2-3 Nai Stefanus natael am nak, “Au ama' ala ki! Hi mneen kau fe'. Faijan unun naan, hit baba nai Abraham ka npoi nnao fa fe' na'ko in kua mnasi'. Mes Uisnenog Apinat-Aklahat naan, nakliil On noin. Uisnenog naplenat am nak, ‘Amnao musaitan ho pah, ma ho nonot sin. Ho mnao nai, moi pah le' of Au 'lulu 'anij noi ko!’ Lalit na' in anpoi na'ko pah Mesopotamia, ma natnanib in balan noi koot Haran.^a 4 Es on naan baba nai Abraham annao nasaitan atoni Kasdimas sin pah, ma natnani noi koot Haran.

Tabug in aam honi anmaat, Uisnenog nekij antaam neem noi pah Kana'an, es le' balel iij le' sin ama' ala kit atoko tabug ii.^b 5 Tabug naan, Uisnenog ka nboo' ma anbati niit fa naijaan lakat mese, he anjali baba nai Abraham in pusaak. Mes Uisnenog anpaa' nanij, he anfee naijaan ii noi in sufan-ka'un sin he anjali sin naijaa pusaak. Maski tabug naan, in ka nmu'i fa aan honi' mese msa'.^c

6 Mes Uisnenog naguab noin am nak, ‘Ho sufam-ka'um sin of annao natgua anbin atonij abjaan sin pah. Ma abiten balel naan of anhamu'i sin ma na'ate sin ka ba-baun fa, tal toon natun haa namsoup. 7 Es on naan toon natun haa namsoup, Au of a'hukum pah le' nmo'e ho sufam-ka'um anjali sin atel. Es on naan ho sufam-ka'um sin of annao nasaitan balel naan, ma ntaam neman noi balel ii, he an'onen een ma nasaeb een makasi noi Kau.’^d

8 Ma tabug In naguab nalali on nanet, In anfutu lasij manpaa' neki 'helit, le' anjali taka nak, baba nai Abraham sin anjalin Uisnenog In toog. Es on nane, tabug nai Abraham in anah nai Isak fe' anmoni nenog faan, in amaf anhelij. Namunit, nai Isak anheli in anah nai Yakop. Lalit nai Yakop anheli in aan mone bo'es am nuug, tabug sin mese-mese fe' anmoni naan nenog faan. Sin ala sin es le' anjalin babaf noi hit atoni Yahudis.^e

9 Tabug mese, hit babaf sin nas'unu' sin olif nai Yusuf. Lalit sin nasosa', ma in anjali atel anbi pah Masir. Mes Uisnenog nokan piut.^f 10 Es on naan, Uisnenog nafetin na'ko in susal sin ok-oke'. Uisnenog anfeen ee lolef ahinet he nahiin lasij namfau, tal antee kesel pah Masir anneek nisan, ma naitij anjali gubernur noi pah Masir anfuun ma nateef. Ma in nanaak anbi kesel pah Masir in sonaf amsa'.^g

11 Lalit, tabug amnahas antaman pah Masir ma pah Kana'an. Amnahas naan manenu', tal antee too mfaun een ansuus anbin meel am meel. Es on naan anbi tabug naan, hit babaf sin amsa' ka napenin fa amnahat saa'-saa'.^h 12 Mes baba nai Yakop anneen hanaf nak, anmu'i amnahat et pah Masir. Es on naan, in anlelu in anah sin, es le' hit babaf sin, he annaon noin pah Masir he ansosan amnahat.

