2 Tabug mese, sin nanaah ok, ma sin nabguan ma nabesan noin Uisnenog. Lalit Asmana Knino' natoon noi sin am nak, “Ampili maan nai Barnabas nok nai Saulus. Fun Au mepug sin namfau. Es on naan sin lo he naiti mepug le' Au he una'at noi sin.”

3 Tabug sin nanaah nalalin ma an'onen een nalalin on nanet, sin antao sin aniimk een noi nai Barnabas ma nai Saulus, he ntabis sin. Es on naan sin anleek sin nua sin, he nanaoba' Uisnenog In mepug.

4-5 Tabug Uisnenog In Asmana Knino' naplenat nai Barnabas ma nai Saulus he nua sin annaon natoon In A'an ma Plenat noi balel-balel, sin annao nahunun noin koot mese et tasij ninen, kanan Seleukia. Nai Yohanis (le' sin anteke msa' nak, nai Markus) nnao nabgua nok sin. Anteen balel naan, sin ansaen abnao oel he annaon noin pulau Siprus. Anteen Siprus, sin ansanun anbin koot mese, kanan Salamis. Anbin koot naan, sin antaman anbin atoni Yahudis sin ume onen tenij-tenij he nanoni' Uisnenog In A'an ma Plenat noi abiten naan.

6-8 Lalit sin npoi-ntaman na'kon kuan es noi kuan es, tal sin neman anteen koot mese et pulau naan in tukan abjaan, le' anteke te nak, Pafos. Gubernur ee natgua et koot naan. In kanan nai Sergius Paulus. In lolen na'aik. Tabug in anneen nak nai Barnabas sin neman nalalin etan koot naan, in anleek tuaf he no'en sin, natuin in anmaliin he anneen fainekat na'ko Uisnenog.

Mes anbi naan, anmu'i atoni Yahudis mese, kanan nai Bar Yesus (in kanan es anteni' le' neki aguab Yunani nak, ‘Elimas’). In atoni alaut. In bijaas namoe atoni' nak, in anjali Uisnenog In mafefa' amsa'. In namnono leko nok gubernur naan. Es on naan tabug nai Barnabas sin neman, in nfuli gubernur naan he naik ansimo sin. In nsobal he naseni gubernur naan, he naik anpalsai noi Nai Yesus.

9 Mes Uisnenog In Asmana Knino' anfee kuasat noi nai Saulus (le' sin anteke msa' nai Paulus). Es on nane, in napinab in matan afguan noi alaut naan. Lalit in naguab am nak, 10 “Hoe! Elimas! Ho on le' nitu le'uf! Ho moel manenu! Ho he mumoe tal antee mee? Ho mlaban ale' kanan lasi alekot. Es on nane, hai mihine milali, ho mutuin nitu le'uf een sin anakaf. Naik ammo'e mteni' nai! Naik mu'eka' lalan Uisnenog le' amneot naan! 11 Ho mneen, fe'! Uisnenog of anhukum ko. Ho of amfool, ma ho of ka miit fa saa'-saa', tal nenog fauk anfiin.”

Nai Paulus naguab nalali on nanet, atonij naan anfolo nani. Es on naan in an'abapoe lalan he nami tuaf he nnaa' in animan, he anheel nekij.

12 Tabug gubernur naan niit neki in matan afguan, ma nneen neki in luken, lasi-noni' na'ko nai Barnabas sin anmatoom nok Nai Yesus, in ansanmaak, lalit in anpalsai noi Usif Yesus.

13 Nai Paulus sin ansaen abnao oel na'ko koot Pafos et pulau Siprus, he annaon noi koot mese et propinsi Pamfilia, le' anteek nak, Perga. Anteen balel nanet, sin ansanun na'ko abnao oel, lalit nai Yohanis Markus anbatis on nok sin he in anbelok anfani noi Yerusalem. 14 Na'kon Perga, sin annaon lalan meto' noi koot Antiokia et propinsi Pisidia.

