnasi' Kristen sin nafeek nalalij anbi Yerusalem. 5 Natuin lalan naan, sin nhatani nteni nonot apalsait een sin neek een. Nenog-nenog, nonot apalsait fe'un sin anmalolun piut.
Nai Paulus napeni hanaf he nnao noi Makedonia
6 Lalit nai Paulus sin annaon ankonon. Sin annaon noin propinsi Frigia ma propinsi Galatia, natuin Uisnenog In Asmana Knino' na'eka sin he naik annao natoon Usif Yesus In Tu'in Alekot anbi propinsi Asia. 7 Tabug sin anteen balel mese le' anmanakt een nok propinsi Misia, sin nsoobl een he ntaman noin propinsi Bitinia. Mes Usif Yesus In Asmanan na'eka' sin he naik annaon noin balel naan.b 8 Lalit sin annaon nfinin npe'o lalan le' anbi propinsi Misia, ma anteen koot Troas.
9 Faij naan, Uisnenog naklila' mnitas noi nai Paulus. In niit tuaf mese anhake anbi tasij panin, anbi propinsi mese, kanan Makedonia. Atonij naan anhunun ma ntoti mnak, “Aam! Au 'toti ko he uum moi iij, he mbaban kai, aam!” 10 Nai Paulus niit on nane, haic mifeek he mnao moi Makedonia. Hai mitenab mak, naan Uisnenog es le' anlelu kai, he amnao mitoon In Laal A'honis moi abiten tasij panin. Es on naan In an'eek kai he hai naik amnao moi balel abjaan.
Anbi koot Filipi, bi Lidia anpalsai noi Usif Yesus
11 Lalit hai msae bnao oel anbi koot Troas, he mlaak moi pulau ana' mese, kanan Samotrake. Anmiu, hai mlaak amteen ma amtee koot mese, kanan Neapolis. Hai msanu anbi naan. 12 Na'ko balel naan, hai mnao lalan meto' moi koot anaek mese, kanan Filipi. (Filipi naan mateka' anbi propinsi Makedonia, ma anaa' aplenat pah Roma msa' annaa' kuasat anbi koot naan.) Hai mitgua nenog fauk aah ambi balel naan.
13 Nateef nok neno snasat atoni Yahudis sin, hai mnao mami bale onen atoni Yahudis. Hai mitenab mak bale onen naan of et noel ee ninen. Es on nane, hai mnao mpoi kle'og mi'ko koot naan, tal amtee hai mi'eku mok noel es. Hai mi'eku mok bifee pukan mese anbi naan.d Nalalit hai mtoko ma miguab mok sin. 14 Na'ko bifeel pukan naan, anmu'i bifeel mese, kanan bi Lidia. In na'ko koot mese, le' naloog et propinsi Asia, kanan Tiatira. Bifee le' iij nasosa' tais amtaas ungu le' ma'upa', noi atoni makana'. In anmakoe anbi lasi onen noi Uisnenog. Es on naan in anneen nai Paulus in aguab een, ma in ansimo nani sin tabug naan.
15 Lalit hai mislani bi Lidia nok in umel nanan ok-oke. Mislani milali sin, in nfee haan honet noi kai mnak, “Au ama' ala ki. Kalu hi mitenab mak au 'palsai ulali 'oi Usif Yesus, hi iim moi hai umel ma mitgua mtahan mok kai.” In nfuli kai piut, tal antee hai mituin.
Sin nataam nai Paulus ma nai Silas anbi ume buij et koot Filipi
16 Neen goes, tabug hai amnao moi bale onen, hai mi'eku li'feto mese. In le' naan, atoni' in atel. Nitu le'uf mese antaman, es on naan in nabe'i antae atoni' in aguan. In nabe'i nahine atoni' in lasi na'ko uun a'ba'an amsa'. Es on naan atoni' mfaun anlomin he anfeen loit noi li'aan feto naan, ma ntotin he in antae sin aguak een. Mes aan feto naan, in anaet een es le' napeni ale' loit een naan, tal antee sin amu'ik een kah. 17 Nenog naan, tabug hai amnao, aan feto naan natuin kai piut. Ma in anhunun am nak, “Atonin le' iij, aten na'ko Uisnenog Akuasat. Sin neman he naklila' lalan, he on mee atoni' nabe'i napeni 'honis, ma nafetin sin na'ko sin saant een!”
18 Li'aan feto naan anmo'e on nane, tal antee nenog nuug am teen. Ka loog fa, nai Paulus ka nlomi he nneen anteni' fa li'aan feto naan in aguaban. Es on naan in nabaino' on ma napinab in matan noi li'aan feto naan, ma in naplenat am nak, “Hoe! Nitu le'uf! Au 'eki Usif Yesus In kuasan, ma uplenat ko, ampoi nai mu'ko li'aan feto ii, tabug ii!” Nai Paulus naguab nalali on nanet, nitu le'uf naan anpoi nani.
19 Tabug in anaet een nahinen nak, sin atel naan in matanin ma manenun naan namneku, sin namaunun, natuin sin ka napenin fa loit antenin. Lalit sin nnaa' neki nai Paulus ma nai Silas noi 'masa', le' anmu'i balel mese le' bijaas sin anpakel he nafekan lasij. 20 Anbi balel naan, sin nkoa' een nahelan am nak, “Atonin iij neman he nale'u hit koot. Sin ka na'kon fa balel ii. Sin atoni Yahudis le' neman na'kon balel aloot he anmo'en taisibug anbi iij! 21 Sin nanoni' too mfaun am nak, hit naik attoe anaa' aplenat pah Roma sin atolan, he tatuin sin atolan.”