13 Ansosan nalali on naan, sin anfanin. Tabug sin amnahat een naan oke een, nai Yakop anleek sin he anfani ntenin ma ansosan amnahat noin pah Masir. Ha'el le' ii, na' nai Yusuf natoon in tuan ee, nak in es le' nai Yusuf, le' sin olif. Namunit, nai Yusuf naklila' in nonot sin noi kesel pah Masir.ⁱ 14 Nai Yusuf antoti he in amaf ma in olif-tataf sin neem natgua anbi pah Masir. Sin amnemat noin pah Masir naan ok-oke' of tuaf bo' hitu mniim.^j

15 Es on naan nai Yakop natnanib bale noi pah Masir, tal antee hit babaf sin anmaten anbi naa.^k 16 Ma toon noi toon, sin neki nafani' hit babaf een sin nuif een noi kuan Sikem et pah Kana'an. Sin ansuub nuif een naan anbi opug le' nahunut baba nai Abraham ansoos ee na'ko nai Hemor in sufan.”^l

17 Nai Stefanus anluut anteni in aguaban am nak, “Ale' lasin le' iij, anjalin natuin Uisnenog anpaa' nalali nak, In of anfee naijaan pusaak noi nai Abraham anbi balel naan. Tabug anmulai anhaumak-maak he Uisnenog nanokab In lasi manpaa' nanet, hit atoni Yahudis sin anmalolun namfau le'uf anbi pah Masir. 18 Tabug naan, anmu'i kesel fe'ug mese le' annaa' aplenat anbi pah Masir. In ka nahine fa nai Yusuf in tonas ma in anaon.^m 19 Usif naan na'ate hit babaf sin. In maufinun kah noi hit babaf sin. In naseke' sin he nasaitan li'ana mee sin, he sin nmaten kuuk.

20 Tabug naan, baba nai Musa in inaf nahonis. In aon ee lekon kah! In inaf-amaf sin ka natninan fa kesel ee in aplenat. Sin npaloli nakolo' li'ana' naan anbi sin umel, tal antee in nmoni naan funan teen.ⁿ 21 Tabug sin ka nabe'i nakolo' naan fa li'ana' naan anteni, sin anpolin. Es on naan kesel pah Masir in aan feto mese, es le' niit li'ana' naan. In naiti li'ana' naan ma npalolij nahuum on le' in aan honi'.^o 22 Es on nane, atoni' pah Masir nanoni' ale' sin mahinek een ok-oke noi nai Musa, ma in anjali atoni ahinet ma amanoet. In nahine et aguaban ma mepug.

23 Tabug in nmoni naan toon bo' haa, nai Musa annao nami he nahiin kuun in atoni Israel sin. 24 Tabug in anpoi nnao te, in niit atoni Masiras es antepo atoni Israel es. In nbaban atoni Israel naan, ma in nlolo niis atoni Masiras naan. 25 Nai Musa natenab nak, of oni' in aon-abjaan sin nahinen nak, Uisnenog ansonu, he nafetin sin na'ko sin susal. Mes sin ka nahinen lasij naan fa fe'. 26 Anmiu on nanet, nai Musa anpoi nteen he annao nail in atoni Israel sin. Lalit in niit atoni' nuug anmabanan. Ma in he nsobal he nalame sin am nak, “Hoe! Hi nua ki amma'oli-tatan. Mes nansaa' am es hi nua ki mmatuuf?”

27 Mes atonij le' anbaan in aon-abjaan naan antita naskotun baba nai Musa mnak, ‘Sekog es le' naiti ko he mjali 'nakaf noi kai? Ma sekog es anlulu ko he mjali afeek lasi noi kai? 28 Ho mak oni' ho mube'i amlolo miis kau, on le' aafj aan ho amlolo miis atoni Masiras naan?’ 29 Nai Musa anneen nalali on nanet, in anfeen naen nasaitan pah Masir. In naen ma natgua anbi atoni Midianas sin pah. In matsao anbi naan, ma nahoni' li'aan monel nuug.^p

30 Toon bo' haa namsopu te, nai Musa annao anbi balel mese le' ka nmu'i fa oel, anhaumaak nok anu'af mese, le' sin teke nak nu'af Sinai. Anbi balel naan, Uisnenog In ahaket na'ko sonaf neno tunan, neem nateef nok nai Musa, anbi aij le' anpiin anbi hau ana mese. Haug naan anpiin, mes ka nputu fa. 31 Niit on nane, nai Musa ansanmaak. Ma in nnao anhaumaak he nail niit saa' le' anjali anbi naan. Nok askeken, in nneen Uisnenog naguab na'ko aij naan in nanan nak, 32 ‘Au le' iij, ho babaf sin Uisnenog; es le' baba nai Abraham, baba nai Isak, ma baba nai Yakop.’ Anneen hanaf nane, baba nai Musa namtau nmaat, tal antee in human anmouf, ma in ka nbalani fa he na'aiti in matan he nail ai apinat naan.

