Uisnenog In Asmana Knino' antaam noi sin
2
1-2 Nateef nok atoni Yahudis sin neno naek le' sin anteek nak ‘Neno Pantekosta’,a ale' too mfaun le' natuin Nai Yesus, sin nabguan anbi umel mese.b Nok askeken, sin annenan aluuf mese neem na'ko nenog atnanan nahuum on le' anin nautus. Aluuf naan anae le'uf, tal abiten le' naan ka nmanenan fa hanaf es nok es kalu sin naguab een. 3 Lalit sin niit anteni nahuum on le' ai pina' le anpiin anbi sin mese-mese. 4 Nalalit Uisnenog In Asmana Knino' antaman sin ala sin. Lalit sin naguab een neki aguab pah abjaan, anmatoom nok saa' le' Asmana Knino' natoon noi sin. 5 Tabug naan, atoni Yahudis na'ko balel-balel anbi pah-pinan iij, neem nabguan anbi koot Yerusalem. Sin nekak een namlilen he natuin Uisnenog. 6 Tabug sin anneen aluuf naan, sin ala sin neem nabguan anbi balel naan. Ma mese-mese anneen in aguab na'ko Usif Yesus In haef een sin luluk een. Es on naan sin ala sin ansanmakan. 7 Sin ala sin ansanmakan tal sin naguab een am nak, “Aguab een iij sin ala sin atoni Galilea, ai'? 8 Nansaa' am es hit atneen sin naguab een neki aguab na'ko hit pah ee kuuk mese-mese? 9 Hit ala kit teem na'ko propinsi Partia, Media, Elam, Mesopotamia, Yudea, Kapadokia, Pontus, Asia, 10 Frigia, Pamfilia, Masir, na'ko Libia le' anhaumaak koot Kirene; hit abjaan neman na'ko koot Roma; 11 ma abjaan anteni neman na'ko pulau Kreta, ma pah Arap. Hit atoni Yahudis ma atoni' pah abjaan le' attaam anbi lasi palsait Yahudi. Hit ala kit atneen sin naguab een neki hit aguab mese-mese, anmatoom nok ale' lasi matani' le'uf een le' Uisnenog anmo'e nani sin. Oin ee! Hit tsanmaak ma tamkaak namneo-namneo!”
12 Sin ala sin namkakan, ma sin anmatotin een es nok es am nak, “On meel es anjali on le' ii? In oten ee, saa'?”
13 Mes abjaan na'akan sin, ma naguab een am nak, “Phueh! Naik amloe mok sin, natuin sin anmafu nmaten!”
Nai Petrus naguab noi too mfaun een
14 Nai Petrus, ma Usif Yesus In haef een tuaf bo'es am mese, nokan anbi naa. Lalit nai Petrus neiki ntaam ba-baun, ma naguab noi too mfaun sin le' nabguan anbi naa. In naguab naheel le'uf am nak, “Ina'-ama', aok-abjaan ki ok-oke'! Hi le' atoni Yahudis, ma hi le' iim ma mitgua anbi koot Yerusalem le' iij! Amtaha hi lukem een ma mneen milek-leko' noi saa' le' au he uguab, natuin anmu'i aguab uuf mese, le' au he utoon noi ki ok-oke'. 15 Hi naik mitenab mak sin le' iij anmafun lalu tua min-kase. Sin ka nuug fa he nmafun! Mimnau, ka tiit fa es he ninu lalu he nmafu nok-nok ana. Saa' anteni' fe' leku seo! 16 Hi mneen sin ala sin naguab een neki hi aguab een mese-mese. In amneot on ii: tabug naan, Uisnenog natoon nalali lasi iij noi In mafefa knino' nai Joel am nak,
17 ‘Uisnenog naguab am nak, “Anbi neno amsoput sin,
Au of usanut Au Smanak Knino' noi bifeel-atoni' sin ok-oke'.
Hi aan feto ma hi aan mone,
of Au pake sin anjalin Au mafefa knino' sin.
Hi aan munif sin naan,
of niit saa' le' Au he ululu' noi sin anbi amnitas.
Ma hi atoni mnasi sin naan,
of niit saa' le' Au he uklila' noi sin anboni sin unumait.
18 Nateef neno amsupot sin,
Au 'fee Au Smanak Knino' noi Au aan lelu sin.
Au 'fee noi atoni sin,
ma Au 'fee noi bifeel sin amsa'.
