Bi Maria nahonis Usif Yesus
(Nai Mateos 1:18-25)
2
1-2 Tabug mese, tabug nai Kirenius nanaak noi pah Siria, kesel anaek, kanan nai Agustus, napoitan plenat nak, “Ale' toog le' anbin plenat Roma in pah, sin al-alasin lo he nfanin noi sin kuan een mese-mese, he anluul kanaf anbin sensus!” Sensus naan fe' ha'el mese anbi plenat Roma, le' anluul ma nso'i too mfau naan. 3 Es on naan too mfaun sin anfanin noin sin kuan, he nok anluul kanaf anbin sensus naan.4-5 Tabug naan, nai Yusuf natgua nbi kuan Nasaret et propinsi Galilea. In nmanaa' nalaal je nok bi bifee munif es, kanan bi Maria, le' na'apu'. On ii, nai Yusuf naan, kesel nai Daut in sufan, es on naan in lo he nfani noi nai Daut in koot Betlehem et propinsi Yudea, he na' anluul kanaf anbin sensus naan.
Es on nane, sin nua sin annaon noi koot Betlehem. 6 Tabug sin anbin Betlehem, bi Maria in tabug he nahoon antee lee. 7 Mes anbi balel naan, sin ka napenin fa ke'an anbi ume losmen sin. Es on naan sin antaman noi o'af mese. Lalit in nahonis in aan unu', li' mone. Es on naan sin ntainuus, ma natupab anbi mu'it een sin bale mnahat.
Uisnenog natoon noi atuukus een
8 Faij naan, anmu'i naan atuku mu'it fauk, le' anbe'an ma ntitu sin abibin ma abibi-kasen. Sin anbe'an anbin amnefu' anbi koot in kotin.
9 Nok askeken, sin niit Uisnenog In ahaket mese na'ko sonaf neno tunan. Lalit Uisnenog in miu-sine antana' natefann sin, es on naan sin namtau nmaten. 10 Mes ahaket naan naguab am nak,
“Hi naik mimtau fe'! Amneen milek-leko', oo! Fun au 'uum he utoon ki tu'in alekot mese. Sekom-sekog le' anneen tu'in ii, of lo anmalinan.
11 Tu'in alekot iij nak on ii:
Nenog iij, anbi Betlehem, et kesel nai Daut in koot naan, anmu'i naan bifeel mese nahonis nalali Kristus!
Kristus naan, Tuaf le' Uisnenog anpaa' nani Je na'ko faijan unun.
Uisnenog anleek Ee neem, he nsoi nafetin tuaf na'ko sin sanat am penu sin!
In le' iij, le' of tuaf anteek Ee nak, ‘Usi'’, fun ale' plenat, In es le' annaa' sin!
12 Hi of mihine Le on ii: hi of miit Li'ana mee mese, le' antainuus naan Ee. In antuup et mu'it een sin bale mnahat.”
13 Ahake naan naguab nalali on nane, nok askeken, Uisnenog In ahaket abjaan na'ko sonaf neno tunan neman namfaun ma nabguan nokan. Ma sin anpules ma nbo'is Uisnenog neki siit am nak,
14 “Hai mtuna' ma milatan Uisnenog In kanan!
In es le' antoko ma naplenat et neno tunan alaat le'uf.
Uisnenog anlomi he nhaal neek ale' mansian sin pah-pinan,
le' anhaliin In nekan!”
15 Lalit Uisnenog In ahake sin anbelok anfanin noin sonaf neno tunan. Ma atuukus sin naan naguab een am nak, “Hoi! Iim he tnao toi Betlehem he tail tiit Li'ana' nael ee fe'! Fun Uisnenog anfee nalali hanaf naan noi kit.”
16 Lalit sin naenan labah noin Betlehem. Ma sin niit bi Maria ma nai Yusuf. Ma sin niit Li'ana mee naan amsa' antuup anbi mu'it een sin bale mnahat.
17 Tabug sin niit Li'ana' naan, sin anmulai naguab een am nak, “Fe'es Uisnenog In ahake sin neman na'kon sonaf neno tunan ma natoon kai anmatoom nok Li'ana' le' iij!” Es on naan sin anpe'on lasij naan tal namsoup.
