Nai Ananias nok bi Safira anmaten, natuin sin he nsobal Asmana Knino'
5
Mes anbi tabug naan, anmu'i atonij mese amsa', kanan nai Ananias. In feel kanan bi Safira. Sin nua sin nasosa' sin naijaan pisa mese amsa'. 2 Mes sin nua sin nma'akolan he nakolo' naijaan naan in upan abjaan. Tabug nasosa' nalali naijaan naan, nai Ananias annao natoon noi Uisnenog In haef een am nak, “Hai fe' misosa' milali hai naijaan pisa mese. Tabug iij, hai he amfee in upan ok-oke' noi Uisnenog.” 3 Mes nai Petrus nakain ee mnak, “Ananias! Ho lo bainesi' ko! Ho mmo'e on meel? Nansaa' am es ho mukolo' naijaan naan in upan abjaan? Ho nekam anmesi'ook, fun ho mutuin nitu le'uf een sin anakaf in lomin. Ho mube'i he mputa-kliun Uisnenog In Asmana Knino'! 4 On ii! Ho he musosa' naijaan naan, ai' kahaf, naan es le' ho. Ai' kalu ho musosa' mulalij, ma ho mlomi he amfee in upan ok-oke, ai' kahaf amsa', naan es le' ho. Mes nansaa' am es ho mmo'e lasij naan? Ho he mumoe mansian, mes ka tiit fa es nabe'i he namoe naan Uisnenog!”
5 Anneen nai Petrus in aguaban nane, nok askeken nai Ananias antiloot, ma in anmate nani tabug naan. Ale' toog le' anneen lasij naan, namtaun nmaten. 6 Lalit munif sin tuaf fauk antaam neman, ma sin n'amu nai Ananias in aon, ma nekij annao he ansuub.
7 Lalit of oni' leku tenu namuni te, nai Ananias in feel antaam neem. In ka nahine fa noi saa' es le' anjali nalaal je. 8 Es on naan nai Petrus antoti mnak, “On meel, oin? Hi misosa' naijaan naan, ma in upan es le' iij ee, haa, oo?”
In natael am nak, “Namneo, In upan lo es le' naan.”
9 Lalit nai Petrus nakain ee mnak, “Nansaa' am es ho mok ho monel mma'akol he msobal Uisnenog In Asmana Knino'? Ho mail! Tuaf-tuaf le' annao ansuub ho monel, fe' anfani neman. Babaun es anteni' sin of anloi neki ho ta'um ma ansuub ee anbi ho monel in abnapan.”
10 Nai Petrus naguab on nane, nok askeken, bifeel naan antiloot ma anmate naan. Tabug munif een antaam anfanin, sin niit bifeel naan anmate nalaal je. Lalit sin anloi neki bifeel naan, ma ansuub ee anbi in monel in abnapan.
11 Lalit apalsait een noi Nai Yesus, sin namtaun nmaten. Ma ale' too mfaun le' annenan lasij anmatoom nok nai Ananias ma bi Safira sin a'matek een, sin namtaun amsa'.
Nai Petrus sin naleko' amenat namfau
12 Tabug naan, Nai Yesus In haef een anmo'en lasi sanmakat namfau, ma too mfaun sin niit. Haef een sin antaman tenij-tenij anbi Uisnenog In Ume Onen Uuf. Sin nabguan nok nekaf mese anbi Umel Kesel nai Soleman. 13 Tabug naan, too mfaun sin anpules Usif Yesus In apalsait een. Mes noi sekog le' fe' ka npalsai fa Nai Yesus, in nekan na'oni' fe' ma ka nbalani fa he antaam nabgua nok sin.
14 Mes apalsait een noi Nai Yesus naan, anmalolu namfau piut na'ko tabug noi tabug, bifeel ma atonij. 15 Es on naan tabug atoni sin niit nalali nai Petrus sin anmo'en lasi sanmakat huma'-huma', tuaf namfau nekin amenat anbin anahek, ma natupab sin anbi lalan in ninen. Fun sin natenab am nak, “Kal-kalu nai Petrus ma nai Yohanis anfinin natuin lalan iij ee, ma aal sin mafok een es antoom amenat sin on nane, sin nabe'i nalekon.” 16 Anbi tabug naan, bifeel ma atonij annao neman, ka natfeek niit fa. Sin neman na'ko kuan-kuan le' anhaumaak koot Yerusalem in ninen. Sin anloi neki amenat een, ma Uisnenog In haef een naleko' sin ok-oke'. Sin neki anitu-saet amsa', ma Uisnenog In haef een anli'u napoitan nitu le'uf na'ko sin ok-oke'.
