Atoni mnasi' Kristen sin nabguan anbin Yerusalem
15
Tabug naan, anmu'i atoni Yahudis fauk le' anpalsain noin Usif Yesus neman na'kon laal aloog, na'kon propinsi Yudea noi koot Antiokia. Neem anteen on nane, sin nanoni' nonot apalsait een am nak, “Hi mpalsai moi Nai Yesus, leko amsa'. Mes naan fe' ka namtiis fa. Kalu namneo-namneo hi mlomi he hi mipeni lasi 'honis, hi lo he mhelit mituin hai halat atoni Yahudis, le' Uisnenog nekin On nahakeb nanij noi baba nai Musa.”a2 Mes nai Paulus ma nai Barnabas ansulan matani' nok atonin naan sin aguab een. Sin anmatoen nok matani'. Es on naan nai Paulus nak, “Hi msaan! Apalsait een na'ko atonij abjaan, hit naik taseke' sin he natuin hit halat maheli' na'ko atoni Yahudis!” Natuin sin nmatoen' lasij naan, es nanet sin anmalomis he anleek nai Paulus ma nai Barnabas nok atonin abjaan na'kon Antiokia, he neki lasij ii noi Usif Yesus In haef een, ma atoni mnasi Kristen abjaan abiten Yerusalem.
3 Es on nane, too slani een abiten Antiokia anleek nai Paulus sin he annaon noin Yerusalem. Sin annaon anpe'o lalan meto', nesi nokan propinsi Finisia ma propinsi Samaria. Anboni lalan atnana' on nane, sin nesin nmakison nok nonot apalsait een anbin sin umel. Lalit sin natu'in tal namnuut nak, “Atonij ka Yahudis fa msa', nabaino' sin tuak een ma npalsain noin Usif Yesus!” Annenan on nane, sin ala sin anmalinan.
4 Tabug sin anteen Yerusalem on nane, apalsait een noi Usif Yesus ansimo sin nok alekot. Usif Yesus In haef een nok atoni mnasi Kristen sin ansimo sin amsa'. Lalit nai Paulus sin natu'in ale' lasi le' Uisnenog anmo'e nalali sin noi sin, tal antee atonij abjaan namfau natuin Usif Yesus amsa'. Ma sin natu'in sin matoes anmatoom nok lasi maheli' amsa'. 5 Anbi tuaf een le' anneen nai Paulus sin tu'in, anmu'i atoni Yahudis Kristen fauk na'kon amnono Farisi. Sin anfeen anhaken ma naguab een nahelan am nak, “Amneen milek-leko', hee! Kalu nmu'i atonin abjaan le' ka atoni Yahudis fa, le' anlomi he natuin Usif Yesus, sin lo he natuin hit halat maheli', nok ale' hit atolan halat abjaan le' Uisnenog nekin on anfee nani sin noi baba nai Musa.”
6 Lalit nonot apalsait een ok-oke' anmalomis he Usif Yesus In haef een nok atoni mnasi Kristen sin, nabguan he ntai nalek-leko' lasij naan. 7 Lalit sin anmafeen een penit ma tenab nuu-mneem. Namuni te, nai Petrus anfeen anhake ma naguab am nak, “Au aok-abjaan ala ki! Hi mihine milali mak, nahunut, Uisnenog anbeti nani kau na'ko kit, he au 'nao 'etun Usif Yesus In Tu'in Alekot noi atonij abjaan le' ka atoni Yahudis fa, natuin Uisnenog anlomi msa' he sin anpalsain noin Usif Yesus.b 8 Uisnenog nahine nalek-leko' hit mansian hit nekak mese-mese. Ma In es anfee In Asmana Knino' noi sin amsa', namnees on le' In anfee nalalij noi kit. Nok lalan naan, hit tahine tak Uisnenog ansimo sin amsa'.c 9 Uisnenog ka npili fa humaf, sin ai' hit. Ma In ka nbetis fa sin na'ko kit. Natuin In naknino' sin nekak een, fun sin anpalsain nalalin noin Usif Yesus amsa', namnees on le' In naknino' nani hit nekak.
10-11 Es on naan, on mee? Kalu Uisnenog ansimo nalali sin, nansaa' am es hit he tasaeb atteni' sin 'baut mafena' teki halat mahelit naan? Fun kaha, kalu hit taguab namneo-namneo, hit tok hit babaf sin, ka tasae tabe'i fa hit atolan lasi palsait een ok-oke'! Es on naan hit naik taseke' sin on le' naan! Au he 'toti on ii: Uisnenog ansoi nafetin kit, natuin hit tatuin atolan lasi palsait een, ai' kaha? Kahaf, ai'! In ansoi nafetin kit, natuin Usif Yesus anneek ma nkasian kit. Es on nanet, naika amniken! Uisnenog anneek ma nkasian atonin abjaan amsa' on le' naan.”
