Nai Yakobus in amaten, ma nai Petrus antaam ume buij
12
Tabug naan, kesel nai Herodesa Anmulai nhamu'i Usif Yesus In apalsait een abjaan. 2 In naplenat tuaf he nlolo na'mate nai Yakobus neki suni'. Nai Yakobus naan, nai Yohanis in tataf. 3 Tabug nai Herodes nahine nak nai Yakobus in amaten anhalinab anaet Yahudi sin neek een, in anmo'e nnesi na'ko naan. Es on naan nateef nok neno naek le' sin anteek nanij nak, Fesek Utunu' le' ka Maselo Lalu Taif fa,b in naplenat tuaf he annaon anheke naan nai Petrus. 4 Anheke nalalij on nanet, sin nataam ee anbi ume buij. Lalit sin anlulu naan solalus pukan haa, he nmasekan anbi faij ma manas, he naloitan ma anpao nai Petrus. Solalus pukan mese te, tuaf haa. Nai Herodes anlomi he nafeek nai Petrus in lasij anbi too mfaun een sin humak ma sin matak, tabug fesek naan namsoup.c 5 Es on naan tabug sin nataam nai Petrus anbi ume buij, Usif Yesus In apalsait een an'onen een piut-piut, antotin he Uisnenog anpanat nai Petrus.Uisnenog napoitan nai Petrus na'ko ume buij
6 Anmiu on nanet, kesel nai Herodes he nafeek nai Petrus in lasi anbi too mfaun een sin humak ma sin matak. Mes faij naan, sin anfutu nai Petrus neki konelit nono' nuug anbi ume buij in nanan. Lalit in antuup anbi solalus nuug sin atnaank een. Solalus abjaan anteni' anhaken ma npaon anbi nesug in matan.
7 Nok askeken, Uisnenog In ahaket mese neem na'ko sonaf neno tunan ma anhake anbi naan. Lalit ke'an naan anmiu sine' nfiin. Lalit ahaket naan anpoo' nafena' nai Petrus am nak, “Pe'u! Amfeen nai!” Tabug naan amsa', konelit naan natsefi' nani na'ko nai Petrus in animan. 8 Lalit ahaket sonaf neno tunan naan anlelug am nak, “Ampake ho soo balug! Ampake ho 'peni haef een!” Nai Petrus anpake nalali on nanet, ahaket naan anlelu nteni mnak, “Ampake ho soo balu mnanu kotif, ma uum he mutuin kau nai!”
9 Es on naan nai Petrus natuin ahaket naan anpoin na'kon ume buij. Mes nai Petrus natenab nak, ai' in ala nasmaan. Fun kaah fat, naan lo anjali teeb. 10 Tabug sin annaon nasopu bale paot nuug anma'akatuin een, sin anteen eno besij. Eno naan nasoitn on kuun, ma sin anpoi natuin lalan le' he annao noi koot. Nok askeken, Uisnenog In ahaket naan annao nasaitan nai Petrus anmes-mese kuun.
11 Tabug ahaket naan namneku nalalit, na' nai Petrus nahine ma natenab am nak, “Namneo! Tabug iij, au fe' uhiin. Uisnenog ansonu' In ahaket neem he nafetin kau na'ko nai Herodes in animan. Uisnenog anmo'e on le' naan, he atoni Yahudis sin tenab amle'ut le' he najalib ee noi kau, ka ntoom kau fa.”
12 Lalit nai Petrus annao noi bi Maria in umel. Bi Maria le' iij, nai Yohanis in inaf. Nai Yohanis naan, in kanan mese anteni', es le' nai Markus. Anbi naan, anmu'i tuaf namfau le' nabguan ma an'onen een. Sin antotin he Uisnenog anbaban nai Petrus anbi in lasij. 13 Neem antee umel nanet, nai Petrus antee' ma no'en anbi nesug naan in kotin. Es on naan aan feto ameput mese anbi umel naan, kanan bi Rode, annao nakiso' he nahine noi amnemat naan sekog. 14 Anneen nai Petrus in hanan, in nahine nanij. In anmaliin anmaat. In naen antaam, ma natonan noi abiten naan am nak, “Nai Petrus anhake et mone'!” Natuin malinat anaet naan, tal antee in nniken nani nak in he nasoitan nesug naan noi nai Petrus.
