Atoni Kristen sin i'monik le' amneot
3
Mumnauba' too slani' he sin natniin anaa' apleent eun, ma tuaf-tuaf le' anna'an kuasat. Ma sin lo mees he natuin atolan. Sin lo mees he naloitn ok piut he nmo'en lais leko. 2 Kais muktuta' uab neu-mneem he na'le'uf tuaf bian sin kaan alekot. Ma sin kais anloim lais matoes. Leko nneis, anmonin nok lek-leko ma neek leko neu sekaum-sekau wah.3 Natuin afi unu', tabu hit fe' ka tahiin fa Usif Yesus, hit ka tahiin fa saa'-saa', ma napoib kit ite, labah. Hit ka tloim fa he atneen tuaf bian. Hit tmoni tbi yaa le' he tatuin hit neek maufinu, ma takleo hit ta'uk nok lais sinmakat huma'-huma'. Hit taklapa' teu tuaf bian. Hit i'monik naheun nok mantinos. Hit tloim he tabela' neek to'as teu tuaf bian, tal antia atmaufiun teu sin. Nalalit sin on nane msa' neu kit.
4 Maski hit i'monik namleu' on nane msa', mes Uisneno es neikn On ansoi nafetin kit, In naklila' nalail In manekat amsa ma In neek alekot neu kit. 5 In nsoi nafetin kit, ka natuin fa hit lasi mnamit atbi 'moe' leko, mes natuin In nneek kit. In nboe naknino' hit saant eun, anpaek In Ismana Knino', he na'fe'un hit i'monik paap mese' on le' nahonis nafani' kit. 6 Natuin Yesus Kristus anmate nlail he nsoi nafetin kit na'ko hit saant eun, etun Uisneno nathoeb In Ismana Knino' neu kit. 7 Natuin Na' Yesus In nekan leko, etun In naleko' hit lais matalus tok Ama' Uisneno, paap mese' on le' hit tlail In aanh enu. Ma hit tahiin tak, hit of atmoin piut-piut tokan. 'Monit nane, anlail hit pusaak. 8 Saa' le' au u'uab sin le' ii, namneo on le' nane, pah!
Saa' le' au unoina' sin le' ii, maso'ik ma ma'upa' neu ale' mansian eun ok-oke'. Etun ho lo mees he mfaineek tuaf-tuaf he nmoe' natuin noina' amneot. Ale' apalsait eun neu Uisneno lo mees he namin lanan piut-piut he nmo'en lais leko. 9 Kais amsooln om meu lais poi luman sin, on le' hi amsau-fefan meu uab le' ka ma'uu' fa, mmatoe tafi'-tafi' es nok es, ammatiit-loin neu uuf ma ka'uf mee es na'nae nneis, ma ammatoe nok lasi atolan halat atoin Yahudis sin. Neu saa'? Lasin nane ka tiit tain fa es he maso'ik! Ampolin mineuk tabu luum-luumn aah. 10 Amnao he mfaineek tuaf le' anloim he naleu' too slani' tal anpe'en ma nbaits ok. Kaul sin fe' anmo'en on nane te, mibokan sin meik haan maputu'. Kaul sin fe' anmo'en piut, kais amlae mituin sin. 11 Tuaf-tuaf on le' nane, sin teenb eun ka namneo fa yen. Sin i'moe'k eun kuuk es le' naklila' sin sanat neu too mfaun enu.
Na' Paulus natu'ab in sulat
12 Au 'sali ma 'loim he 'sonu' na' Artemas ai' na' Tekikus, he neem na'euk nok ko nbi pah Kreta. Kaul in neem antia yen, ho maim lanan he oum labah, he muteef mok kau nbi koot Nekapolis. Natuin eti manikin le' ii, au 'loim he utua 'bi nane.a 13 Ho muhiin atoni ahiin lais hukun, le' in kanan na' Senas, nok in soba' na' Apolos, ai'? Sin he nnaon neu bale 'loo. On nane te amtulun maan sin he sin kais na'nuuk eun anbi lanan.b 14 Natuin tuaf-tuaf le' natuin Usif Yesus kais antook ma naif haek enu luum-luumn aah. Sin lo mees he nanoin eun he nmo'en lais leko, ma ntulun tuaf-tuaf le' na'nuuk eun le'-le'uf. Nok lanan nane, sin i'moink eun maso'ik.
15 Titus. Hai aal kai msonu' taben ma haan se'ot alekot neu ko. Taben ma haan se'ot amsa' neu hit soba' bian le' anpalsain neun Usif Yesus.
Au 'onen ma 'toit Uisneno he naklila' In nekan alekot neu ki aal ki.
On le' nane, pah,
Au na' Paulus kau, pah