12 Annenan on nanet, ka tiit fa es anteni' le' he naguab napoin in penit ma tenab.
Lalit nai Paulus ma nai Barnabas natu'in nafani', anmo'e on meel am es na' Uisnenog anpake sin. Sin natu'in lasi sanmaakt een le' Uisnenog anmo'e nalali sin anbi atonij abjaan le' ka atoni Yahudis fa. 13 Natu'in nalalin on nanet, tuaf mese, kanan nai Yakobus, anfeen anhaak, ma naguab am nak, “Au aok-abjaan ala ki! Hi mneen kau fe'! 14 Hit tata' nai Petrusd fe' natu'in nalali kit am nak, Uisnenog naiti nalali atonij abjaan le' ka atoni Yahudis sin fa, he nataam anjalin Usif Yesus In nonot apalsait een. 15 Es on naan, lasij naan namnees nok saa' le' Uisnenog In mafefa knino' een natoon nanij anbi faijan unun. Sin anluul nani mnak:
16 ‘Nateef nok in tabug antee, Au of a'fani 'uum.
Natuin Au he uhakeb ufani' kesel nai Daut in aplenat.
Fun in sufan-ka'un een le' namle'un nalalin naan,
Au of ufena' ufani' sin, ma 'ha'tani sin.
17-18 Nok 'mo'et naan, toog na'ko pah abjaan amsa', neem namin he nateef nok Kau.
Natuin Au 'pili 'ani sin he anjalin Au nuug.
Fun Uisnenog naguab nalali on naan na'ko faijan unun!’e
19-20 Es on naan anbi au tenab, on ii: kalu tuaf abjaan na'ko uuf abjaan le' anlomin he natuin Uisnenog, hit atoni Yahudis naika tasusab sin. Hit naika taloib sin mafena' anteni nok he tlelu sin he natuin hit halat maheli'. Es on naan hit lo he tluul taan sulat mese ma tsonu ee noi sin tak, sin naik natuin hit atolan halat Yahudi sin ok-oke'. Hit tamnauba' sin msa' tak, sin naik anmakaken ma anmapaisa' kalu ka feel-monel fa. Sin naik anbukaen amnaah fuat. Sin naik anbukaen naa' na'ko mu'it. Ma sin naik nekun sisijl na'ko mu'it le' tuaf anfutug ma nak'aal nisan, tal in naa' ee ka nsai anpoi fa.f 21 Es on naan kalu hit attao atolan nahuum on le' ii, ka lasi fe'ug fa ntein. Natuin too mfaun een nahinen nalalin nak, atoni Yahudis hit atolan halat lo on le' naan. Fun atolan naan na'ko baba nai Musa sin, hit attae sin ok-oke' anbi ume onen, tabug neno snasat et balel meel am meel. Es on naan atonij abjaan amfaun een nahinen nalalin.
Au aguab iij antuu' on le' naan!”
Sulat noi apalsait een le' ka atoni Yahudis fa
22 Lalit Uisnenog In haef een nok atoni mnasi' abjaan anmalomis he anleek tuaf he annaon natonan sin lasi fekat naan noi nonot apalsait anbi meel am meel. Ma sin namin tuaf-tuaf le' nonot apalsait een antola sin, le' namnees nok mepug naan. Lalit sin anpili naan tuaf nuug. Es kanan nai Silas; es anteni' kanan nai Yudas (le' sin anteek nanij nak, nai Barsabas). Lalit sin nlelu sin nua sin annaon nabguan nok nai Paulus ma nai Barnabas. 23 Sin neki sulat he anfeel ee noi apalsait een le' ka atoni Yahudis fa abiten koot Antiokia et propinsi Siria, anfini nteni tal antee propinsi Kilikia. Sulat naan, in nesan nak on ii:
“Tabe ma haan alekot na'ko kai, Usif Yesus In haef een, ma atoni mnasi' abjaan anteni' abiten koot Yerusalem. Hai mluul sulat le' iij noi ki, natuin hai amneek maan ki, nahuum on le' hai oli' ma hai tata' sin.
