Nai Petrus namneob on anmatoom nok slanit noi tuaf le' ka atoni Yahudis fa
11
Nai Petrus ka nfani fa fe', mes Usif Yesus In haef een ma apalsait abjaan abiten Yerusalem, annenan nalali nak, tuaf le' ka atoni Yahudis fa, sin ansimo nalali Usif Yesus In Tu'in Alekot. 2 Es on naan tabug nai Petrus anfani ntee Yerusalem on nanet, anmu'i apalsait na'ko amnono Yahudi tuaf fauka nasaan ee 3 mnak, “Hoe! Ho mmo'e on meel es le' naan? Ho muhiin hit halat ee oo, ai' kaha? Ho lo mube'i he amtaam moi tuaf le' ka atoni Yahudis fa sin umel? Ho mbukae mok sin! Naik on le' naan, natuin sin ka maheli een fa on le' hit halat! Ka nabe'i fa he hit tseel gok tok sin!”4 Lalit nai Petrus npe'on sin ale' lasi le' anjalin nalalin naan am nak, 5 “Nenog mese, tabug au 'bi koot Yope, au 'onen. Anbi naan, Uisnenog naklila' noi kau anbi mnitas. Nak, on le' au 'iit nenog natfai, ma ispalei anaek mese anbool, ma nakfilit ee anbi in susun een haa sin. Ispalei naan ansanu neem noi kau. 6 Tabug au 'ail a'taam 'oi ispalei naan, au 'iit mu'it huma'-huma', es le': mui' hae haa', anonok, nok kolog huma'-huma'. Sin ala sin le' naan, mui't een le' hit tanunin sin. 7 Lalit au 'neen hanaf mese anlelu kau mnak, ‘Pe'u! Amfeen nai! Amlolo mui't een iij, mubalab sin ma mbukae nai!’
8 Mes au utae m'ak, ‘Ka nabe'i fa! Naik on le' naan! Fun au ka 'eku 'iit fa sisij huma'-huma' on le' naan. Hai atoni Yahudis minuni ale' mu'it een le' naan!’
9 Mes hanaf naan natael am nak, ‘Kalu Uisnenog nak bale mese knino' te, ho naik mak bale naan metan!’
10 Au 'ail 'iit ispalei naan anbool haef teen, ma in na'aiti on anfani noi nenog atnanan.
11 Nateef tabug naan, atoni' tenu neem anteen umel naan. Sin neman na'ko Kaisarea he nami kau. 12 Lalit Uisnenog In Asmana Knino' natoon kau mnak, ‘Ho msanu he mnao mok atonin naan nai. Naik ho nekam anmafeen! Maski sin atonij abjaan, mes naik ho mmainieen sin, ma mutenab sin on le' atoni mapasu'.’ Lalit hit aok-abjaan sin tuaf nee le' iij, nokan amsa' anbi Kaisarea. Anbi naa, hai mtaam moi anakaf solalus es na'ko pah Roma in umel. 13 In naguab am nak, neno fauk afinit, in niit Uisnenog In ahaket sonaf neno tunan, anhake anbi in umel, ma naguab am nak, ‘Amleek tuaf he annaon noi Yope he anhone neki naan atonij mese, kanan nai Simon Petrus. 14 Atoni' naan of natoon ko mok ho umel in nanan, Uisnenog In lalan he ansoi nafetin ki, ma nsako nani hi sanat sin.’
15 Es on nane, au 'mulai 'etun noi sin Uisnenog In Laal A'honis. Nok askeken, Uisnenog In Asmana Knino' neem antaam noi sin ok-oke', on le' nenog naa hit tsimo talalij. 16 Tabug au 'iit sin ansimo In Asmana Knino' on nanet, au umnau Usif Yesus In aguaban ahunut le' nak, ‘Nai Yohanis naslani ki neki oel anmees, mes Uisnenog of anmo'e nnesi na'ko naan noi ki, es le' In of anfee ki In Asmana Knino'.’b 17 Uisnenog nekin On es le' anfee In Asmana Knino' noi atonij abjaan een, namnees on le' In anfeel Ee noi kit. Es on naan hi mlomi he au 'laban Uisnenog oo, ai' on mee? Es on naan au he uguab 'ak saa' a'tein?”
