Na' Paulus in sulat hae nua
neu in soob leko na' Timotius
2 Timotius
Taben ma haan se'ot
1
1-2 Timotius, atoin leko!Sulat le' ii na'ko au, na' Paulus kau, le' Uisneno neikn On anluul kau he 'lail Yesus Kristus In haef. Sin anleek kau nfain haef he 'nao 'eut lasi anmatoom nok 'monit le' amneot, le' Uisneno nba'an he nfee neu ale' apalsait eun neun Yesus Kristus.
Timotius! Ho on le' au aanh aa kuuk. On nane te au 'onen he hit Ama' Uisneno, ma hit Usi', Yesus Kristus, anneek ko, naklila' Sin neek leko neu ko, ma nfee ko monit mbi mamut ma tainine', ma halan nekaf es nok es.a
Na' Paulus antoit makasi neu Uisneno
3 Au 'onen fai-manas ma 'teek ko. Au 'toit makasi piut-piut 'eu Uisneno, natuin ho mutuina' piut. Au 'tuthae Ye nok neek aknino', on le' hit bei' ma hit nai' sin antuthae Ye. 4 Au umnau, tabu hit tbaits ok neno nane, ho mkae nme-me'ul. Etun au 'loim he u'eku 'tein 'ok ko, maut he au 'maliin.
5 Au umnau neno nane, tabu ho mmulai mpalsai namneo-namneo meu Usif Yesus. Lais palsait human on le' nane, na'uu' ma na'baa' nain na'ko ho bei' bi Luisa, ma ho eina' bi Yunika in nekan. Ma au 'tebes amsa' 'ak lais palsait human on le' nane anmoin et ho nekam amsa'.b
Na' Paulus antoit he na' Timotius anpaek manoef ma hinef le' Uisneno nfee ye
6 Neno nane, tabu au 'ait au 'niimk eun ma 'tao sin 'eu ko, oka te au 'onen a'teek ko, tabu nane Uisneno ntao ko manoef ma hinef he ho mube'i mmeup meu In. On nane te tabu ii, au 'toit ko he munaoba' mufani' ho manoef ma hinef nane. 7 Fun Uisneno In Ismanan ka nmoe' kit fa he tlail amtaus. Mes In nmoe' kit tlail tuaf-tuaf le' na'bei' ma npalsai in ta'un, le' anmaneek nahiin, ma nafleu nahiin in ta'un lek-leko. 8 On nane te kais ammae he mu'uab anmatoom hit Usi'. Ma kais ammae natuin anhukun kau et uim o'of. Au 'taam o'of le' ii, natuin au 'tuthae hit Usi'. Es nane te kaul ho m'eut Lais Leko nane te, ho lo mees he muloitan ho ta'um he mloi suset ma ma'ne'at on le' hai. Kaul ho mupein suset ma ma'ne'at on le' nane, Uisneno of anha'taen ko.
9-10 Natuin Uisneno es ansoi nafetin naan kit na'ko hit sanat ma hit penu sin.
Ma In es anpiil naan kit he tlail In tuaf eun le' atmoni knino'.
In naklila' In nekan leko neu kit, natuin In nneek kit.
Te kahaf, hit ka tmoe' tiit fa saa'-saa' es, he hit maso'ik he tsium In i'lekon.
Uisneno fe' ka nmoe' fa' pah-pinan ii, mes In nafeek nalail he nleek Yesus Kristus neem,
he naklila' In nekan alekot, ma nsoi nafetin kit.
Nalalit Yesus Kristus neem anlail, ma nfei nlail salit nane,
Ma In npukai lasi 'maten in kuasan!
Ii nlail Lais Leko!
On nane te sekaum-sekau le' anpalsai neu Yesus Kristus, ka nmate ntein fa yen, mes anmoin piut nok Uisneno.
11 Etun Uisneno nait kau 'lail haef 'eu Yesus Kristus, he au 'eut In Lais Leko, ma unoina' sekaum-sekau anbi mee-mee.c 12 Lasin le' nane ok-oke' anmoe' kau m'es na' au upein 'ha'mu'it et uim o'of ii in nanan. Mes au ka umaeb ok fa! Natuin au uhiin sekau es le' au 'palsai. In es le' Usif Yesus. Ma au uhiin namneo-namneo 'ak In es le' nana'at kau mepu le' ii, In es le' anpanat ma npao mepu le' ii, ma In es le' anha'taen kau he au ubei' ma unaob mepu le' ii, tal antia In nkoen On anfain neem. 13 On nane te mutuin nai 'heta' anbi 'monit na'ko noina' amneot, le' au uklila' sin 'eu ko. Kaul ho mpalsai piut-piut, ma mneek sekaum-sekau, ho m'eut ma muklila' mak ho mmafuut mok Yesus Kristus. 14 Uisneno nana'at nalail a'mu'if ma'upa' huum es et ho 'nimam, es le' noina' amneot. On nane te ampanat mulek-leko' a'mu'if le' nane! Ampaek Uisneno In Smaan Aknino' le' et hit nekak, maut he In nbaab ma ntuntaku ko, he mpanat a'mu'if nane lek-leko.
Na' Onisiforus antulun na' Paulus anbi uim o'of
15 Ho of amneen mulail nak na' Figelus ma na' Hermogenes, nok atoin bian na'kon propinsi Asiad nasaitan kau yen. 16-18 Mes na' Onisiforus ka on fa nane. In ka nasaitan kau fa. Ho muhiin kuum, tabu au fe' a'bi koot Efesus, in nbaab ma tuntauk kau piut. Tabu ii, in natua yen et koot Roma ii. Tabu in neem antia, in naim kau neu-mneem anbi mee-mee. Namuni te, in na'euk nok kau nbi uim o'of. Mes in ka nmae fa. Hae'-hae' in neem anbi uim o'of, ma nha'taen au nekak.
On nane te au 'onen ma 'baiseun 'eu Uisneno he naklila' In nekan alekot neu na' Onisiforus nok nain in nonot ma in asal sin. Anbi neno amsoput ate, tabu Uisneno nafeek mansian eun sin lasin, au ufneek ma u'paen he kaul leko te, Uisneno nafeek lais alekot neu na' Onisiforus sin.