3 On nane msa', neu bifee mnais enu. Am'eut meu sin he sin npanat sin 'tokok ma sin 'hakek, ma sin lo mees he nmonin natuin ahaa Uisneno In i'lomin. Kais na'munu' ma na'siu' tuaf bian sin kaank eun. Kais anmonin anbin mafu. Mes sin lo mees he nanoina' tuaf bian he sin anmonin nok leko. 4 Nok lanan nane, sin nlalin a'heta' neu bifee amamonet muin eun, ma nanoina' sin he es-es ate nneek in mone ma in aanh enu. 5 Sin lo mees he nanoina' sin he nmonin nok neek tainine', nmonin nok neek aknino', npaloil nahiin sin ume nanan, es-es ate antola' kuun in mone, ma maut he in mone na'naak anbi ume nanan. Kaul sin anmonin on nane te, of ka tiit fa tuaf he na'uab na'le'uf Uisneno In A'an ma Plenat.

6 On nane msa', amfaineek atoin muinf eun, he sin nmonin nok neek tainine'.

7 Titus! Ho lo mees he mmoin nok lek-leko, he mlali 'heta' meu tuaf bian. Ho mmoe' saa'-saa' aah, mmo'e nok leko, paap mese' on le' ho munoina' biak enu. Teeb, ho lo he mmeup namneo-namneo. 8 Kaul ho munoina' tuaf bian, lo mees he na'uu' na'ko noina' amneot, he biak eun kais nakle'at ko. Nok lanan nane, tuaf-tuaf le' anlaban kit, namaeb ok, natuin sin ka nmu'in fa lanan he ntumatan kit.

9 Munoina' ameupt eun he natniin sin a'nakat anbi ale' kanan lasi ma nhaliin in nekan. Sin kais anmatoen nok sin a'nakat. 10 Sin kais nabaak neik sin a'nakat in iblua' enu. Sin lo mees he naklila' nak sin tau'k eun atoni neek amneot ma atoni mapalsai. Sin lo mees he nlalin atoin leko le' na'ki'an. Kaul biak eun nanesa' ameupt eun sin i'moink eun, natuik ma natai nok saa'-saa' le' hit tanoina' sin, sin of anteebs eun ma nak, noina' nane lo leok le'uf. Fun hit tanoina' anmatoom nok Uisneno le' ansoi nafetin kit.

11 Fun Uisneno naklila' nalail In nekan alekot neu ale' mansian ok-oke', ma nfei laan a'honis he nsoi nafetin naan mansian na'ko sin saant enu. 12 Es nane te, hit lo mees he ttitel tapoitan monit amle'ut ma ale' tenab maufinu. Hit tmoni tbi pah-pinan tabu ii, lo mees he ttahan tahiin hit ta'uk, tmoni tbi neek aknino', ma ta'kii' atbi Uisneno. 13 Tabu ii, hit tpa-pao, he tabu Yesus Kristus ankoen On anfain neem, In neem anbi pina' ma klaha'! Nane anfain tetus neu kit ok-oke'. In le' nane, hit Usi' le' ma'tane' anneis, le' ansoi nafetin naan kit. 14 In nnona' In ta'un anlail fua-'tulu', he nsoi nafetin kit na'ko hit saant eun ok-oke', he nmoe' kit atlail In nonot ma In asal le' anmonin nok neek aknino', ma nlomin he nmo'en lais leko piut.^a

15 Titus! Munoina' lasin le' ii ok-oke' meu too slani'. Mfaineek' sin he sin natuina' noin' enu. Sekaum-sekau nmo'en saan ate, m'etun sin laan leko. Ka nabei' fa he atoni' annebe' ma nanebet ko, natuin ho mmui' hak he mmoe' lasin nane.