18 Anneen nai Petrus natoon nanono on nanet, sin ka nasaan antenij fa. Lalit sin anpules ma nbo'is Uisnenog nak, “Oin ee! Manenu le'uf! Uisnenog anfai lalan he atonij abjaan amsa' nabe'i nasaitan sin 'monit asanat, he In annose nani sin sanat sin, ma sin nmonin piut nokan.”
Usif Yesus Inin anbatis ok noin balel-balel. Abjaan esan koot Antiokia
19 Neon ges, tabug sin na'mate nalali nai Stefanus, sin anmulai nhamu'i ma nasusab apalsait een noi Usif Yesus. Es on nane, sin naen anbatis ok noin balel-balel. Abjaan naenan noin propinsi Finisia. Abjaan naenan noin pulau Siprus, ma abjaan anteni' naen naloon tal anteen koot Antiokia et propinsi Siria. Amnemat sin naan natoon Usif Yesus In Tu'in Alekot anbin meel am meel msa'. Mes sin natonan noi aal sin atonij Yahudis anmesen. Sin ka natonan fa atonij abjaan.c
20 Ma anmu'i ntein Uisnenog Inin na'kon pulau Siprus ma na'ko koot Kirene. Abjaan sin annaon anfinin noin koot Antiokia et propinsi Siria. Anbin balel naan, sin es le' natoon Usif Yesus In Tu'in Alekot noi tuaf le' ka atoni Yahudis fa. 21 Uisnenog anfeen sin In kuasan, tal antee too mfaun anpalsain noi Usif Yesus.
22-24 Tabug naan, apalsait een abiten Yerusalem annenan nak, atonij abjaan abiten Antiokia anpalsain noin Usif Yesus amsa'. Es on naan sin anleek tuaf mese, kanan nai Barnabas, he nnao nail sin. Nai Barnabas naan, atoni neek leko, ma npalsai namneo-namneo noi Uisnenog. Asmana Knino' natukug ee msa'.
Tabug in neem antee balel naan, in niit nak, namneo-namneo Uisnenog anmepu matani' anbi atonij abjaan sin amonik een. Es on naan in anmaliin. Lalit in nha'tani anteni sin, he sin nabe'in he natuin piut-piut anbin Uisnenog In Laal A'honis. Nok lalan naan, apalsait een noi Usif Yesus anmalolun piut na'ko nenog noi nenog.
25 Lalit nai Barnabas annao nfiin noi koot Tarsus he nami nai Saulus. 26 Tabug in nateef nok nai Saulus, in nfulij he anfanin nabgua noin Antiokia. Lalit sin nua sin natgua nabaaln aa toon mese, nok Usif Yesus Inin le' abiten Antiokia. Nenog-nenog, sin nanoni' Usif Yesus In Laal A'honis noi too mfaun een. (Anbi koot Antiokia le' iij, na' atoni' anteek apalsait een noi Usif Yesus nak ‘atoni' Kristen’).d
27 Tabug sin nua sin fe' anbi Antiokia, anmu'i tuaf fauk neman na'ko Yerusalem. Uisnenog bijaas anpake atoni sin naan he anjali In mafefa knino' een. 28 Tuaf mese na'ko mafeef een naan, kanan nai Agabus. Uisnenog In Asmana Knino' natoon ee mnak, “Of amnahas matani' antaman pah-pinan funan am nateef.” Es on naan nai Agabus natoon ee noi abjaan anteni'. (In aguaban naan anjali namneo tabug nai Klaudius, usi naek kesel Roma, nanaak.)e 29 Anneen nai Agabus in aguaban on nanet, Usif Yesus Inin le' abiten Antiokia namin lalan ma nabguab een loit, he nsonu' sin noi sin aok-abjaan anbi Usif Yesus le' nmonin nok susal anbi propinsi Yudea. Tuaf mese-mese anfee natuin in 'be'in. 30 Nabguab nalali on nanet, sin anleek nai Barnabas nok nai Saulus, he sin nua sin annaon neki loit een naan noi anaak jemaa't een anbi balel naan, he anbati sin noi asuust een.