Nai Petrus naleko' atonij mese le' ao a'olet
3
Anbi nenog mese, leku tenu manas anmaab, nai Petrus nok nai Yohanis annaon anbi Uisnenog In Ume Onen Uuf he an'onen een nok tuaf abjaan. 2 Sin he nnao antaman natuin eno anaek mese le' in kanan ‘Eno' Amasat’. Anbi naan, sin niit atonij mese, le' in haen een an'olen na'ko tabug in inaf nahonis. Nenog-nenog atoni sin anloi nekij noi balel naa, he in antoti saa'-saa' na'ko sekom-sekog le' anpe'o eno' naan he ntaam noi Ume Onen Uuf. 3 Ma tabug in niit nai Petrus nok nai Yohanis he antaman noin Ume Onen naan in nanan, in nnona' in animan ma antoti mnak, “Aijoo, ama' sin! Hi ambaab maan kau fe'. Amfee maan kau saa' es ba-baun.” 4 Sin nua sin nail natesan atoni ao a'olet' naan, lalit nai Petrus naguab am nak, “Ba'e! Mail uum fe'!”
5 Atonij naan na'aiti in matan ma nail sin nua sin. In natenab am nak, “Sin nua sin of he anfee kau saa' es.”
6 Mes nai Petrus naguab am nak, “Ba'e! Au ka 'mu'i fa loit sen mese. Mes tabug iij, au he 'fee ko saa' le' au 'mu'ij. Amneen mulek-leko'! Nok kuasat na'ko Yesus Kristus, atonij Nasaret naan, au 'ak ko: amfeen he amnao nai!”
7 Lalit nai Petrus annaa' atoni ao a'olet naan in animan ane'ug ma nfiti nahakeb. Tabug naan, in haen een naleko nanin. 8 Nok askeken, in ntokaleti, ma annao nuu-mneem he nsobal in haen een. Lalit in nok antaam anbi Ume Onen nok sin nua sin. In annao nok, antokaleti nok, ma anbo'is Uisnenog. 9 Ale' too mfaun een anbi balel naan niit ee annao ma nbo'is Uisnenog.
10 Tabug sin nahinel, sin ansanmakan ma naguab een am nak, “Atonij le' iij, in es le' atoni ao a'olet le' antoti loit nenog-nenog anbi Eno' Amasat, ai'? On meel am es in naleek?”
Nai Petrus naguab anbi Ume Onen Uuf in nanan
11 Lalit atoni' naan annao nabgua nok nai Petrus ma nai Yohanis. Sin tenu sin anteen lopo meinuan mese, kanan ‘Lopo Kesel nai Soleman’. Lalit ale' too mfaun een neman ma nauban sin nok neek sanmakat. 12 Tabug nai Petrus nail niit too mfaun een nane, in anmulai naguab am nak, “Atoni Israel ki! Nansaa' am es au aok-abjaan ala ki, hi msanmaak tabug hi mail lasij ii? Nansaa' am es hi mail kai piut? Nati' hi mak atonij ii nabe'i annao, natuin hai mpake malog oo, ai' natuin hai mmakoe he mituin Uisnenog? Ai' on meel? 13 Au he utoon ki on ii: hit babaf sin, es le' nai Abraham, nai Isak, ma nai Yakop, sin naluli een ma nabesan noi Uisnenog. Uisnenog le' naan, es naiti na'latan In Atonij le' In anpili nanij naan, es le' Nai Yesus. Nai Yesus le' naan, es le' nenog nane, hi maiti maan ma mina'at noi gubernur Pilatus. Gubernur ee he nafetin, mes hi mlaban in lomin le' naan, he naik nafetin Nai Yesus.a 14 Mes Nai Yesus naan, Atonij le' ka nmu'i fa sanat. In nekan naleek. Gubernur ee he nafetin Atonij le' ka nmu'i fa sanat naan, mes hi ala ki amlaban nok matani'. Le' le'uf anneis-nesij hi mikekat he nafetin atoni amo'e amle'ut mese, le' anlolo atoni', he nnona' nafani' noi ki.b 15 Es on naan hi es le' amlolo miis Nai Yesus. Fun kaah, In es le' Uuf noi 'Monit. In amneot, In anmate nalaal je, mes Uisnenog namonib nafani' na'ko In amaten. In le' iij, es le' hai miit Ee nok hai maatm een kiim.