15 Mes sin nataen am nak, “Kahaf! Naik mu'la'u on naan!”
Mes bifeel naan anki'un ma'tani nak, “Kahaf! Le' nael, lo nai Petrus in hanan! In anhake et mone'!”
Mes sin ka anpalsain fa. Sin naguab een am nak, “Of oni' Uisnenog In ahaket sonaf neno tunan, le' anpanat nai Petrus.”
16 Sin nmatita'-loin lasij nanet, nai Petrus anhaman piut, tal antee sin nasoitan nesug naan. Nasoitan nalalij, sin namkakan, natuin in le' naan nai Petrus namneo. 17 Nai Petrus na'aiti' in animan, he sin antaininen. Lalit in anpe'on sin natuin lalan meel am es Uisnenog napoitan ee na'ko ume buij. Es on naan in nlelu sin am nak, “Hi mnao nai he mitoon lasij le' iij moi nai Yakobus ma haef abjaan sin.” Lalit nai Petrus anpoi ma annao noi balel abjaan anteni'.
18 Nok-nok ana', tabug solalus apaot een ka niit anteni' fa nai Petrus, sin namkakan ma namtaun nmaten, natuin sin ka nahinen fa lasij saa' es le' of he nbool noi sin. 19 Tabug kesel nai Herodes nahine lasij naan, in naplenat sin he nami nai Petrus. Mes sin ka nateef niit fa nokan. Es on naan nai Herodes naplenat he npalekas solalus apaot een. Anpalekas nalali sin on nanet, in nlelu he nlolo niis sin ok-oke'.
Lalit nai Herodes annao nasaitan propinsi Yudea, ma natgua anbi koot Kaisarea.
Kesel Herodes Agripa anmaat
20 Tabug naan, abiten koot Tirus ma koot Sidon, sin bijaas ansosan amnahat na'kon kesel nai Herodes in pah. Mes aloo-loog le' iij, kesel naan anmamusun nok sin. Lalit sin nmalomis ma namin lalan he nhalan-nekaf nokan. Es on naan sin anpili naan tuaf fauk he nateef nok kesel Herodes. Tabug tuaf mapili een naan anteen koot Kaisarea, sin anmakhine een nok atonij mese, kanan nai Blastus. In anjali atoni makana' anbi kesel ee in sonaf. Sin nmalomis nok nai Blastus, he in anjali afuli' ma asoitan lalan noi sin, he sin nabe'i nateef nok kesel Herodes.
21 Lalit kesel Herodes anlomi he ansimo sin, es on naan sin nafeek naan tabug mese he natefan. Nenog naan, sin anmo'en acara naek. Kesel Herodes anpake in soo balug kesel, ma antoko anbi in a'toko plenat. Es on naan in naguab nok sin. 22 Anneen in hanan on nanet, sin nbo'is ma naikas kesel Herodes nak, “Amneen nai in hanan naan! Iij ka hanaf mansian fa! Iij pah ee tuan in hanan!” 23 Nok askeken, Uisnenog In ahaket mese neem na'ko neno tunan ma neki nai Herodes menas huumf es, natuin in ansimo pules noi in tuan, tal antee in nsi'u na'loba' Uisnenog. Es on naan sibel sin ansusi' nai Herodes in aon, tal antee in anmaat.
24 Lasin naan ok-oke' anjalin, maut he Uisnenog In Tu'in Alekot nhenuag on piut, ma tuaf-tuaf le' natuin Usif Yesus In Laal A'honis anmalolun piut.
25 Tabug nai Barnabas ma nai Saulus nua sin annaon neki nalali fitis-babat noi abiten Yerusalem, sin anbelok anfanin noi koot Antiokia. Sin nok atoni munif mese, kanan nai Yohanis. Sin anteek nak, nai Markus amsa'.