33 Lalit Uisnenog naguab anteni' mnak, ‘Musa! Ho mhake et naijaa knino'. Amkasu mani ho 'pein haef een naan! 34 Naik mutenab am mak, Au 'nikan 'ani Au too Israel sin abiten pah Masir. Kahaf! Au fe' umnau sin. Au uhine sin mane'at. Au 'neen ulali sin haan sakoit antoti babat. Tabug iij, Au 'sanu ma 'nao he ufetin sin. Uum fe'! Au he 'leek ko amfani moi pah Masir.’^q

35 Es on naan Uisnenog le' nakliil On anbi aij naan, naplenat nai Musa he anfani noi pah Masir. Uisnenog anlulu ma anleek ee, he nafetin toog Israel na'ko mane'at. Nai Musa iij, es le' faijan unun antoot je mnak, ‘Sekog es le' naiti ko mjali anakaf noi kai?’ Tabug iij, Uisnenog nekin on es le' naitij!^r 36 Es on nane, baba nai Musa anbelok anfaan noi pah Masir. Anbi naan, in nmo'e lasi sanmakat huma'-huma'. Lalit in napoitan toog Israel sin na'ko pah Masir. In neki sin annaon natuin Tasi Mee', ma sin nnao natuin bale luman tal antee toon bo' haa.^s

37 Baba nai Musa nekin on natoon noi toog Israel am nak, ‘Uisnenog of naiti naan tuaf mese na'ko hi tnaanm een, he anjali In mafefa knino', namnees on le' In naiti kau le' ii.’^t 38 Baba nai Musa neki hit babaf sin anbi bale luman. In kuun es anjali anete-lalan noi hit babaf nok Uisnenog In ahaket na'ko sonaf neno tunan. Ahaket naan, es le' nasanut Uisnenog In A'an ma Plenat noi nai Musa, le' natoon kit laal a'honis amneot. Uisnenog In A'an ma Plenat naan, es le' nasanut sin anbi nu'af Sinai naan.^u

39 Maski on naan amsa', hit babaf sin ka natninan fa nai Musa. Sin ka nlomi nanin, ma sin he nfanin kuuk noin pah Masir. 40 Lalit sin annaon nfuli nai Harun nak, ‘Ho oli' nai Musa nok kit atpoi na'ko pah Masir. Mes tabug iij, hai ka mihine fa noi in et abola' meel! Es on nanet, hai mtoti ko he mmo'e bale fuat mahuum es noi kai. Maut he in nekin on es le' anjali maat-lalan noi kai.’^v 41 Lalit sin anmo'en bale fuat mahuma' naan. In human on le' bijae ana mese. Lalit sin anlolon mu'it ma na'tulu noin. Ma sin anfesek een nok neek amlilet anaek, natuin sin neek een anmalinan nok bale' le' sin anmo'el neki sin aniimk een kuuk.^w 42 Tabug nail niit 'mo'et nanet, Uisnenog ankoti sin. Nalalit sin nmulain nfua bale' anbi nenog atnanan, on le' manas, funan, ma kfuun-akfuun. Es on naan Uisnenog npalakan sin on le' naan. Naan namnees nok saa' le' Uisnenog In mafefa knino' anluul nanij am nak,

44 Nai Stefanus anluut ma antalu in aguaban naan nak, “Uisnenog nalulu' noi baba nai Musa ume onen mese in human. Es on naan baba nai Musa sin nahakeb Tenda Onen mese,^y le' sin anmo'el na'ko pasug ma betik, natuin humaf naa. Es on naan toog Israel sin neman ma an'onen een noi Uisnenog anbi In Tenda naan. Kalu sin natnanib een balel, sin anpukai Tenda Onen naan, sin anfutug, ma sin anloi nekij noi balel abjaan. Anbi naan, sin nahakeb anteni Tenda naan.^z

