Sulat le' ii, na'ko au na' Paulus kau, Uisneno In aan lenu ma aan leka', ma Yesus Kristus In haef. In ansonu' kau he 'nao 'ha'taen neek palsait 'eu tuaf eun le' In npiil naan sin. In nsonu' kau msa' he 'eut laan amneot he sin nmonin natuin Uisneno In i'lomin. Nok lanan nane, Uisneno In nonot ma In asal sin, nafnekan he anmonin piut-piut nokan. Tabu Uisneno fe' ka nalalib fa pah-pinan ii te, In nba'an nain nak, In nonot ma In asal sin of anmonin piut nokan. Ma In ka napoib nahiin fa. Antia in tabu on nane te, Uisneno an'eut maat-maat ma nak, In he nsoi nafetin mansian na'ko sin saant eun, he sin nabe'i nmoin nabal-balan nokan. Nalalit In naplenat kau, he 'nao 'eut Lais Leko nane 'eu mansian ok-oke' 'bi mee-mee.

Titus! Ho on le' au aanh aa kuuk, natuin hit nua kit atpalsai teu Kristus. On nane te au 'onen 'eu Ama' Uisneno, ma Yesus Kristus le' ansoi nafetin kit, he Sin naklila' Sin nekak alekot neu ko, he ho mmoni mbi mamut ma tainine', ma halan nekaf es nok es.^a

5 Neon wes, au ufeek he usaitan ko mbi pah Kreta, he ho mube'i m'atol maan mepu fauk ambi nane. Maut he ho mpiil maan a'nakat-a'nakat neu too slani' anbin koot mese'-mese'. Kais amnikan atolan le' au 'eut ulail sin 'eu ko, anmatoom nok tuaf-tuaf le' na'naak too slani', es eun le': 6 kaul amloim he mpiil tuaf he na'naak ma nnaa' too slani', in lo mees he kais anmui' sanat saa'-saa'. In lo mees he na'kii' anbi mafeet nok bifee mese'. In aanh eun amsa' anpalsain Yesus Kristus. Kais-kaisa' biak eun nak, sin le' nane, es le' anmo'en taisibu, ma ntanhai atolan. 7 Natuin a'naak too slain eun nane, nanaob Uisneno In mepu, on nane te sin lo mees he nmonin nok neek amneot, ma sin kaank eun lo nfoo bonan. Kais ampiil maan tuaf le' anloim he na'naeb in ta'un; le' naak fa haa te natoo'; abukae tua mafu; amatoes; ma akoom noni. 8 Tuaf le' na'naak neu too slani' sin lo mees he nlomin he nsium sekau yah anbin sin umen. Sin lo mees he nlomi yaa lais leko; neek tainine', atai lasi nok amneot, neek aknino', ma nalan nahiin in ta'un. 9 Sin lo mees he nnaa' namep-mepan Uisneno In A'an ma Plenat, le' nahunu te hit tanoina' ma tatoon sin neu sin. Nok lanan nane, sin nabei' naklila' Uisneno In laan amneot neu biak eun, ma nabei' namneoba' naan noina' le' anpeon.^b

10 Fun anmui' tuaf namfau le' anlomin he nlaban noina' le' amneot, le' na'uab eun ate, ka na'uu' fa ma nputa-bliu yaah. Anneis-neis atoin Yahudis sin, le' nak ale' too mfaun eun le' anloim he napenin saok sanat ma laan a'honis, lo mees he na'heli sin. 11 Sin nasekeb fomili a'teem-'teme, he sin na'loon na'kon Uisneno In noina' le' amneot, ma npaek sin noina' le' ansaan ma anpeo. Sin ala he naimn ahaa noni, anpaek lanan le' he napoib aah. Tuaf-tuaf on le' nane, lo mees he mufleu sin feefk eun, maut he sin kaisa' nanoina' ansanan piut-piut. 12 Neno wes, sin amnait nee yes na'ko pah Kreta an'eut kuuk sin nee ma nak,

13 Namneo. Abiit eun bale nane, on le' nane! On nane te ho lo mees he mutuuk apoib eun nane, he mha'tane mtein sin lais palsait neu Uisneno. 14 Nalalit sin kais natniin antein atoin Yahudis sin i'leet poi nuu, ma sin kais natuin plenat na'ko tuaf-tuaf le' antite anpaisan noina' amneot.

15 Mumnau mulek-leko'! Neu tuaf le' in nekan knino' te, ale' saa'-saa' amsa' knino'. Mes neu tuaf le' in nekan nameis'ook ma ka npalsai fa Uisneno, ale' saa'-saa' amsa' nameis'ook. Natuin sin neek eun ma teenb eun nalaih nanin. 16 Sin nmanakun ma nak sin nahiin Uisneno. Mes sin i'moink eun, on le' ka nahiin Ee fa. Sin na'uab eun ate, 'teta', mes anmo'en ate, 'teta'. Namneo-namneo sin lo atoin neek amle'ut! Sin ka nlomin fa he natuin Uisneno In i'lomin. Kaisa' mifneek meu tuaf-tuaf on le' nane, natuin sin ka nabei' fa he nmo'en lais leko!