18 Ale' tuaf amfaun ansanmakan tabug sin nneen atuukus sin naan sin aguab een. 19 Mes bi Maria nahiik ma napaan sin anbin in nekan, ale' kanan lasij le' anjalin naan. Ma in natenab ma namnau he nami niit nak, in oten saa'. 20 Lalit atuukus sin naan anbelok anfanin noin sin mu'it een. Ma sin anpules ma nbo'is Uisnenog In kanan. Sin antotin makasi noi Ne, natuin sin annenan ma niit namnees on le' saa' le' ahake Uisnenog natoon ee naan.
Sin nakanab Li'ana mee naan, Nai Yesus
21 Nahoni' nalali nenog fanu on nane, sin naheli' Li'ana mee naan natuin baba nai Musa in atolan. Ma in inaf-amaf nakanab Ee, ‘Nai Yesus’. Kanaf naan es le' ahake na'ko sonaf neno tunan natoon noi sin, tabug In inaf ka na'apus Ee fa fe'.a
Sin neki Li'ana mee Nai Yesus noi Ume Onen Uuf
22 Anmu'i atolan mese na'ko baba nai Musa nak, bifeel le' nahoni nalali nenog bo' haa, lo he nnao naknino' in tuan anbi Ume Onen Uuf natuin atolan halat. Nok lalan naan, sin nabe'i ntaman noi ume onen on le' bijaas sin anmo'el. Es on naan nai Yusuf ma bi Maria annaon noi koot Yerusalem he nmo'e natuin atolan halat naan. Sin naskau neki Li'ana mee' naan noi Ume Onen Uuf, he nana'at Ee anjali Uisnenog Inij.b 23 Sin natuin Uisnenog In atolan le' nak, “Bifeel le' nahoni li'aan unu', kalu monel, in lo he nana'at li'ana' naan anjali Uisnenog Inij.”c 24 Natuin Uisnenog In atolan, kalu nana'at li'ana' naan noi Uisnenog, in amaihonit sin lo he nfeen afgua'-tulu' kolo-ktuug pasan mese, ai' algua-sisij tipu' nuug. Es on naan nai Yusuf ma bi Maria nmo'e natuin atolan naan.d
Anaef nai Simeon nak Nai Yesus naan, es le' Kristus le' Uisnenog anpaa nanij
25-26 Tabug naan, anmu'i anaef mese, kanan nai Simeon, le' natgua nbi koot Yerusalem. In le' naan, neek maneo' ma namnau Uisnenog piut-piut. Uisnenog In Asmana Knino' natoon ee mnak, in of niit Kristus fe', lalit na' in anmaat. Kristus naan, of es le' ansoi nafetin toog Israelas sin.
27 Tabug naan, Uisnenog In Asmana Knino' neki nai Simeon antaam noi Ume Onen Uuf. Tabug in antaam, in nateef nok Nai Yesus In inaf-amaf sin le' neki Je, he nana'at Ee noi Uisnenog he anjali Inij. 28 Nail Li'ana nane, anaef Simeon ansimog ma naskaug. Lalit in anpules ma nanaeb Uisnenog am nak,
29 “Pules-bo'is noi Uisnenog!
Uisnenog anmo'e ma antao nalali natuin In lasi manpaa' noi kau.
Es on naan tabug iij, Uisnenog nabe'i anfee kau tabug ma meinuan,
he naleko te, au mate kuuk nai a'bi taimamut ma aomina',
30 fun au 'iit ulali Tuaf le' Uisnenog anleek Ee neem,
he ansoi nafetin kit na'ko hit sanat ma penu sin!
31 Uisnenog anlomi he anpake Li'ana' le' iij,
he ansoi nafetin uuf-uuf ma pah-pah sin ok-oke'.
32 In on le' pina',
le' neki lasi tola ma baisenut noi Uisnenog In toog pah Israelas sin.