Usif Yesus In haef een napenin ha'mu'it
17 Tabug naan, natuin Usif Yesus In haef een sin mepug, es na' lasi palsait Yahudi sin anakaf anaek nok in haef-nimaf sin na'ko nonot Saduki, sin namaunun. 18 Es on naan, sin annaon ma anheke Usif Yesus In haef een, ma nataam sin anbi ume buij.a
19 Mes faij naan, Uisnenog In ahaket na'ko sonaf neno tunan tuaf mese, neem anbi ume buij naan, ma nasoitan ume buij naan in nesun. Lalit in nok sin anpoin noi meinuan, ma in npaa' sin am nak, 20 “Tabug ii, hi mnao nai moi Uisnenog In Ume Onen Uuf. Amnao mitoon noi ale' too mfaun een anbi naan, he sin natuin Usi' In Laal A'honis fe'ug ii.”
21 Nok-nok ana', sin natuin haan manpaa' na'ko Uisnenog In ahaket sonaf neno tunan naan. Ma sin antaman noi Ume Onen Uuf in kintal, ma sin nanoni' too mfaun een anbin naan.
Ka loog fa te, lasi palsait Yahudi sin anakaf anaek ee neem nok in aok-abjaan sin ma nok atoni mnasi halat na'ko pah Israel. Sin neem nabguan he ntae lasi palsait anmatoom nok Usif Yesus In haef een. Lalit sin nlelu he no'en nai Petrus sin na'kon ume buij, he sin n'atol lasij naan.
22 Mes tabug sin anteen ume buij, nai Petrus sin ka nbin fa naan. Es on naan, atoni apaot een annaon ma natonan anaet een anbi bale buat naan. 23 Sin natonan am nak, “Hai ama' ala ki, naik mitoo'. Tabug hai iim amtee ume buij, hai miit in nesun ankuus namatel. Ma apaot een anhaken anbi naa. Mes tabug hai mlelu sin he nasoitan nesug, ma hai amtaam. He'e! Hai ka miit fa saa'-saa'.
24 Anneen on nane, anaak lasi palsait Yahudi sin anaakf een, ma anakaf apaot Uisnenog In Ume Onen Uuf, sin ala sin namkakan ma ka fefa' mese fa, fun sin neek een namnekun.
25 Lalit atonij mese neem ma natoon noi sin am nak, “Au ama' ala ki, au 'baisenu ki! Tuaf een le' hi mitaam sin anbi ume buij, sin etan mone' ii! Tabug iij, sin nhaken ma anfeen noni' noi too mfaun een anbin Ume Onen Uuf ii!
26 Ma tabug sin nneen on nane, anakaf apaot Ume Onen Uuf, anleek in haef-nimaf sin he annaon ma anheke anteni' nai Petrus nok in aok-abjaan sin. Mes in haef-nimaf sin namtaun, natuin too mfaun een anneen nai Petrus in aguab een. Sin natenab nak, “Naik-naika too mfaun sin namaunun ma npoli kit neki fatug.” Es on nane, tabug sin anheke anteni nai Petrus sin, sin ka nabe'in fa he naseke' sin.
27 Lalit sin neki nai Petrus sin noi bale le' anpakel he nafekan lasij. Ma anaak anaek ee anmulai antoti sin 28 am nak, “Hai amtaal milali ki he naik minoni' toog sin anmatoom nok Atonij le' he nmo'e laal a'honis fe'ug naan, ai'? Hi lo mi'naak-fatu! Hi ka mneen fa hai plenat, mes hi mituin kiim hi alomim een! Hi mnao ma minoni' ka misnaas fa anfuun am nateef koot Yerusalem le' ii. Hi on le' he misaeba' kai mafena' mak, hai es le' amlelu tuaf he na'mate Nai Yesus naan.”b
29 Lalit nai Petrus anhake ma anjali mafefa' noi haef een ok-oke'. In natael am nak,
“Au ama' ala ki! Kalu anmu'i mansian nanaoba' plenat le' nasuli ma ka namnees fa nok Uisnenog In alomin, hai ka mibe'i mituin fa. Mes hai lo he mituin ahaa Uisnenog In aplenat! 30 Atonij le' nasoitan kai lalan noi 'monit fe'ug naan, es le' Nai Yesus. In es le' Atonij le' hi mkuus mi'peti anbi hau nehe'. Na'ko faijan unun, hit babaf sin anlomin he n'onen een noin Uisnenog. Uisnenog le' naan, es le' namonib nafani' Nai Yesus na'ko In amaten!