Sin anteen koot naan. Lalit, na'eku nok atoni Yahudis sin neno snasat, sin nokan an'onen een anbin atoni Yahudis sin ume onen. 15 Tabug naan, sin antae na'ko baba nai Musa in sulat, ma na'ko Uisnenog In mafefa knino' abjaan sin sulat een. Lalit anakaf ume onen sin antoti nai Paulus sin am nak, “Au ama' ala ki! Kalu hi mmu'i aguab saa' noi kai, hai mtoti he miguab moi kai, he mha'tani hai neekm een.”

16 Lalit nai Paulus anhake anbi sin maatk een. In na'aiti in animan ma antoti sin he ntaininen. Lalit in naguab am nak, “Au aok-abjaan ala ki, toog Israel! Ma inaf-amaf sin le' amtaam moi lasi palsait Yahudi, natuin hi neekm een naan namnau niis too Israel sin Uisnenog. Au 'toti ki he mtaha' hi lukem een ma mneen kau!

17 Uisnenog anpili ma anbeti nalali hit babaf toog Israel na'ko faijan unun. Tabug sin annaon natguan anbin pah Masir, le' ka sin pah ee fa, Uisnenog anfeen sin tetus ma ao-mina', tal antee sin nasufan ma ansaatg ok. Lalit Uisnenog anpake In kuasan ma neki sin anpoin na'kon pah Masir.^c 18 Lalit sin annaon na'kon balel mese noin balel abjaan, tal antee toon bo' haa. Maski sin nanaak-fatun, mes Uisnenog natuku sin nok neek sabaar.^d 19 Lalit Uisnenog annose naneku nani toog pah hiit anbi pah Kana'an. Es on naan In anbati naijaan pah naan noi hit babaf sin, he anjali sin naijaan pusaak.^e 20 Sin anmoni on naan, tal antee toon natun haa mbo' niim (450).

Lalit Uisnenog naiti anfeen sin afeek lasi tuaf namfau, he nanaak sin, tal antee Uisnenog anbetis anfeen sin In mafefa knino mese, kanan nai Samuel.^f 21 Tabug nai Samuel anjali Uisnenog In mafefa knino', hit babaf sin anlomin he nmu'in kuuk kesel. Es on nane, Uisnenog anbeti anfeen sin nai Kisi in anah, es le' nai Saul, na'ko uuf nai Benyamin. Nai Saul anjali kesel ma naplenat tal toon bo' haa.^g 22 Lalit Uisnenog nasanut. Ma In naiti nai Isai in aanh es, kanan nai Daut, he anjali kesel fe'ug, anseek nai Saul. Uisnenog nahine nalek-leko' nai Daut in nekan, es on nane, In naguab am nak, ‘Nai Isai in anah nai Daut le' iij, in nekan he noi namnees nok Au nekak. In of anmo'e natuin ale' Au lomik een ok-oke.’^h 23 Tabug naan, Uisnenog anpaa' nak In of anfee tuaf mese na'ko nai Daut in sufan-ka'un, he ansoi nafetin toog Israel na'kon sin sanat ma penu sin. Au he utoon ki 'ak, nai Daut in sufan le' Uisnenog anpaa' nanij naan, es le' Nai Yesus.”

24 Nai Paulus anluut anteni in aguaban am nak, “Tabug Usif Yesus ka naiti In mepug fa fe', tuaf mese, kanan nai Yohanis, annao natoon noi toog Israel sin, nak sin lo he na'piis na'ko sin sanat ma penu sin, lalit sin lo he naslanin he anjali taka nak, sin naleko anfanin nok Uisnenog.ⁱ 25 Tabug nai Yohanis in mepug sin he noi namsoup, in natoon am nak, ‘Hi naik mitenab mak, au le iij Tuaf le' Uisnenog anpaa' he anleek Ee neem. Mimnau milek-leko'! Hi lo he ampao Tuaf mese, le' of In he neem. In matani' nnesi na'ko kau, tal antee au ka 'taam fa so'it, maski ala au 'jali In aan leka, fun au ka umnees fa okan.’^{j k}

