Sulat na'ko a'naak aklei uuf, kanan
na' Yakobus
Taben ma haan se'ot
1
Taben ma haan se'ot na'ko au, na' Yakobus kau. Au le' ii, Uisneno ma hit Usi', Yesus Kristus Sin aan lenu ma aan leka'.Au 'tui sulat le' ii, ma 'sonu neit neu ki atoni Yahudis le' hi mituin amlail Usif Yesus, le' hi mitua et ale' pah-pah.a b
Kaul anmui' ha'mu'it, malan ma mpalsai piut meu Uisneno
2 Au aok-bian aal ki! Au he utoon ki on ii: kaul hi mi'euk mok suset huma'-huma' te, kais amneek 'oel. Amsimo suset nane nok neek malinat, natuin namuni te, of leko. 3 Fun hit tahiin tak, kaul hi malan ambi suset on nane te, ma hi msoi maan om mi'ko fulit pah-pinan, ma hi fe' mpalsai piut meu Uisneno, nane anmoe' hi neekm eun nane antainiin eun, kaul hi mipein lais fulit pah-pinan bian. 4 Hi kais amtet-koit mi'ko suset. Maut he hi mibei' minoina' he malan ambi suset, tal antia hi minokab ma mitiis yom. Nok lanan nane, hi mlail tuaf le' mimnasi mbi 'taos' mam o'et, ma ka mkulan fa saa' es amsa'.
Attoit saa' es na'ko Uisneno, lo hit kais atneek nua' ok
5 Kaul na'ko hi aal ki, le' mitniin hi tau'm eun ka mihiin fa laan a'poi' na'ko suset, hi mibei' he mitaan meu Uisneno, le' nahiin ale' saa'-saa'. In es le' nabei' naklila' laan a'poi' neu ki. In es le' anfei lanan nok neek malinat, ma In ka nato'an ki fa, kaul hi mtoti Ye. 6 Mes kaul amtoti Ye, lo he nekam kais na'oina'. Hi lo he mpalsai namneo-namneo mak, In nabei' anfee saa'-saa' le' hi mtoti ye nane. Fun kaul hi mtoti nok neek a'oina' hi mlail on le' okin le' anpee' ma nasaan on piut-piut natuin anin a'naek. 7-8 Tuaf-tuaf le' na'beko' labah, in nekan ka nhake nkii' fa nbi ale' kanan lasi. In kais nafnekan nak, in of napein saa'-saa' na'ko Uisneno.
Ama'mu'it ma amu'it
9 Atoin ama'mui't eun le' anpalsain nlalin neun Usif Yesus, sin lo he nhalinab sin neek eun, natuin Uisneno nait sin anlalin In fomili sin.
10-11 Ma atoni amui't eun le' anpalsain nlalin neun Usif Yesus, sin lo he nmalinan amsa', natuin Uisneno nanoina' sin he kais na'naeb ok. Tabu ii, sin nahinen namneo nak, sin i'mui'k eun of namnekun, on le' tuna' le' nasuuf ate leokn ee kah een, mes ka 'loo fa te, manas ansae ma ntana' tuna' nane, nalalit anmaknene'. On nane amsa', atoni amui't eun. Maski sin ntaisibun nok sin ulusn eun, mes sin namnekun nfinin amsa'.c
Ale' kanan lais leko amneman na'ko Uisneno, mes lais maufinu ka na'ko fa Uisneno
12 Uisneno anfee tetus-athoes neu tuaf-tuaf le' nalan anbi lais fulit pah-pinan tal antia npoi nfiin. Nalalit in ansium in upa 'honis le' Uisneno nba'an nalali he anfee ye neu tuaf-tuaf le' anneek Ee. In ansium in upan on le' ansimo klaa mnatu'.d
13 Mimnau milek-leko'! Kaul anmui' tuaf na'ko hi aal ki le' napein lais fulit pah-pinan, ma anloim he nmoe' sanat, kais amtumatan mak, “Nane, Uisneno es le' ansuu' kau!” Fun Uisneno ka nloim niit fa he nmo'e nsaan. Ma In ka nsuu' niit fa es amsa', he tuaf nane anloim he nmo'e nsaan. 14 Fun sanat npoi na'ko atoni' in neekn aa kuun. Nahunu te, in nekan nane anloim he nmoe' amle'ut, nalalit in nmulai natenab neu-mneem he nmoe' lais amle'ut. 15 On nane te in nmoe' natuin tenab amle'ut nane. Namuni te, Uisneno anhukun na'maet tuaf-tuaf le' anmo'en amle'ut.