31 Tabug iij, Uisnenog naiti na'latan Nai Yesus, he anjali Atoni' Mabeti'. Nai Yesus annaa' kuasat on le' kesel anaek mese. In nasoitan lalan, he ansoi nafetin mansian na'ko sin sanat ma penu sin. In nfee kit lalan, noi toog Israel, he tasaitan hit saant een ok-oke', ma atbelok atfani tatuin Uisnenog in lalan amneot. Nok lalan naan, Uisnenog In nekan na' ansaisuum, tal antee In ka nso'i anteni fa toog Israel hit sanat sin. 32 Fun hit tiit teki hit maatk een tak, Nai Yesus anmate nalaal je, mes In nmoni nfaan jen amsa'. Tabug iij, Uisnenog In Asmana Knino' natoon lasij ii noi bifeel-atonij le' natuin Nai Yesus In Laal A'honis.”
33 Anneen nalali nai Petrus in aguab een on nanet, atokos een anbi bale afeek lasij naan, anmulai ntaisibun, tal antee aal babaun te, sin he na'mate niis Uisnenog In haef een. 34 Mes anbi naan, anmu'i atonij mese, le' nok antoko he n'atol lasij naan. In kanan nai Gamalial. Too mfaun sin antola, natuin in le' ii kulu ahinet na'ko nonot Farisi. Tabug nai Petrus naguab nalali, ma sin he namatel, nai Gamalial anfeen anhake ma anleek sin he neki nai Petrus nok in aok-abjaan sin anpoin ntaahn een. 35 Tabug sin anpoin, in naguab noi anaakf een anbi naan am nak,
“Au aok-abjaan ala ki! Hit lo he tpanat! Naik-naika hit tmanaap he atmo'e amle'ut noi sin. Hit lo he tatenab talek-leko' fe'. 36 Hi mimnau atonij mese le' in kanan nai Teudas. In anmate lo le'uf een. Mes tabug in fe' anmoni, in naiti in tuan ee nak in atoni naek, tal antee of oni' tuaf natun haa natuin ee. Mes tabug atoni sin namatel, in haef-nimaf sin naen namnekun. Antee tabug ii, in tuaf een le' natuin ee, ka tiit fa sin humak-matak!
37 Ma hi lo he mimnau lasij mese antein. Tabug naan, anaa' aplenat sin nanaoba' luul kanaf. Sin nso'i toog anbi pah mese a'teem-temel. Atonij mese in kanan, nai Yudas, na'ko propinsi Galilea. Too mfaun een natuin ee msa'. Mes sin nlolo nisan amsa'. Es nanet, in atuin een naen namnekun, tal ka mniit een fa lee.
38 Es on naan tabug iij, au aok-abjaan ala ki, au utenab on ii: naik mi'mate sin. Mifetin sin. Natuin kalu sin noni' ma sin amo'ek naan na'ko mansian, tebes of namneku. 39 Mes kalu namneo nak sin noni' naan in amneman na'ko Uisnenog, hi of ka mibe'i fa he minofu sin. Es on naan hi mpanat fe'. Naik-naika hi mlaban Uisnenog.”
Ma tabug sin anneen lasij nane, sin nlomin he natuin nai Gamalial in fainekat. 40 Lalit sin no'en nataam haef een. Ma sin anleek atoni' he antepo sin. Lalit sin antaal anteni sin he naik anteek anteni' Nai Yesus In kanan. Nalalit sin nafetin haef een naan.
41 Lalit haef een naan annao anpoi nasaitan balel naan. Sin natenab am nak, maut he sin kaank een namle'un natuin sin nok Nai Yesus, mes sin namlilen, natuin Uisnenog nahiin nak sin lo pantas he nasae ha'mu'it on le' naan. Es on naan sin neek een anmalinan nmaten. 42 Nalalit nenog-nenog, sin annaon nfee noni' noi bifeel-atonij namfaun am nak, “Atonij le' Uisnenog anlulu naan Je naan, es le' Nai Yesus.” Ma sin natoon lasij naan piut-piut anbi umel mese-mese, ma anbi Ume Onen Uuf amsa'.