2
Nok lalan naan, Uisnenog anmo'e naan neno tunan ma pah-pinan nok in nesan ok-oke'.2 Anmo'e nalali sin ala sin, anmiu on nane, nenog hitu ee antee. Es on naan In nasnaas na'ko In mepug sin naan. 3 Ma In anbeti neno hitu' naan na'ko nenog abjaan sin he anjali neno snasat, natuin In nalali In mepun naan, ma anbi nenog naan, In nasnaas. 4a Tu'in le' natoon nak Uisnenog anmo'e neno-tunan ma pah-pinan, on le' naa.
Uisnenog anmo'e atonij ma bifeel
(Nai Mateos 19:4-6; Nai Markus 10:4-9; 1 Korintus 6:16; 15:45,47; Efesus 5:31-33)
4b Tabug UISNENOG fe' anmulai anmo'e neno-tunan ma pah-pinan nane, 5-6 ka nmu'i fa haug saa'-saa' fe', natuin In ka nasanut fa ulan fe'. Tabug naan, aal anmu'ij haa akum le' ansae na'ko naijaan, ma napeet pah-pinan. Ma ka nmu'i fa fe' mansian le' anfoi naijaan. 7 Lalit UISNENOG annau naijaan, ma anmo'el anjali mansian. Lalit In anfuu nataam asnasaf anboni in panan abolan. Ma mansian naan anmoni tabug naan.
8 Lalit UISNENOG anseen naan po'an mese anbi bale Eden, et pesit manas asaen. Ma In natokob mansian naan anbi balel naan. 9 Anbi po'an naan In namonib ale' kanan senat, le' tail ee te namasan, ma taah sin ate namiin. In namonib amsa' haug uu' nuug anbi po'an in atnanan. Kalu mansian neku hau fgua na'ko uu' mese in afguan, in of anmoni piut. Ma kalu mansian neku na'ko uu' mese anteni' in afguan, in nabe'i nahine lasi alekot ma lasi le'uf.
10 Anbi naan, anmu'i naan noel mese, ansai anpoi na'ko po'an naan. Noel naan seki haa. 11 Seki ahunut, in kanan Pison. Seki iij ansai anfuun naan pah Hawila. Anbi balel iij, anmu'i mnatu' namfau. 12 Anbi balel le' iij, anmu'i amnatu afa', anmu'i haug le' in oen anfoo mein, ma nmu'i fatu aklima'. 13 Seki mese anteni', in kanan ee Gihon. Seki iij, ansai anfuun anbi pah Kus.a 14 Seki mese anteni', in kanan Tigris. Seki le' iij anjali nakat anbi pah Asurb antoot manas ansae. Ma in seki amunit, kanan Efrat.
15 UISNENOG anleek mansian naan natgua anbi Eden, he npaloli po'an naan lek-leek. 16 Ma In naplenat mansian nane mnak, “Au 'kolen ko he meku hau fgua saa'-saa', na'ko ale' kanan senat anbi po'an ii. 17 Mes anmu'i naan haug uu' mese, le' Au 'taal ko matani', he naika meku in afguan. Haug naan es le' hau sena' le', kalu mansian ee neku in afguan, in nabe'i nahine ale' lasi alekot ma lasi amle'ut. Mes kalu ho mekug, ho lo of ammaat.”
18 Lalit UISNENOG naguab anteni' mnak, “Ka naleko fa kalu mansian iij anmoni anmes-mees. Es on naan Au he 'mo'e 'fee ne ababat ma atultakus mese le' namnees nokan.”
19-20 Tabug naan UISNENOG annau naijaan, ma anmo'e mu'it ma kolog huma'-huma'. Lalit In annao naat sin noi mansian naan, maut he in nakanab sin. Lalit mansian naan nakanab mu'it ma kolog naan, mese-mese nok kuun in kanan. Mes noi in, ka nmu'i fa ababat-atultakus mese, le' natai nokan.
21 Lalit UISNENOG anfuli natupab mansian naan. Tabug in antuup anfiin ite, Uisnenog naiti naan in nui bnapa' tukaf mese, lalit In antobe naleko' papa' naan. 22 Ma In anmo'e bifeel na'ko nuif naan. Lalit In nnona' bifeel naan noi atonij naan. 23 Tabug atonij ii niit bifeel naan, in nak,
“Haaa! Iij ee fe'! Iij lo namnees nok kau!
In nuif een huma' mese nok au nuug.
Ma in peen huma' mese nok au peek.
Natuin in anjali na'ko atonij, es na' au ukaanb ee, ‘bifeel’.”c
24 Natuin lasij naan, es na' atonij mese lo he annao nasaitan in inaf-amaf,
he nmoni nabgua nekaf mese ma ansaof mese nok in feel,
henati' sin nua sin anjalin mese.
25 Tabug naan sin moons een, mes sin ka nmu'in fa lasi mael ba-babaun amsa'.