24 Hai mluul sulat le' iij, natuin hai mnenat nak, anmu'i tuaf-tuaf na'ko Yerusalem iij, le' neitin ma nateef nok ki anbi naan. Sin nanoni' ki lafgua-lafuk, tal antee nasusab ma ntaka'manab ki. Maut he hi mihine mak, hai ka amleek miit fa tuaf een le' naan. 25 Tabug hai mneen mak anmu'i tuaf le' nasusab ki on le' naa, hai mibgua anbi iij, ma hai mtai lasij naan. Es on naan, hai mmalomis milali ma mifeek milali lasij naan. Tabug iij, hai mbeti tuaf-tuaf he neman ma natoon ki hai lasi fekat naan. Sin neem nabguan nok nai Barnabas ma nai Paulus, le' hai amneek sin. 26 Tuaf nua' een le' naan ansutain ha'mu'it, tal antee aal akle'og sin anmaten. Sin napenin ha'mu'it on le' naan, fun sin natuin Usif Yesus, Tuaf le' Uisnenog anpili nanij na'ko unu'. 27 Es on naan hai amleek nai Yudas ma nai Silas, maut he sin es le' natu'in ki sulat le' iij in nesan.
28 Uisnenog In Asmana Knino' natoon nalali kai, ma hai mloim mituin on naan amsa' nak, hi naik mituin hai halat Yahudi ok-oke', on le' halat maheli' naan. Natuin halat huma' le' naan, anha'fenab hi aom een naan luum am palsuum sona. Mes anmu'i lasij abjaan, le' lo he hi mimnau sin:
29 Naik amkake ma mapaisa' kalu ka feel-monel fa.
Naik meku sisi fuat.
Naik meku naa'.
Ma naik meku sisij na'ko mu'it le' anfutu niis on.
Kalu hi mibe'i mpanat hi aom een na'ko lasin naan, hi ka meki fa hai'nisit moi hi aom-abjaan nonot apalsait atoni Yahudis Kristen sin. Nok lasij nane, hi mibe'i mibgua leko mok sin. Hai sulat le' iij, antuu' on le' naan.”
30 Sin ntoupu nalali sulat nanet, nai Paulus sin naseon een, ma annaon anfinin noi koot Antiokia. Anteen balel naan, sin no'en nabguab nonot apalsait een, ma anfeen sin sulat naan. 31 Tabug sin ntae nalali sulat naan, sin ala sin anmalinan nmaten, natuin sulat naan in nesan anha'tani sin neek een.
32 Uisnenog anpake nai Yudas ma nai Silas amsa', anjalin In mafefa knino'. Sin nua sin natu'in ale' lasi tu'in amfaun noi nonot apalsait een anbi koot naan. Sin nfaineek ma nahelan nonot apalsait een sin neek een. 33 Sin nua sin natguan aloog anbi balel naan, lalit nonot apalsait een abiten Antiokia naseon sin he nfanin noi Yerusalem noi nonot apalsait le' anleek sin neman. Sin naseon sin nok neek malinat. 34 [Mes nai Silas annaben, nalekot kalu in natgua nabala anbi Antiokia.]g
35 Nai Paulus ma nai Barnabas natguan mas aloog anbi balel naan. Sin anbaab amnono sin amsa' le' nanoni' Usif Yesus In Laal A'honis.
Nai Paulus ma nai Barnabas anbatis ok
36 Tabug nai Paulus ma nai Barnabas natguan mas aloog anbi Antiokia, nai Paulus nak noi nai Barnabas am nak, “Ba'e! Uum he hit atfani toi balel-balel le' nahunut hit attaam tesi tok sin. Hit tnao he tail tiit hit aok-abjaan sin amonik een. Ka tahine he sin on mee. Fun tuaf een le' naan, fe' anpalsain noi Usif Yesus ka aloog fa fe'. Neen goes, hit tanoni' sin. Es on naan uum he hit tnao tail tiit sin.” 37 Anneen nai Paulus naguab on nanet, nai Barnabas anlomi natuin.
Nai Barnabas anlomi he nai Yohanis nok sin. (Teef es sin anteek nai Yohanis iij nak, nai Markus amsa'). 38 Mes nai Paulus ka nlomi. Natuin neon ges, tabug sin anbi propinsi Pamfilia, nai Markus annao nasaitan sin.h 39 Nai Paulus nok nai Barnabas nasulin anaek, tal antee sin nua sin anbatis ok. Es on naan nai Barnabas neki nai Markus, sin nua sin ansaen abnao oel ma annaon anteen pulau Siprus.
40 Mes nai Paulus nok nai Silas. Tabug sin he annaon, nonot apalsait een abiten Antiokia an'onen antoti Uisnenog he anpanat sin, ma Uisnenog naklila' In nekan alekot noi sin amsa'. An'onen een nalalin, sin nua sin annaon. 41 Lalit sin annaon noi propinsi Siria ma propinsi Kilikia anfuun am nateef. Anbi balel meel am meel, sin nha'tani nonot apalsait een sin neek een.