Anaak lasi palsait Yahudi sin anakaf sin no'en nai Petrus ma nai Yohanis
4
Tabug nai Petrus ma nai Yohanis fe' naguab een nok atoni' fauk, usi 'naek een neman. Usi 'naek een naan es le': anakaf lasi palsait Yahudi sin anakaf sin, tuaf abjaan na'ko nonot palsait Saduki, ma anakaf apaot Ume Onen Uuf. Sin neman he anmakalin penit nok nai Petrus ma nai Yohanis. 2 Kasen naan namaunun nai Petrus ma nai Yohanis, natuin sin nua sin natoon noi too mfaun am nak, “Nai Yesus anmoni anfaan na'ko In amaten! Nok lalan naan, In nasoitan lalan noi amates een he nmoni nfanin amsa'.”a 3 Es on naan sin nlelu tuaf he anheke sin nua sin. Mes, natuin manas anmaab leh, es on naan sin nataam sin nua sin anbi ume buij. He anmiu on nane, na' anpalekas sin lasij. 4 Mes na'ko tuaf een le' anlomin he anneen ma ansimo haef een sin anoni' sin, tuaf amfaun anmanakun nak saa'-saa' le' tuaf een nanoni' sin le' naan, lo namneo. Es on nane, tuaf-tuaf neem anmalolun piut, tal antee of oni' sin ok-oke' tuaf nifu niim. 5 Anmiu on nanet, atoni Yahudis sin anaet een nabguan anbi koot Yerusalem. Sin es le': anakaf sin, atoni mnasi halat sin, ma kulu agama Yahudi sin. 6 Lasi palsait Yahudi sin anakaf anaek ee msa' nok anbi naan. In kanan nai Hanas. Anaet abjaan anteni, es le' nai Kayafas, nai Yohanis, nai Aleksander, ma nai Hanas in umel nanan ok-oke sin nokan anbi naan amsa'. 7 Tabug sin ala sin antaam nabguan, sin anleek tuaf he neki nai Petrus ma nai Yohanis, he sin nateef nok sin. Tabug sin nua sin antaman nalalin, anaet een antoti mnak, “Ammo'e on mee es le' hi mibe'i mileko' atoni le' ao a'olet naan? Hi ampake kuasat na'ko sekog? Ma sekog es le' anlelu ki he hi mbalani he mmo'e on le' naan?”
8 Lalit Uisnenog In Asmana Knino' anha'tani nai Petrus in nekan. Es on naan in natael am nak,
“Au ama' ala ki! Hi es le' amjali anakat ma atoni mnasi halat noi toog Israel ok-oke'! Naik mitoo', kalu hai on le' mtaka'mana' babaun. 9 Tail ate, hi on le' he mmaklasi' mok kai, natuin hai ambaban ma mileko' atoni ao a'olet mese. Es on naan hi mitoti kai, hai mileko' atoni' naan, ampake sekog in kuasan? 10 Es on naan au he utoon noi ki on ii: ama' sin ala ki mimnau atoni Nasaret mese, le' In kanan Nai Yesus. In es le' Kristus, le' Uisnenog anlulu ma anleek nanij na'ko unu'. Ma hi es le' amkuus mi'peti anbi hau nehe'. Mes Uisnenog namonib nafani' na'ko In amaten. Au 'loom he sin ama' ala ki mok toog Israel ok-oke' mihine mak hai mileko' atoni ao a'olet le' iij, meki Nai Yesus le' iij In kuasan. 11 Anbi Uisnenog In Sula Knino' malula' nalali anmatoom nok Nai Yesus le' iij ee mnak,
‘Anmu'i fatu mese le' tukal fatu sin naiti npolin,
mes namuni, fatug naan anjali fatu 'sukif noi nii inaf.’b
12 Anbi pah-pinan iij nog mesen, Uisnenog ka nasoitan fa lalan abjaan he ansoi nafetin kit na'ko hit sanat ma penu sin. Ala haa lalan mese, es le' Nai Yesus. Kalu ka In fa te, ka tiit fa es, le' nabe'i anfee kit a'honis.”
13 Atokos sin anbin naan nahinen nak, nai Petrus ma nai Yohanis, sin nua sin too amonot, ka on fa askolat sin. Mes sin ansanmakan, natuin sin nua sin naguab een maat-maat ma nabe'in. Sin nahinen nak nua sin a'hakef mese nok Nai Yesus. 14 Es manum sin an'eel aah ma ka fefa' mese fa. Saa' antein, atonij le' naleko na'ko meen ao a'olet naan anhake natnoe nok nai Petrus ma nai Yohanis anbi naan. 15 Lalit sin anlelu Nai Yesus In haef een nua sin nak, “Hi mpoi mtahan moi mone'.” Es on naan sin naguab een he namin lalan he nanofu sin. 16 Sin anmatotin een am nak, “On mee? Hit he atmo'e sin on mee? Natuin abiten koot Yerusalem ok-oke' nahinen nak sin es le' anmo'e lasi sanmakat ii. Hit he ka tlomi fa teki aguab saa' attein? Fun lasi iij mamnita' maat-maat. 17 Leko nneis, hit tami lalan he lasi iij ma'kuba' ma makolo', ma naik natoon on anbi meel am meel. Leko nneis, hit thaka'tau sin, he sin naik anfeen anoni' anteni anmatoom nok Nai Yesus In Laal A'honis. Kalu sin ka natninan fa, of sin nahinen, oo!”
18 Lalit anaet een no'en nataam sin ma naguab noi sin am nak, “Amneen milek-leko'! Ka nabe'i fa he amfee anoni' antein anmatoom nok Nai Yesus!”