26 Au aok-abjaan ala ki! Hi le' baba nai Abraham in sufan, ma tuaf abjaan le' hi neekm een namnau Uisnenog. Amneen kau fe'! Uisnenog natoon lasi iij noi kit, he hit tahiin In Laal A'honis. In ansoi nafetin kit ma ansako nani hit sanat sin. 27 Na'ko faijan unun, Uisnenog anpake In mafefa knino' een, he anluul natoon lasi anmatoom nok Tuaf le' Uisnenog anpaa' he anleek Ee neem. Es on naan hit anaak lasi palsait Yahudi sin anaakf een, nok atonij abjaan anteni' abiten Yerusalem, antae nafan-fani' luult een na'kon mafefa knino' een. Anbi neno snasat, sin antaman noin ume onen, he sin antae lasin naan anbin Uisnenog In Sula Knino'.

Mes sin ka nahinen fa nak Tuaf le' Uisnenog anpaa' he anleek Ee neem naan, es le' Nai Yesus. Lalit sin namin lalan he nhukum namatel. Mes lasij naan, nanokab manpaa' le' Uisnenog In mafefa knino' een anluul nani sin. 28 Sin anmo'en lasi huma'-huma' noi Nai Yesus he nakleo nanofug, mes sin ka niit fa In sanat saa'-saa'. Maski on naan, mes sin annaon noi gubernur Pilatus ma antotin he nlolo namatel.^l 29 Gubernur naan anlomi natuin sin. Es on naan sin ankuus nakfilit Nai Yesus anbi hau nehe, tal In anmaat. Mes ale' lasin naan, ka nasuli fa nok ale' saa' le' mafefa knino' een sin anluul nanij. Lalit sin nasanut In aon na'ko hau nehe in tunan, sin naskau nekij ma natunug anbi opu fatug.^m 30 Mes Uisnenog anpake In kuasan, ma namonib nafani' Nai Yesus na'ko In amaten.

31 Tabug Nai Yesus anmoni nfaan, In naklila On tenij-tenij noi tuaf namfau. Sin es le' neman nabgua nok Ne na'kon propinsi Galilea noin Yerusalem. Ma tabug iij, sin es le' ansaksii ma natoon noi too Israel sin ok-oke'.”ⁿ

32-33 Nai Paulus anluut in aguaban naan am nak, “On ii! Hai nua kai le' iij, au 'ok nai Barnabas, iim mi'ko laal aloog, he mitoon ki mak, saa' le' Uisnenog anpaa' noi hit babaf sin, tabug iij, nanookb on een. Uisnenog namonib nafani' Nai Yesus na'ko In amaten. Anbi Sulat Pules-Bo'is bata' nuug, Uisnenog anpake tuaf he anluul lasin le' anmatoom nok Nai Yesus, le' Uisnenog anpaa' he anleek Ee neem. In anluul am nak,

34 Na'ko faijan unun Uisnenog anpaa' nalali nak, In of namonib nafani' Tuaf le' In anpaa' he anleek Ee neem naan, ma Tuaf naan of ka nmate nteni fa. Es on nane, Uisnenog anpake In mafefa knino' he anluul am nak,

35 Anmu'i nteni Sulat Pules-Bo'is abjaan le' anluul am nak,

36-37 In amneot, on ii: Sulat Pules-Bo'is le' iij, ka anlulu fa noi nai Daut kuun! Hit tahini on naan, natuin kesel nai Daut anmo'e nalali lasi leko namfau noi in toog, lalit in anmaat. Ma sin ansuub in aon-ta'un naan. In aon naan, anpunu nalaal je. Es on naan hit tahine tak Sulat Pules-Bo'is naan ka nlulu fa noi nai Daut, mes anlulu atonij abjaan. Kalu Atonij le' anlulug naan anmaat, Uisnenog namonib nafani'. Es on nane, In aon-ta'un naan, of ka anpunu niit fa.