45 Tabug nai Yosua sin nmakenan suug aloog nok uuf-uuf abjaan anbi pah Kana'an le' iij, Uisnenog anli'u napoitan uuf een naan. Lalit In anbati pah nane noi hit baabf een. Tabug sin ntaam nasiik pah naan, sin neki Tenda Onen naan amsa'. Tenda naan anhake nabala tal antee kesel nai Daut annaa' aplenat.^a 46 Kesel nai Daut an'onen noi Uisnenog, on le' hit baba nai Yakop amsa' an'onen noin. Ma nai Daut anhalinab Uisnenog In nekan, es on naan Uisnenog naklila In nekan alekot. Es on naan in antoti Uisnenog he in es le' nafena' Ume Onen Uuf fe'ug.^b 47 Mes namuni te, nai Daut in anah nai Soleman es le' nafena' Ume Onen Uuf naan.^c

48 Mes hit tahiin tak, Uisnenog ka natgua fa anbi umel le' mansian anmo'el. Lasij naan namnees nok saa' le' Uisnenog In mafefa knino' tuaf mese anluul nanij am nak,

51 Lalit nai Stefanus anluut anteni in aguab een. In ankeko sin am nak, “Namneo, lo hi 'naak-fatun ki! Hi on le' tuaf le' ka nahine niit fa Uisnenog, ma ka mitnine fa. Hi mlaban Uisnenog on le' babaf sin ankotij! Es on naan tabug ii, hi he mlaban amteen Uisnenog In Asmana Knino', oo?^e 52 Hi baabf een nasusab niis ale' Uisnenog In mafefa knino' een. Hi mitoon miit kau, mafefa knino' mee, es le' ka napeni fa ha'mu'it na'ko sin? Ka tiit fa fe', ai'? Faijan unun Uisnenog In mafefa knino' een natoon nani nak, Uisnenog of ansonu' In Atoni Knino'. Mes hi baabf een anlolo niis Uisnenog In mafefa knino' sin. Tal antee hi msa' ampake tuaf abjaan he nlolo niis Uisnenog In Atoni Knino'. 53 Uisnenog In ahaket na'ko sonaf neno tunan sin amsa', es le' neki ale' atolan halat le' Uisnenog anlomi he nfee sin noi kit, mes hi ka mfaloli sin fa.”

54 Tabug sin le' nokan antokon anbi balel feek lasij naan, anneen nai Stefanus in aguab een naan, sin nahine nanin nak in nasaan sin. Es on nane, sin neek een namenan ma neku nisik een.

55 Mes nai Stefanus, le' Uisnenog In Asmana Knino' ee ntaam noi ne, na'aiti matan ma anbaisenu noi nenog atnanan. Anbi naan, in niit Uisnenog In pinan ma aklahan nok ateem-temen, ma Usif Yesus anhake anbi Uisnenog In abnapan ane'ug anbi bale amasat naan. 56 Ma nai Stefanus naguab am nak, “On ii, sin ama sin! Au 'iit neno tunan natfai, ma Mansian Namneo-Namneo anhake et bale amasat et Uisnenog In abnapan ane'ug.”

57 Annenan on nanet, apalekas lasin ansuun sin lukek een. Lalit sin nakain ee nok haan matani' he nai Stefanus naik naguab anteni. Ma sin anloka simo nabgua he n'usa' nisan. 58 Lalit sin anheel anfonat nai Stefanus ma nekij anpoi na'ko koot naan. Ma saksii sin ankasu sin soo balu mnanu kotif, ma nana'at sin anbi atoni munif mese. In kanan, nai Saulus. In es le' nakoke' sin. Nalalit sin npoli nai Stefanus neki fatug.

59 Tabug sin npoli nai Stefanus, in anhunun naheel naanj on am nak, “Koi, Usi' Yesus! Au tabug ii anhaumaak een. Amsimo kau nai!” 60 Lalit in nli'tuu ma nhunun anteni' naheel-heel am nak, “Koi, Aam! Naik muloib sanat iij noi sin!” Lalit in asnasan natfeek, ma in anmaat.