Nai Paulus ma nai Barnabas anbin koot Ikonium
14
Tabug nai Paulus nok nai Barnabas anteen koot Ikonium, sin antaman anbin atoni Yahudis sin ume onen. Anbi naan, sin naguab een lasi namfau anmatoom nok Uisnenog In Tu'in Alekot, tal antee atoni Yahudis ma atonij abjaan anpalsain noi Usif Yesus. 2 Mes anbi naan, anmu'i atoni Yahudis abjaan le' nnaa' nahelan sin atolan halat, ma sin ka nlomin fa he nsimo nai Paulus sin aguab een. Sin es le' nakoke' atonij abjaan namfau he namaunun niis nonot apalsait een noi Usif Yesus. 3 Mes nai Paulus sin ka namtaun fa. Sin natonan piut-piut Usif Yesus In Tu'in Alekot noi sekom-sekog. Sin natonan am nak, Usif Yesus In nekan naan nasoitn On noi sekom-sekog. In anfee kuasat he sin nabe'i anmo'en lasi sanmakat huma'-huma' msa', he too mfaun een nahinen am nak, Uisnenog anpake sin.Tabug naan, nai Paulus sin natguan aloog anbi koot naan. 4 Lalit abiten koot naan anbatis ok pukan nuug. Pukan mese natuin atoni Yahudis le' nnaa' nahelan sin atolan halat fe', ma pukan es anteni' anpesi nok Usif Yesus In haef een. Pukan nuug een le' naan, anmatoen es nok es.
5 Ma atoni Yahudis abjaan le' nnaa' nahelan sin atolan halat fe', sin nabguan ma namin lalan nok atonij abjaan ma nok sin anaakf een, he nasusab Usif Yesus In haef een. Sin he npoli nai Paulus sin neki fatug. 6 Mes tuaf abjaan natonan nai Paulus sin am nak, anmu'i atoni' pukan mese, le' nateenb een amle'ut noi sin. Es on naan sin naenan ma nakolo een anbin propinsi Likonia, anbin koot Listra, ma koot Derbe, ma kuan-kuan anfuun ma nateef anbi naan. 7 Anbin balen naan, sin anmulai natoon Usif Yesus In Tu'in Alekot.
Nai Paulus sin anbin koot Listra ma koot Derbe
8 Anteen koot Listra on nanet, nai Paulus nok nai Barnabas nateef nok atonij mese. In ao a'olet nani tabug in inaf nahonis. 9 Atoni' naan antoko ma anneen nai Paulus in tu'in. Lalit nai Paulus nail natesan, ma natenab am nak, “Atoni' iij in palsain ee, lo of naleko' in tuan!” 10 Es on naan nai Paulus anhaman atoni' naan am nak, “Ba'e! Amfeen amhake nai!” Anneen on nanet, in an'ookl on anfeen anhake ma annao nani.
11 Tabug sin niit nai Paulus anmo'e lasij nane, sin ansanmakan. Es on naan sin naguab een neki sin aguab Likonia mnak, “Hi mneen fe'! Atoni nua' een le' iij, pah ee tuan. Sin neman na'kon neno tunan ma nabain ok on le' mansian!” 12 Sin naguab een on naan, natuin sin natenab am nak nai Barnabas naan, nahuum on le' sin pah tuaf mese, kanan nai Seus. Ma nai Paulus, atoni aguab naan, sin nak ai' namnees nok pah tuaf mese, kanan nai Hermes.a 13 Anbi koot naan in kotin, anmu'i ume fuat mese noi sin pah tuaf nai Seus. Sin niit nai Paulus sin on nane, amneki fua-'tulu na'ko nai Seus neki hau sufa' namfau ma anheel neki bijae keso naek fauk, he natulu' sin noi nai Paulus sin. Es on naan too mfaun een naan annaon natuin amneki fua 'tulu naan he natulu' noi Usif Yesus In haef een.