Of sin naguab saa' le' Au utoon noi sin.
19-21 Of Neno Uisnenog antee, mes nahunu na'ko nenog nane antee,
Au of a'mo'e uhunun lasi sanmakat huma'-huma' anbi nenog atnanan.
Lasi sanmakat on le' manas anmesi'ook;
ma funan of mee' le'uf on naa'.
Au he 'mo'e lasi sanmakat manenu le'uf anbi pah-pinan iij amsa'.
Lasin naan, es le' naa', aij, ma masu' le' ansae abgua-abgua noi nenog atnanan.
Ma anbi Uisnenog In nenon le' manenu le'uf sin naan, sekog es le' anhunun ma antoti lasi babat na'ko Uisnenog,
Uisnenog of ansoi nafetin sin.”’c
Naan le' nai Joel anluul nanij, et faijan unun.
22 Au aok-abjaan atoni Israel ala ki! Hi mtaha hi lukem een ma mneen saa' le' au he utoon ki tabug ii. Uisnenog anlulu ma anleek nani Nai Yesus, atoni Nasaret naan. Hai mihine namneo, natuin hai miit meki hai matam, nak Uisnenog anpakel he nmo'e lasi sanmakat nfani lasi mkakan le' manenu le'uf. Hi mihine lasi iij amsa', natuin Nai Yesus anmo'e lasi sanmakat huma'-huma' anbi hi sonam ma hi tnanam. 23 Mes hi amlolo misan, meki lalan amtoti noi amo'e le'uf he ankuus na'peti' In aon-ta'un anbi hau nehe'. Kahaf, naan Uisnenog nahine nalali na'ko faijan unun, ma naan antoom In salit.d 24 Namneo hi mmo'e on le' naan tal antee In anmat namneo. Mes Uisnenog ka nlomi fa he Nai Yesus antuup nabala. Es on nane, Uisnenog nafetin na'ko lasi maten in kuasan, ma namonib nafani'. Fun lasi maten in kuasan ka nabe'ij fa.e
25 Nahunut, kesel nai Daut anluul nani lasi anmatoom nok Nai Yesus, on ii:
‘Au uhiin 'ak Uisnenog nok kau piut-piut.
Es on nane, ka tiit fa saa' es, le' nabe'i he nanofu kau,
natuin Uisnenog anhake piut anbi au bnapak.
26 Au nekak anmaliin, natuin lasij naan;
ma au 'pules u'naeba' Uisnenog piut,
ma au 'alan he 'paog.
27 Fun In ka nfee fa au smanak he natgua nabala anbi balel noi amates sin.
Ma Uisnenog ka npalakan fa In Tuaf Aknino' In Aon-Ta'un he anpunu anbi opug.
28 Uisnenog natoon kau laal a'honis le' amneot.
Es on nane, au nekak anmaliin anmaat,
natuin Uisnenog nok kau piut.’f
Naan le' kesel nai Daut anluul nanij et faijan unun.
29 Au aok-abjaan ala ki! Tabug ii amfee kau meinuan ba-baun, he au uguab nok aknino', aguab le' anmatoom nok baba nai Daut. In naguab on naan, mes in ka anteek on fa noi in tuan anmees. In nmate nalali, ma ansuub nalaal je, ma in opug et hit atnanak fe' tal antee nenog ii. 30 Kesel nai Daut le' naan, Uisnenog In mafefa knino'. Ma in nahiin nak Uisnenog anpaa' neki lasi supat nak, in sufan-ka'un tuaf mese na'ko nai Daut of es annaa' aplenat, es le' Tuaf le' Uisnenog anlulu ma anleek nanij na'ko faijan unun.g 31 Tabug naan, nai Daut nail naloo noi neno amnemat. Ma in natoon nahunu anmatoom nok Tuaf le' Uisnenog anlulu ma anleek nanij. Nak Tuaf le' naan of anmoni nfaan na'ko In amaten. Ma nai Daut nak Tuaf naan amsa' of ka nabala fa anbi balel noi amates sin, ma in aon-ta'un ka npunu niit fa.