22 Annenan on nane, too mfaun een antaisibun, ma annaon anbaan nai Paulus ma nai Silas. Es on naan atoni anakat tuaf mese anbi naan, anlelu sin anpisu nale'un nai Paulus ma nai Silas sin pakel, lalit antepo sin. 23 Sin antepo nai Paulus nok nai Silas, lalit sin nataam sin noi ume buij. Sin anleek anakaf apaot anbi naan, he anpanat atoni nua' een naan lek-leek. Naik-naika sin naenan. 24 Anneen on nanet, anakaf apaot naan nataam sin noi ke'an mese anbi ume buij naan in atnanan. Es on naan in nhapi sin haek een neki hau 'hapit.
25 Of ai' tabug fai atnanas, nai Paulus ma nai Silas an'onen een ma nsiin he nbo'is Uisnenog. Atoni hukum abjaan nokan anbi le' naan, nokan nneen sin ansiin. 26 Nok askeken, naijaan ee nabeko' naek on le' nainunus, tal antee ume buij naan ok-oke' nabeko' msa'. Ume buij naan in nesun een nasoitn ok meinua le'uf. Es on naan atoni hukum een, sin konelit futus een natsefi een ok-oke.
27 Tabug naan, anakaf apaot anbi ume buij naan, naskeke nfeen, ma in nail ume buij naan in nesun een nasoitn ok meinua le'uf. Nail on nanet, in natenab nak ai' atoni hukum een naenan nalalin. Lalit in anfaki in benas he nheo niis on. 28 Mes nai Paulus ankoa' naheel naan jon ma nakain ee mnak, “Ka ka ka, aam! Naik mheo miis om! Hai es iij fe', aam!”
29 Anneen hanaf nane, anakaf apaot naan namtau nmaat, ma in ntaka'mana' amsa'. Lalit in nlelu he neki 'nopo', es on naan in naen antaam noi ume buij naan in nanan, mes in aon ee nata'-taa' ja. Ma in nli'tuu anbi nai Paulus ma nai Silas sin haek een.
30 Es on naan in napoin sin na'kon ume buij, lalit in antoti sin am nak, “Au ama' ala ki! Au neek ee ansuus anmaat. Au he 'mo'e saa' he au ube'i ufetin ok u'ko suusl een ii?”
31 Nai Paulus sin natael am nak, “In lalan on ii: ho mpalsai moi Usif Yesus, he In ansoi nafetin ko mu'ko ho saant een naan. Ho umel nanan amsa'.” 32 Lalit nai Paulus ma nai Silas naguab nok anakaf apaot ume buij naan, ma in umel nanan ala sin. Sin natoon Usif Yesus In Laal A'honis noi sin. 33 Anfini kle'og na'ko fai atnanas naan, anakaf ume buij naan neki nai Paulus ma nai Silas he nboe ma npaloli papa' le' aafj aan sin antepo sin. Lalit sin naslani anakaf apaot naan nok in umel nanan ee ok-oke'. 34 Lalit in nok sin antaman noin in umel, ma antuthae sin. In nok in umel nanan anmaliin anmaten, natuin sin anpalsain nalalin noin Uisnenog.
35 Nok-nok ana, anaet een le' nafeek lasij, sin anfeen hanaf noi anakaf apaot ume buij, he in napoin nai Paulus ma nai Silas.
36 Anneen on nanet, anakaf ume buij naan naguab noi nai Paulus am nak, “Au ama' ala ki! Anaet een nafeek nalalin he nafetin ki. Es on nane, hi amnao nai nok ao-mina'.”
37 Anneen on naan, nai Paulus ka nsimo leko fa. Es on naan in natoon noi aan lelu tuaf mese am nak, “Naik on naan! Natuin hai mmui' hak too Romas kai. Es on naan hai mtoti hai hak! Anaa' aplenat een lo he n'atol hai lasi iij natuin atolan. In amneot, lo ttoko he t'aa' lasij fe', lalit na' tasesuk ma atlena atoni'. Mes sin ka anmo'en fa on le' naan. Sin ka ntokon fa he n'a'an lasi nahunu, he nami nahine hai saant een saa', mes sin antepon na'ba'-ba'el kai anbi too mfaun een sin maatk een. Ka tiit fa sanat saa' le' he anjali lasij, he sin nataam kai noi ume buij. Iij lo namneo-namneo, sin antanhai nalali atolan plenat pah Roma. Es on naan tabug iij, sin he napoin kai nameek-meka' na'ko ume buij, maut he atoni' naik nahinen nak, hai saant ee saa'? Ka on fa naan! Amlelu anaet een neki nok neman, he nafetin kai. Natuin lalan naan, na' hai of amsimo.”
38 Tabug aan lelu naan anfani ma natoon nai Paulus in aguab een naan, anaet een nahinen nak sin nua sin anmu'in hak toog Romas. Es on naan sin namtaun nmaten. 39 Lalit anaet een neman noi ume buij ma nmanaku' sin saant een, lalit antoti sako sanat na'ko nai Paulus ma nai Silas. Lalit sin nafetin sin nua sin, ma sin antotin he sin nua sin nasaitan koot naan. 40 Anpoin na'ko ume buij naan, nai Paulus sin annaon noi bi Lidia in umel. Anbi naan, sin nabguan nok apalsait een. Sin nanoni' sin ma nha'tani nteni sin neek een. Lalit sin annaon nasaitan koot naan.