14 Mes tabug sin nahinen nak atoni mfaun een naan he nfua noi sin, nai Paulus nok nai Barnabas ka nlomin fa. Lalit sin naenan noi too mfaun naan sin maatk een, ma sin anpisu nale'u sin soo balug. Naan anfani taka nak, sin ka nlomin fa saa' le' too mfaun een anmo'el naan. Lalit sin nua sin anhunun een am nak, 15 “Koijoo! Nansaa' am es hi mmo'e lasi iij? Naik hi mitenab am mak hai le' iij pah ee tuan. Hai le' iij, mansian amsa' on le' hi. Hai iim moi balel iij, he mitoon ki tu'in alekot. Hi lo he mkoti ale' hi pah tuaf een naan le' ka ma'upa een fa. Hi lo he mituin Uisneno 'Honis amneot. Natuin In es le' nmo'e neno tunan ma pah-pinan, nok in nesan ok-oke'.b 16 Faijan unun ale' uuf ma pah sin nmonin natuin sin alomik een mese-mese. Uisnenog ankolen sin on nane msa'. 17 Mes Uisnenog ka anniken fa he anfeen sin taka huma'-huma', he sin nahinen am nak, Uisnenog naan, Alekot kuun. In es le' nasanut ulan neem noi kit ok-oke'. In es le' anfee pena'-anel noi kit. In es le' anhao kit, ma anhalinab hit nekak.”
18 Maski nai Paulus ma nai Barnabas antaal sin he naik anmo'en on le' naan, mes atonin naan naseke ok he nekin fuat he anfee sin noi sin.
19 Tabug naan, anmu'i atoni Yahudis fauk le' neman na'kon koot Antiokia ma koot Ikonium, sin neman noin koot Listra. Sin nakoke' too mfaun een he anlaban Usif Yesus In haef een. Es on naan sin naiti fatug ma npoli nai Paulus. Sin nak ai' nai Paulus anmate nlaal jen. Es on naan sin anheel nai Paulus he anpolin noi koot naan in kotin.
20 Mes tabug nonot apalsait noi Usif Yesus sin anhake ma nauban nai Paulus on nanet, in anfeen. Lalit in antaam anfani noi koot naan. Anmiu on nanet, in nok nai Barnabas annaon nfinin noi koot mese anteni', kanan Derbe.
Nai Paulus ma nai Barnabas anfani nteni noin koot Antiokia et propinsi Siria
21 Nai Paulus ma nai Barnabas natoon Usif Yesus In Tu'in Alekot anbi koot Derbe msa'. Lalit too mfaun een anpalsain noin Usif Yesus. Lalit sin nua sin anfani ntenin noin koot Listra. Na'ko balel naan, sin anfanin noin koot Ikonium. Na'ko naan, sin annaon nfinin noin Antiokia et propinsi Pisidia. 22 Anbi balel naan, sin naguab een nok atonin le' natuin Usif Yesus he nha'tani sin neek een. Sin namnauba sin am nak, “Hai aom-abjaan ala ki! Kalu hit attaam atjali Uisnenog Inin naik mitenab mak hit of ka nuug fa he tapeni susal ma ha'mu'it anteni. Natuin maski on meel amsa', hit lo he tapeni ha'mu'it. Mes hit lo he attahan ma talan, he tatuin Usif Yesus piut.” Sin nua sin nanoni' lasij naan noin atuin Usif Yesus anbin koot naan.
23 Lalit nai Paulus ma nai Barnabas namin tuaf he naiti sin anjalin anakafc noi too slani pukan mese-mese. Ma sin an'onen een ma nanaah ok he nahine Uisnenog In alomin. Nalalit sin antao sin animak ma an'onen, he naiti tuaf le' Uisnenog anlulu sin he anjalin anakaf noi apalsait een.
24 Lalit nai Paulus ma nai Barnabas sin annaon nasaitan propinsi Pisidia, he annaon noi propinsi Pamfilia. 25 Sin anteen koot mese, kanan Perga. Anbi naan, sin natoon Usif Yesus In Tu'in Alekot. Lalit sin annao nfinin. Ka loog fa, sin anteen koot Atalia. 26 Na'ko balel naan, sin ansaen abnao oel ma nfanin noin koot Antokia et propinsi Siria. Nenog mese nonot apalsait noi Usif Yesus abiten koot Antiokia es le anleek sin, ma nana'at sin noi Uisnenog In animan, he In anpanat sin. Es on naan tabug iij, nai Paulus sin anfanin, he natonan noi nonot apalsait abiten Antiokia nak, sin nasopu nalali sin mepun naan.
27 Anteen Antiokia on nane, nai Paulus sin nabguab Usif Yesus In apalsait een abiten naan. Ma sin natoon ale' kanan lasij le' Uisnenog anmo'e nalali noi sin. Nak, Uisnenog nfai nalali lalan noi atonij abjaan le' ka atoni Yahudis fa, he sin anpalsain noin Usif Yesus amsa'. 28 Lalit nai Paulus ma nai Barnabas natguan suuk aloog nok nonot apalsait noin Usif Yesus anbin balel naa.