Sin anpili tuaf hiit he npaloli abaut een
6
Tabug naan, Usif Yesus Inin anmalolu piut tal antee namfaun. Mes sin na'ko aguab pukan nuug. Abjaan atoni Yahudis le' naguab een neki aguab Aram. Ma abjaan anteni atoni Yahudis le' naguab een neki aguab Yunani. Namunit, lasij mese anbool anbi pukan nua' een sin atnaank een. Pukan le' neki aguab Yunani sin nasulin akle'og nok pukan le' neki aguab Aram. Sin nak, “Iij ansaan! Kalu hi mbati bukael nenog-nenog te, hi naika ampake neek ao-biaf. Natuin hai kulu-banu een ka napenin fa sin paa'k een.”2 Natuin lasij naan, es na' Uisnenog In haef een, tuaf bo'es am nuug, no'en nabguab apalsait een. Lalit sin naguab een am nak, “Hai aom-abjaan ala ki ok-oke'! Hai mibe'i misnasab balab bukael noi ki, mes naan ka pantas fa noi kit. Natuin hai lo he minoni' ki Uisnenog In A'an ma Plenat piut-piut. 3 Es on naan anbi hai tenab on ii: naleko nnesi, hi mbeti maan tuaf hiit na'ko ki. Hi mami tuaf le' too mfaun antola, ma nahine in tuan, in nahine lasij namfau ma neek baun, ma Uisnenog In Asmana Knino' naloitan in amonin. Kalu hi mbeti maan tuaf een on le' nanet, of hai maiti sin he sin n'ulus lasi bukael. 4 Nok lalan naan, na' hai mipeni meinuan he m'onen ma minoni' Uisnenog In A'an ma Plenat.”
5 Lalit sin ala sin anlomin ma natuin nai Petrus in aguaban naan. Sin anpili naan tuaf hiit.
Tuaf es in kanan nai Stefanus. In npalsai namneo-namneo noi Usif Yesus, ma Uisnenog In Asmana Knino' anpakel. In aok-abjaan sin es le':
nai Felipus,
nai Prokorus,
nai Nikanor,
nai Timon,
nai Parmenas,
ma nai Nikolas le' antaam nok anbi palsait Yahudi, mes in ka atoni Yahudis fa. In na'ko koot Antiokia.
6 Lalit sin neki tuaf hiit le' sin anpili naan sin naan noi Usif Yesus In haef een. Lalit haef een antao sin aniimk een, ma an'onen sin he anjalin ameput noi balap-loitan bukael, he a'baut een napenin batis namnes-nesan.
7 Es on naan Uisnenog In A'an ma Plenat matona' ma mateka' fuun am nateef. Ma toog le' natuin Usif Yesus In Laal A'honis naan, anmalolu piut-piut anbi Yerusalem. On naan amsa', anakaf lasi palsait Yahudi abjaan namfau antaam nokan anjalin Usif Yesus Inin.
Sin anheke nai Stefanus
8 Tabug naan, Uisnenog naklila' In nekan alekot nathoe noi nai Stefanus. In nfee kuasat he nai Stefanus anmo'e lasi sanmakat huma'-huma' amsa', he too mfaun een nitan neki sin maatk een. 9 Anbi naan, anmu'i atoni Yahudis fauk le' neman na'ko balel loog. Sin na'ko koot Kirene, koot Aleksandria, propinsi Kilikia, ma propinsi Asia. Nahunut, sin anjalin atel noi atonij abjaan, mes namunit, sin usik ma sin tuak een nafetin sin. Lalit sin nabguan anbi Yerusalem. Lalit sin antaman anbi ume onen le' sin nmo'e kuuk. Ume onen naan, sin anteek nak, “Fetin na'ko Atel.” Tabug sin anneen nalali nai Stefanus in aguab, sin ka nlomij fa. Es on naan, sin nmulain anmatoen nokan. 10 Mes nai Stefanus in hine ne kah, natuin in naguab neki kuasat na'ko Uisnenog In Asmana Knino'. Es on naan sin ka nabe'ij fa. 11 Lalit sin namin lalan amle'ut. Es on naan sin annaon nbaen atonij abjaan, he naguab namoe am nak, “Hai mneen atoni' ii naguab nale'uf baba nai Musa nok Uisnenog!”
12 Sin nakoke' too mfaun, tal antee atoni mnasi halat Yahudi sin ma kulu agama een anneen nokan. Lalit sin namaunun. Es on naan sin annao nheke nai Stefanus, ma annone nekij nnao noi balel feek lasi palsait. 13 Sin saksii nuug naan, ansaksiin aguab amoel anmatoom nok nai Stefanus am nak, “Atonij le' ii, naguab nale'uf Ume Onen Uuf piut-piut. Ma in naguab nale'uf amsa' plenat Uisnenog le' baba nai Musa nasanut sin neman noi kit. 14 Hai mneen amsa' in naguab am nak, Nai Yesus, atoni Nasaret naan, of naseel Ume Onen Uuf le' ii. Ma In of annose ma anseka' nani hit atolan halat een ok-oke', le' baba nai Musa nasanut sin neman noi kit!”
15 Lalit ale' too mfaun le' antokon anbi balel feek lasi palsait naan, sin nail natesan noi nai Stefanus, natuin in human namaasb on, on le' ahaket Uisnenog na'ko sonaf neno tunan.