38-39 Es on naan au aok-abjaan ala ki, amneen milek-leko'! Atonij naan, es le' Nai Yesus! Kalu hit atpalsai toi Ne, In of nasae ale' sanat, le' in amneot hit es le' he tasae kuuk sin. Natuin lalan naan, Uisnenog annose nani ale' hit saant een ok-oke'. Mes hit tahine talali msa', tak maski hit atmo'e tatuin baba nai Musa in atolan halat een ok-oke' on nane msa', ka nuug aa fa he namneob kit anbi Uisnenog In human ma In matan. 40-41 Es on naan hi lo he mitenab milek-leko'. Naik-naika saa' le' Uisnenog In mafefa knino' een sin natoon nanij et faijan unun naan, antoom anfani noi ki. Sin anluul am nak,

Es on naan au aok-abjaan ala ki. Mitenab milek-leko' saa' le' lelon au utoon ki naa. Naik ampolin mani saa' le' lelon fe' hi mneen milalij, on le' tuaf-tuaf a'akan sin a'moe'k een. Au 'guab een tuk-tuka' ma pal-pala' on le' naan. Makasi.”

42 Naguab nalali on nanet, nai Paulus ma nai Barnabas anfeen anhaken he annaon nasaitan ume onen naan. Mes abiten naan antoti, he naleko te, sin anfani neman anbi neno snasat amnemat, he naknutu' anteni saa' le' lelon sin naguab nalalij. 43 Tabug sin anpoin na'kon ume onen naan, anmu'i tuaf namfau anbi balel naan, le' annaon natuin nai Paulus ma nai Barnabas. Ma sin nua sin anfaineek sin am nak, “Hit tahiin tak Uisnenog In nekan lekon kah noi kit. Es on nane, hi lo he mnaa' mihelan Uisnenog In manekan naan.”

44 Nateef nok atoni Yahudis sin neno snasat amnemat, aal a'kle'og te abiten koot naan anpoin ok-oke' he nneen Uisnenog In A'an ma Plenat. 45 Mes tabug atoni Yahudis sin anaet een niit too mfaun een neman he nneen nai Paulus sin aguab een, sin neek een namenan. Lalit tabug nai Paulus naguab, sin nlaban maat-folo ma lukek-kosog aah, ma sin naguab een he nanofu sin.

46 Mes nai Paulus sin ka nteetk ok fa, ma sin naguab een maat-maat. Sin naguab een am nak, “Namneo! Uisnenog anfai lalan nahunu noi hit atoni Yahudis, ma nfee kit Tu'in Alekot. Ma teeb lo he on le' naan! Mes hi ka msimog fa. Es nanet, hi ka maso'it fa he mmoni piut mok Uisnenog. Es on naan tabug iij, hai he meki Tu'in Alekot naan noi uuf ma pah abjaan antein, natuin hi mtita' manij. 47 Fun Uisnenog anleek haef kai, nahuum on le' baba Nai Yesaya anluul nanij am nak,

48 Tabug atonij abjaan sin annenan on nanet, sin anmaliin anmaten. Ma sin bo'is Uisnenog am nak, “Hai mbo'is Uisnenog! Uisnenog In Tu'in Alekot naan, lekon kah!” Anbi naan, anmu'i tuaf-tuaf le' Uisnenog nafeek nalali et faijan unun, he sin nmonin nabal-balan nok Uisnenog. Ma sin ok-oke' anpalsain noin Usif Yesus.

49 Uisnenog In A'an ma Plenat nabenob On, na'ko tuaf noi tuaf anbi pah naan anfuun am nateef.

50 Anbi koot naan, anmu'i atoni makana', bifeel ma atonij. Abjaan sin anneek ma namnau Uisnenog. Mes atoni Yahudis sin anaet een neman ma antaon sin aguab, tal antee atoni makaan een naan anli'u napoitan nai Paulus nok nai Barnabas na'ko sin pah naan. 51 Tabug sin anpoin na'ko koot naan, sin nua sin naiti naan 'mo'et es natuin halat. 'Mo'et naan es le' ntekal askuku na'ko sin haek een, anjali 'takaf mese nak, abiten koot naan ka nlomin fa he natninan Uisnenog In Tu'in Alekot le' sin nua sin natoon ee naan. Lalit sin annaon nasaitan koot naan. Es on naan sin annaon noin koot es anteni', kanan Ikonium.^t

52 Mes apalsait een noin Usif Yesus abiten Antiokia, sin neek een anmalinan, natuin Uisnenog In Asmana Knino' neki 'be'if ma matanif noi sin neek een.