19 Mes nai Petrus ma nai Yohanis nataen am nak, “Iti hi mitenab milek-leko', usi. Meel es le' naleko' nnesi? Tatuin hi plenat, es le' naleko nnesi oo, ai' tatuin plenat Uisnenog? 20 Hai miit meki hai maatm een, ma hai mneen meki hai lukem een ale' kanan lasi namfau. Nansaa' am es hai mibe'i he m'ela? Hai lo he mitoon lasin naan!”
21 Mes anaet sin le' antokon ma an'aa' lasij naan, antaal anteni sin. Lalit sin nafetin tuaf nuug een naan, natuin sin ka nahine antenin fa noi he nhukum sin nok saa'. Ma sin namtaun amsa', kal-kalu too mfaun een antaisibun. Fun too mfaun een anbo'is Uisnenog In kanan, natuin atoni ao a'olet naan naleko nalaal je. 22 (Atoni ao a'olet naan, nameen naan toon bo' haa ma nneis, es na' in nabe'i annao naan.)
Usif Yesus Inin an'onen een ma antotin he sin naik namtaun
23 Tabug sin nafetin nai Petrus ma nai Yohanis, sin nua sin anbelok anfanin ma nateef nok sin aok-abjaan sin. Lalit nua sin natonan sin ale' aguab ma talas le' sin anneen sin na'ko anaet een. 24 Anneen nalali on nane, sin aok-abjaan sin nabguan nok nekaf mese, ma an'onen een am nak, “Uisnenog, Akuasat Afin-finit. Uisnenog Amo'et-Apakaet neno tunan ma pah-pinan nok in nesan.c 25 Nahunut, Ho Asmana Knino' anpake baba nai Daut anfani Ho mafefa knino', he anluul nani lasi anmatoom nok atonij le' ansulan Nai Yesus am nak:
‘Atoni' na'ko uuf ma pah abjaan, namaunun natuin sin annenan aguab anin.
Sin anmo'en lafgua-lafug ma nanaoba' lasi le' ka ma'uu' fa.
26 Ale' kesel pah-pinan nabguan he sin nmakenan ma anmalaban nok Uisnenog.
Ma anakaf sin anneek-abguan he anlaban Uisnenog nok Kristus,
es le' Atonij le' Uisnenog anlulu nanij na'ko faijan unun.’d
27 Namneo, saa' le' baba nai Daut anluul nanij naan, anjali nalali tabug ii. In oten mamnita een. Anbi koot iij in nanan, kesel Herodes ma gubernur Pontius Pilatus nabguan nok hai atoni mnasi sin pah Israel, ma nok anakaf sin na'ko pah abjaan. Sin ala sin namin lalan he anlaban Nai Yesus, Tuaf le' Uisnenog Ho mbeti manij naa.e 28 Mes tabug iij, hai mihine namneo-namneo mak, ale' saa' een naan antoom Uisnenog Ho lomim, natuin saa' le' Ho mufeek manij anbi faijan unun. 29 Koi Usi' Ho miit! Fun tabug iij, sin nhaka'tau kai. Es on naan hai ambaisenu ma mtoti Ko Usi', amfee kai neek hatanis, he tabug hai amnao ma mitoon Tu'in Alekot anmatoom nok Nai Yesus, naik nok neek amtaus. 30 Hai mtoti Ko, he amfee kai kuasat, he hai mibe'i mileko' ale' amenat sin. Ma hai mtoti kuasat amsa' he hai mmo'e ale' lasi sanmakat huma'-huma' he sin nahinen nak, kuasat naan in amneman na'ko Atoni Knino' le' Uisnenog anleek es le' Nai Yesus. Hai onen tuk-tuka' pal-pala' on le' nane, Usi!”
31 Tabug sin an'onen een on nane, umel le' sin nabguan anbi naan, nabeko'. Ma sin ala sin annaben Uisnenog In Asmana Knino' antaam noi sin. Lalit sin anpoin ma natoon Uisnenog In Tu'in Alekot nok maat-maat.
Apalsait een nmoni nabguan anbi susal ma amlilet
32 Es on naan ale' apalsait een noin Nai Yesus, sin nekaf mese ma ansaof mese, ma nmanekan es nok es. Ka tiit fa amakli'at, fun sin nmabatin es nok es. Bale' saa' le' tuaf mese inij anfeel ee he sin ala sin anpake namnes-nesan.f 33 Ma Uisnenog anfee In kuasat noi In haef een, he natonan noi too mfaun sin am nak, “Usif Yesus anmoni nfaan na'ko In amaten. Ma hai miit milalij meki hai matam kiim.” Lalit Uisnenog anfeen sin tetus natha-hoe. 34-35 Anmu'i tuaf na'ko sin le' naan, nasosa' in naijaan, ai' in umel. Ma upaf na'ko bale' een naan, sin nnona' sin noin Uisnenog In haef een. Es on naan sin npake sin he anbaban sekom-sekog le' anmanuuk. Es on naan ka tiit fa tuaf mese le' ankulan saa' es anbi sin.
36-37 Tu'in on le' nai Yusuf. In le' iij, na'ko uuf nai Lewi, ma in na'ko pulau Siprus. (Uisnenog In haef een sin anteke nak ‘Barnabas’, le' in oten anbi hit aguab nak, ‘atonij le' anha'tani nekaf noi tuaf abjaan’.) In annao ma nasosa' in naijaan pisa mese, lalit in nnona' loit een naan noi Uisnenog In haef een.