16 Hi mihine mani atoni ao a'olet le' ii. Tabug ii, in nabei' je, mes ka hai fa es le' mileko. Hai ka mmui' fa kuasat saa'-saa'. Kuasat naan neem na'ko Nai Yesus kuun. Atonij ii anfeen ma anhake natuin in npalsai noi Usif Yesus. Fun Usif Yesus naan es le' naleko' nanij ma hi miit meki hi maatm een.
17 Au aok-abjaan ala ki! Tabug ii, au uhiin 'ak hi mok hi anakaf sin ammoe' amle'ut noi Nai Yesus. Mes hi ka mihine fa in apoin on mee. 18 Mes Uisnenog natoon nalali et faijan unun, anpake In mafefa knino' sin am nak, Anah le' In anpili nalaal Je naan lo he napeni ma'ne'at. Lasij naan, anjali nalali. 19 Es nane, hi lo he misaitan hi sanat ma penu sin, ma mbelok amfani iim noi Uisnenog, maut he In annose nani sin, ma ka namnau nteni sin fa. 20 Uisnenog of anha'tani hi nekam sin. Ma Uisnenog of ansonu' nafani' noi ki, Kristus le' In anpili nalalij naan. Ma Kristus le' naan, es le' Nai Yesus le' In anleek nalalij neem noi ki. 21 Na'ko faijan unun, Uisnenog naguab anpake In mafefa knino' een am nak, ‘Uisnenog of nanoon ma naneo ale' kanan lasij, tal antee sin anjalin fe'ug.’ Es on nane, Nai Yesus lo he npao anbi In Balan Aknino' tal antee In neem he na'fe'ug ale' lasij.
22 Baba nai Musa naguab niit amsa' noi atoni Israel am nak,
‘Hi Anakat naan, es le' Uisnenog, of In anleek haef Atonij mese na'ko ki he njali In mafefa knino', on le' In anpake kau ajali' In mafefa'. Es nanet, hi lo he mtaha hi lukem een ma mneen ale' saa'-saa' le' In natoon ki sin.c 23 Mes sekog le' ka nlomi fa he nneen nalek-leko' Atoni' naan In aguaban, Uisnenog of naiti npolin nanij na'ko Inin ma ka anmu'i fa hak anteni nok sin.’d
24 Ka baba nai Musa anmese fa naguab lasij naan. Mes Uisnenog amsa' anpake tuaf abjaan anteni, he anjali In mafefa', ma sin natonan ale' lasin nane msa'. Le' faijan unun Uisnenog anpake baba nai Samuel, he natoon lasin le' muni' ii hit tiit sin teki hit maatk een. 25 Uisnenog anpaa' amsa' noi baba nai Abraham am nak,
‘Na'ko ho sufam-ka'um tuaf mese, Au of a'fee tetus-athoen noi ale' uuf ma pah anfuun am nateef pah-pinan ii.’e
Ale' lasi manpaa' le' Uisnenog anfee sin noi In mafefa knino' sin unu' naan, tabug iij najalib ok anbi hi sonam ma hi tnanam, es le' au aok-abjaan ki atoni Israel ki. 26 Uisnenog anleek haef In Anah le' In anpili nanij, he nalulu' ma naklila' lalan, maut he hi misaitan hi sanat ma penu sin. Nok lalan naan, In naklila' In nekan alekot noi ki. Uisnenog anleek In Anah naan nahunu noi ki, lalit na' In anleek noi uuf ma pah abjaan een. Naan anjali tetus-athoen noi kit ala kit.”