16 Au aok-bian manekat aal ki! Kais tuaf es napoiba' ki npaek lasin le' ii.
17 Lais maufinu ka na'uun fa na'kon Uisneno. Mes In anfee kit tetus-athoes leko, ma ale' saa'-saa' le' knino' amsa'. In es le' anmoe' manas, funan ma kfuu' enu. Sin aal sin na'onin et neno tnanan, ma nmoe' sin haofk eun na'bain eun piut-piut. Ala Uisneno kuun es le' ka na'baina' niit fa. 18 Uisneno naloitan ma nabalab nalali neu kit on ii: In anfee In A'an ma Plenat amneot neu kit. Ma In npaek In A'an ma Plenat nane, he namonib kit. Na'ko ale' kanan saa'-saa' le' In anmoe' sin anbin pah-pinan ii, In npili nlail kit he tlail In hau fua unu'.
Amneen ma mmoe' mituin Uisneno In A'an ma Plenat
19 Au aok-bian manekat aal ki! Mimnau! Noina' alekot, on ii: kais mi'uab luum-luumn aah. Leko nneis, kaul anmui' tuaf bian na'uab leko, hi mneen milek-leko'. Ma kais labah ate mitoo'. 20 Natuin kaul mitoo', atoni ka neu he nmoe' fa lais leko natuin Uisneno In i'lomin.
21 On nane te hi lo he misnasab hi tau'm eun mi'ko 'moe' sanat, paap mese' on le' atoof lene antoof in lene, nalalit notu knuut eun nane. Ma hi lo he msimo Uisneno In A'an ma Plenat nok neek amnebet amsa'. A'an ma Plenat nane, on le' fini le' ansenan ma anbebin sin et hi neekm enu. Kaul hi mmoe' on nane te, Uisneno of nsoi nafetin nain ki na'ko hi saant eun ok-oke', ma ansium ki, nalalit hi mmoin mibal-baal mokan.
22 Ma kaul hi mihiin milail Uisneno In A'an ma Plenat sin ite, hi lo he mmoe' mituin sin. Kais amneen aah! Kaul hi mneen ahaa, ma ka mmoe' mituin fa, hi mipoib hi tau'm eun kiim. 23-24 Kaul atoni' anneen nalali A'an ma Plenat nane, ma ka nloim fa he nmoe' natuin sin, in on le' tuaf le' ankius in human anbi 'nino'. Mes tabu annu'u' nlail ma nasaitan 'nino' nane te, in nnikan nain in human. 25 Mes hi kais amnikan he mpalekas milek-leko' Uisneno In A'an ma Plenat le' namtiis, le' nabe'i nsoi nafetin naan atoni' na'ko in saant eun ok-oke'. Uisneno of anfee tetus-athoes neu ki anbi ale' kanan saa'-saa' le' hi mmoe' sin, lamun hi mneen ma mituin In A'an ma Plenat. Kais ala ntaam anbi hi lukem a'lii, nalalit anpoi nfini nao' hi lukem a'ne'u.
26 Kaul tuaf ankee yon nak in atoni amakoet anbi lais Uisneno, mes ka nafleu nahiin fa in fefan, tuaf nane in napoib in tau'n aa kuun. In lais palsait nane, palsuum aah. 27 Natuin lais palsait le' knino, ka nalaih kuun fa. Nane es le' anhalineb Ama' Uisneno In nekan. Lais palsait le' namneo on nane, in nmoe' tuaf anloim he nbaab ma ntuntaku bifee baun eun, ma manat sin. Tuaf le' na'kii' anbi lais palsait on le' nane, ka nlae natuin fa fulit na'ko lais amle'ut, ma npanat in kanan foo bona'.