In on le' miu-sine' maklaha',
le' antana' ma nalulu' Uisnenog In lalan,
noi ale' uuf-uuf ma pah-pah abjaan sin.”e
33 Annenan on nane, nai Yusuf ma bi Maria sin feefk een namkakan, natuin nai Simeon in aguab een naan le' anmatoom nok Li'ana' naan. 34 Lalit nai Simeon naguab anfee tetus noi sin. Ma in naguab noi bi Maria mnak, “Yesus inaf! Of toog Israelas sin ka nsimo fa ho Anah le' ii. Mes sin 'moe't een noi Ne le' naan, of namofu nafani' sin. Ho Anah le' iij, of anmo'e tuaf namfau sin neek een anmalinan. 35 Nok lalan naan, Uisnenog of anfai namkakab too mfaun een sin neek een. Mes ho, Maria, ho of amnaben miit ma'nuka't ka aan'-ana' fa, nahuum on le' suni' napau ho ansaom naan.”
Baba bi Hana antoti makasi noi Uisnenog, natuin Nai Yesus
36-37 Anmui' bifee mnasi mese anbi Ume Onen Uuf naan, kanan bi Hana. In nmoni naan toon bo' fanu mhaa (84) gue. In amaf, kanan nai Fanual na'ko uuf nai Aser. In nmatsao naan toon hitu te, monel anmate nasaitan. Baba bi Hana le' naan, Uisnenog In mafefa knino'. In mepug, es le' an'onen ma nanaah on anbi Ume Onen Uuf faij-manas.
38 Tabug nai Simeon naguab noi nai Yusuf ma bi Maria te, bifee mnasi' naan neem anpaumak-maak. In anneen amsa' sin aguab een naan, lalit in anpules Uisnenog. Ma in naguab anmatoom nok Nai Yesus noi tuaf-tuaf amfaun le' anpa-pao Usif le' Uisnenog anpaa' he anleek Ee neem he nsoi nafetin toog Israelas.
Nai Yusuf sin anfanin noin kuan Nasaret
39 Tabug nai Yusuf ma bi Maria anmo'en nalalin natuin baba nai Musa in atolan sin ok-oke' anbi koot Yerusalem, sin anbelok anfanin noin propinsi Galilea, noi sin kuan Nasaret.f 40 Nai Yesus nanae', nabe'i, anmanoe, ma nahiin lasi namfau. Uisnenog naklila' In nekan alekot noi Ne msa'.
Li'mone Nai Yesus anbi Ume Onen Uuf
41 Toon noi toon, nai Yusuf ma bi Maria annaon noi koot Yerusalem he nokan anbin fesek Paska.g 42 Tabug mese, tabug Nai Yesus anmoni naan toon bo'es am nuug, sin annaon nabgua noin Yerusalem he nokan anbin fesek Paska on le' bijaas, sin anmo'en. 43-44 Tabug nenog fesek Paska sin oke een, nai Yusuf ma bi Maria anfanin noin kuan Nasaret. Sin annaon nabgua nok too mfaun sin le' he nfanin noin Galilea. Mes sin ka nahinen fa nak, Nai Yesus natgua et Yerusalem. Sin nak of oni' In nnao nok In amnono sin. Mes tabug manas anmouf, sin ka niit Ee fa. Es on naan sin anmulai namin nuu-mneem. Sin antotin noi sin nonot sin ma sin amnono sin. 45 Mes natuin sin ka niit ai' nateef Ee fa, sin anbelok anfanin noin Yerusalem, he namij anbi nae.
46 Anteen nae, sin namij nuu-mneem tal antee nenog teen, na' sin niit Ee nbi Ume Onen Uuf In nanan. In antoko ma nmatotin penit een nok kulu agama Yahudi sin. 47 Too mfaun sin le' anneen sin le' naan, ansanmakan, natuin In nahiin namneo-namneo Uisnenog In Sula Knino' In nesan. Ma In natae nahine haan totis een nok alekot amsa'. 48 Nail niit on nane, in inaf-amaf sin ansanmakan. Lalit In inaf nak, “Yesus! Nansaa' am es Ho mususab kai on le' ii? Hai nua kai Ho ama' amfuun mitef-tefan balel-balel anbi lalan ma nbi koot le' ii. Hai mtaka'mana' noi le' hai he miit Ko mbi meel!”
49 Mes Nai Yesus natael am nak, “Nansaa' am es hi msusa mmaat he m'etu Kau? Hi mihine, ai'? Au 'mu'i ulusan et Au Ama' In Umel.” 50 Mes sin ka nahiin naleko fa noi In salit saa'.