32 Tuaf le' nai Daut natoon naan, es le' Nai Yesus! Uisnenog namonib nafani' na'ko In amaten. Ma hai ala kai miit meki hai matam. Namneo, In anmoni nfaan. 33 Tabug ii, Uisnenog naiti na'lat-latan nalali Nai Yesus ma anfee Ne 'toko' ma kuasat anaek anneis. In antoko et Uisnenog In abnapan ane'ug, anbi bale le' Uisnenog nabalab nanij. In Amaf anfee Ne In Asmana Knino', on le' Uisnenog anpaa' nanij et faijan unun. In anpaa' amsa' he anfee kit In Asmana Knino' naan. Es on naan Tabug iij, saa' le' hi mneen ma miit, naan Uisnenog anfee In Asmanan. 34 Nai Daut ka nsae niit kuun fa antee nenog atnanan, mes in anluul niit am nak,
‘Uisnenog naguab noi au usi' mnak,
“Amtook nai anbi Au abnapak ane'ug, anbi balel le' Au uloitan 'anij,
35 tal Au 'mo'e ho musun sin anli'tuun noi ko.”’h
36 Es on nanet, hi atoni Israel ala ki lo he mihiin namneo anmatoom nok Nai Yesus le' hi mkuus misan. In es le' Kristus, le' Uisnenog anpili nanij na'ko un-unu', ma In anjali Anakat noi kit amsa'.”
37 Annenan on nanet, sin neek een natselan. Es on naan sin antoti nai Petrus nok haef abjaan sin am nak, “Eee, ba'e sin! Es on naan tabug ii, hai he mmo'e on mee?
38 Lalit nai Petrus natae sin am nak, “Hi ala ki mese-mese lo he misaitan ma mifetin hi sanat ma penu sin, ma mbelok amfaan mituin Uisnenog. Lalit hi lo he mnona' hi aom een he naslani ki, he anjali a'taka nak, hi mi'te'un ma mi'baino' hi monit he mituin Yesus Kristus In laal a'honis. Naan anjali 'taka amsa' nak, Uisnenog ansako nani ale' kanan hi sanat ma penu sin. Ma hi of mipeni Uisnenog In Asmana Knino' amsa'.
39 Fun Uisnenog anpaa' nani he nfeel Ee noi ale' tuaf le' ntaam anjali Inin. Nok lalan naan, In najalib In lasi manpaa' noi ki ma noi hi sufam-ka'um sin. In npaa' on le' naan amsa' he nfeel Ee noi tuaf abjaan antein.”
40 Nai Petrus naguab amnanu' noi sin fe', am nak, “Tabug ii, too mfaun sin anseken ma nbeon ok na'ko laal a'honis amneot. Es on nanet, hi lo he ampanat milek-leko' he naik hi mituin amo'e amle'ut een sin lalan. Hi lo he mituin noi Uisnenog In lalan amneot ma amnonot naan. Nok lalan nanet, of Uisnenog ansoi nafetin ki, he hi mmoni mibala mokan.
41 Lalit too mfaun sin ansimo nai Petrus in aguab een. Es on naan sin antaam natuin Nai Yesus In Laal A'honis, ma nnona' sin aok een he naslani sin. Nenog naan, tuaf nifun teen antaam anjalin apalsait noi Nai Yesus. 42 Sin anlomin he nabgua nok abjaan sin le' natuin Nai Yesus. Ma sin nmonin leko es nok es. Nenog-nenog, sin anmakoen he anneen lasi noni' na'ko Usif Yesus In haef een. Sin an'onen nabguan. Sin anbukaen nabguan amsa'.
Apalsait een sin amonik een
43 Tabug naan, Usif Yesus In haef een anmo'en lasi sanmakat namfau, tal antee ale' too mfaun sin ansanmakan ma namtaun amsa'. 44 Apalsait een le' natuin Usif Yesus In Laal A'honis naan, nabguan ma anmonin nok nekaf mese, tal saa'-saa' le' sin anmu'ij, sin ala sin anpake nabguan.i 45 Abjaan nasosa' sin bale' sin ma sin amu'ik een, lalit anbati loit een naan noi apalsait een, mese-mese natuin in paluut. 46 Nenog-nenog, sin nlomin he nabguan anbi Uisnenog In Ume Onen Uuf. Sin ala sin anbukaen na'kon umel mese noin umel mese nok neek amlilet. Sin ala sin anmababan es nok es, ma ka napaki nitan fa. 47 Nenog-nenog, sin anpules ma nbo'is Uisnenog ka natfeek niit fa. Abjaan sin le' ka nabgua nok sin fa anmalinan amsa'. Nenog-nenog, Uisnenog ansoi nafetin tuaf abjaan, ma sin antaam nabguan nok Usif Yesus Inin. Tal antee sin nmalolu namfau piut.