Amnao m'eut Uisneno In A'an ma Plenat
4
1-2 Yesus Kristus of ankoen On anfain neem neu pah-pinan, he naplenat on le' kesel. Et ko amonit ma amates of anhaken anbin In matan, he In nafeek sin lasin. Natuin lasi nane, anbi Uisneno ma Yesus Kristus Sin huumk eun ma Sin maatk eun, au 'toit namneo-namneo 'eu ko, he mnao m'eut Uisneno In A'an ma Plenat. Muloitn om piut! Kais mutenab mak, tabu leko, ai' kahaf. Muklila' sin sanat, mes mukaina' sin nok neek tainines. Amha'taen sin neek eun meik noina' amneot.3 Fun of noka' ma nmeu te, tuaf-tuaf ka nloim fa he nneen noina' amneot. Sin of nabuab anoina' le' nabei' na'uab eun natuin sin loimk eun, he nhalinab sin, tabu sin nnenan. 4 Sin nsuun natau sin luik eun he ka natniin fa noina' amneot. Mes sin nneen neu lais nu'un luman.
5 Maski on mee-on mee msa', ho nekam lo he nameep. Malan ambi ha'mu'it. Amnao m'eut Lais Leko, he tuaf-tuaf anpalsain neun Yesus Kristus. Amtuthae tuaf-tuaf nok neek malinat, tal antia mepu nane namsoup. Kais ammepu stena'-stena'.
6 Anmatoom nok au ta'uk te, kais amfiloil kau, natuin au tias he namsopu wen. Au on le' oe anbi klaas, in nat'oop ma he oek' een.a 7 On le' mnaenat ate, au 'aen ma 'tia 'lail nok leko. Au utuin piut 'eu Yesus Kristus, ma ka 'nao 'iit fa 'eu mee-mee. 8 Tabu ii, au fe' a'pao-pao lasi yes. Es le', klaa mnatu' le' Usi' napala' neu sekaum-sekau le' in i'monin namneo ma namnoon. Hit Usi' nane, afeek lasi amneot. In ka npiil fa humaf. Antia in taubn ate, In of annona' kau klaa mnatu' nane. Ka neu fa au 'mees, mes sekaum-sekau le' anneek Ee, ma npao We he nkoen On anfain neem, sin napein aklaa mnatu' on nane amsa'.
Na' Paulus anba'an lasi huma'-huma'
9 Tius! Leko te, oum amkius maan kau labah fe'! 10 Tabu ii, au 'mes-mees kuuk. Na' Kreskes annao nlail et propinsi Galatia. Ma na' Titus annao nlail et pah Dalmatia. Mes na' Demas anloim nanesib lisan amle'ut anbi pah-pinan ii, on nane te in annao nasaitan kau. In annao et koot Tesalonika.b 11 Ala na' Lukas es le' natua nok kau et ii. Maim maan na' Markus he nua ki eim mibua'. Natuin in nabe'i nbaab ma ntuntaku kau nbi lasi huma'-huma' anbi ii.c 12 Au 'leek na' Tekikus annao et koot Efesus.d 13 Kaul ho oum ate, kais amnikan he mait meik maan kau au 'faun manikin le' au 'ani et na' Karpus in ume, et koot Troas. Ma kais amnikan he mait meik au tuis eun nane, anneis-neis le' au 'tui sin et pasu.e
14 Na' Aleksander, atuut noin molo' nane, anmoe' maufinu neu kau hae'-hae'. Maut he nmoe'. Uisneno of es anseubain neu ne, natai nok in i'mo'en nane.f 15 Ho lo mees he mpaant om mu'ko atoni' le' nane, natuin fe' ate in anlaban hit uabk enu.
16 Tabu au 'hake 'bi afeek lasi he umneob au ta'uk, ka tiit tain fa tuaf es he nok kau. Sin aal sin annaon nasaitan kau. Maut he on le' nane. Maut he Uisneno nnikan nain sin saant enu. 17 Maski on nane msa', mes Uisneno ka nasaitan kau fa. In nha'taen kau, he au ubei' unaob In Lais Leko, ma au ka 'kulan fa saa'-saa'. Au 'eut 'eu atoin eun le' ka Yahudis fa, he sin nneen niit Lais Leko nane. Ma Uisneno nafetin nalail kau na'ko snama' a'naek. 18 In of nafetin kau na'ko lais maufinun ok-oke'. Ma In neik kau nok mamut, nalalit nataam kau 'eu sonaf neno tunan. Anbi nane, In es le' annaa' aplenat.
Uisneno nane, apinat ma aklahat! Au 'pules u'naeb In ka natfeek niit fa, pah! Amin.
Na' Paulus natu'ab in sulat
19 Kais amnikan he mfee taben ma haan se'ot meu bi Priskila,g ma in mone, na' Akila. On nane msa' meu na' Onisiforus ma in nonot ma in asal sin ok-oke'.h 20 Na' Erastus natua et koot Korintus. Neno naa, au 'nao usaitan na' Trofimus anbi koot Miletus, natuin tabu nane in nameen ma'fena'.i 21 Maim lanan he kaul leko te, ho oum amtia main ii, tabu eti manikin fe' ka ntia fa. Hit aok-bian abiit eun ii, es eun le': na' Ebulus, na' Pudes, na' Linus, ma bi Klaudia, anfeen taben ma haan se'ot neu ki. On nane msa', neu hit aok-bian Kristen bian sin.
22 Au ufneek ma u'paen he Uisneno nok ko piut-piut. Maut he In naklila' In nekan alekot neu ki aal ki.
On le' nane, pah,
Au na' Paulus kau, pah