Mansian ee ka nfaloli fa plenat Uisnenog
3
Na'ko ale' kanan amonit le' UISNENOG anmo'e nani sin anbi pah-pinan iij, kauna' es aputa-kliun abainesit. Anbi tabug mese, kauna' naan antoti noi bifeel nane mnak, “Hoi! Namneo, oo? Uisnenog antaal ki mnak, ‘Ka nabe'i fa he hi meku hau fgua na'ko senat sin anbi po'an iij, ai' kaha?”’ 2-3 Bifeel naan natael ee mnak, “Kahaf! Hai mibe'i meek! Mes anmu'i naan senat uu' mese et po'an ee atnanan le' Uisnenog antaal kai, he hai naik meku in afguan. In nak, hai naika meku in afguan, ma naik am'abaleog ee msa', natuin hai of ammaat.”
4 Mes kauna' naan natael ee mnak “Hoi, In namoe! Hi ka mmate fa! 5 Uisnenog namneo antaal ki on naan, natuin In nahine, kalu hi meku hau fgua naan, hi hinem een namnees nokan. Hi of mihine meel es alekot, ma meel es amle'ut.”
6 Lalit bifeel naan nail, hau sena' naan lekon ee kaah. Ma in annaben hau fgua naan minan ee kaah. Es on naan in natenab am nak, “Kalu au 'eku hau fgua iij, au of uhiin ma 'manoe.” Lalit in ansiu hau fgua naan, ma in nekug. In nekij ma anfeen in monel amsa', he neku nok. 7 Neku nalalin on nane, na' sin nahinen nak sin moons een. Es on nane, sin nkato nakluta' hao noo' ma ntapas he n'abtain.
8 Manas anmabe on nane, sin anneen UISNENOG neem annono po'an naan. Lalit sin naen nakolo een henati' UISNENOG naika niit sin. 9 Mes UISNENOG no'en atonij nane mnak, ‘Augoo! Ho esa meel ee, Adam?”
10 Atonij naan natael Ee mnak, “Au 'neen Ho lakam ambi ii. Mes au umaeb ok, natuin au ao monas kau. Es manum au 'aen ukolo'.”
11 Lalit Usi' natael ee mnak, “Sekog es natoon ko mnak ho m'ao moons om? On mee? Of oni' ho meku mulali hau fgua le' Au 'taal ee nane, ai'?”
12 In natael Ee mnak “Usi', bifeel le' Ho mfeel ee naan, in es anfee kau hau fgua talas naan, ma au 'ekug!”
13 Lalit UISNENOG naguab nok bifeel nane mnak “Nansaa' am es ho mmo'e on naan?”
Ma bifeel naan natael Ee mnak,“ “Natuin kauna' naan es namoe kau! Es manum au 'eku hau fgua talas naan.”
Uisnenog ansukat sin neki hukum matani'
14 Lalit UISNENOG naguab sukat noi kauna' nane am nak,
“Natuin ho mo'em iij, Au 'hukum ko. Na'ko ale' kanan mu'it, aal ho mees-mese kuum es le' mupeni sukat on ii: anmulai na'ko tabug iij tal antee ho mmaat, ho aal amnonok meki ho taim. Ma ho mnahat sin es afu skuku'. 15 Au of a'mo'e ko mok bifeel naan, ammamusun piut. Hi sufam-ka'um sin on nane msa'. Ho sufam-ka'um sin of ansau sin haek-tiik een. Mes in suufn es of antutu naklati' ho nakam.”a
16 Lalit Uisnenog naguab noi bifeel nane mnak,
“Au of uloulu' ho susal tabug ho mu'apu', ma mumeen anneisi nteni' tabug ho muhoon. Mes maski on naan, ho mlomi he mubgua piut mok ho monel. Ma in es naplenat ko.”
17 Lalit Usi' naguab noi atonij nane mnak,
“Ho ka mutuin fa Au plenat, mes mutuin ho feel in lomin, tal antee ho meku hau fgua le' Au 'taal ee naan. Es on nane, ho mupeni sukat amsa'. Ma naijaan sin amsa' napeni sukat. Anmulai na'ko tabug iij tal antee ho mmaat, ho lo he mmepu amtepon ho aom, ma mubaino' naijaan, hena' ho mupeni he meek. Ammepu on nane, he na' ho mmoon. 18 Maski ho mseen ma mulgue huma'-huma', mes naijaan sin aal napoitan kisan ma klabat. 19 Lalit ho lo he mmepu amtepon ho aom matani', hena' naijaan sin anfee ko amnahat. Ho lo he mmepu ma pusel ansai tal ho mmaat. Au 'mo'e ko na'ko naijaan. Es manum kalu ho mmate te, ho mfani amjali naijaan.”
20 Lalit nai Adam nakanab in feel nak ‘bi Hawa’ (in oten es ‘le' anmoni’), natuin bifeel naan es le' anjali inaf noi ale' mansian amonit anbin pah-pinan ii.b
21 Lalit UISNENOG anmo'e tais na'ko pasug, ma anfeen sin he anpaken.
Uisnenog anli'u napoitan nai Adam ma bi Hawa
22 Lalit UISNENOG naguab am nak, “Tabug iij mansian een nahinen lasi alekot ma lasi amle'ut on le' Hit.c Naik-naika sin neku hau fgua le' neki 'honis nabal-baal.” 23 Lalit In anli'u napoitan sin na'ko po'an Eden, he sin nua sin annaon noin balel abjaan, ma anmonin on atoni tani, he sin 'etus-amnamit een na'ko naijaan. 24 Anli'u nalali sin on nane, Uisnenog anlelu In ahake manine' een na'ko sonaf neno tunan,d he annao npao po'an naan anbi pesit manas asaen. Sin nna'an suni' le' anpiin ma an'ote nuu-mneem. Usi' anlelu sin he nhaken na'eka' lalan, natuin In ka nlomi fa he tuaf ansiu naan hau fgua le' neki 'honis nabal-baal.