Anbi neno amsoput in tabu, mansian in i'monin mes on le' mee?
3
Timotius! Tabu antia pah-pinan ii in neno amsoupt eun ate, in suset sin amfauna' kah. Au 'eut 'ain ko on le' nane. 2 Mansian of namnau nanesib sin tau'k eun, ma nsinmaakn ahaa noni. Sin na'naeb sin tau'k eun, ma nanebet biak eun, na'uab na'le'uf tuaf bian, ka nlomin fa he natniin amahoint eun, ka ntoit nahinen fa makasi, ka nsium fa' noina', ka nloim nain fa lais Uisneno, 3 ka nmaneek nahinen fa, ka nlomin fa he halan es nok es, sin nlomin he na'siu', ka nalan nabe'in fa sin ta'uk, maufinu baineis, ka nloim fa lais leko, 4 anlomin he na'sosa' sin aok-biak eun, natenab tuka' aah, nmo'e yok on ahinet, anlomin he natuin sin neek lomik anneis na'ko Uisneno In i'lomin. 5 Sin anmo'e yok on le' anaob lais palsait, mes luman. Uisneno In kuasan ka natua fa nbi sin neek enu. Kais mumnoon leko mok tuaf-tuaf on le' nane!6 Tuaf-tuaf on le' nane antaman neu es in ume, nok huma' moe', he mfuil bifee neek a'oelt eun, ma labah ate napein kope'. Bifeen on le' nane, sin i'moink eun anloi ma nbaun sanat na'tuup, ma anmonin natuin sinmakat ma neek komat huma'-huma'. 7 Sin nneen anoina feu' le' neem nanoina' lais feu', ma sin natun-tuin aah. Mes sin ka ntai nahinen fa, mee es le' antoom, ma mee es le' ansaan. 8 Ho mumnau nu'un anmatoom nok na' Yanes ma na' Yamres,a ai' kahaf? Tabu nane, sin anlaban na' Musa. Anoina' le' tabu ii, sin huma' mese' on le' sin. Sin anlaban noina' amneot. Sin teenb eun namle'un, ma sin palsait eun, anpeon. 9 Noina' poi on le' nane, ka neu he ntahan fa 'loo. Ka 'loo-'loo fa te, too mfaun nahiin sin moonk enu! Paap mese' on le' nahunu te, too mfaun eun nahiin na' Yanes ma na' Yamres sin puta-bliu nuu.
Amnaa' mumep-mepan noina' le' ho msimo mlali ye
10 Tius! Ho muhine mlail au 'monik ok-oke'. Ho muhine mlail ale' saa' le' au unoina' sin. Ho muhiin au salit. Ho muhiin saa' le' au 'palsai. Ho miit kuum au nekam nalan 'eu too mfaun, ma au ma'neek 'eu sin. Ma ho muhine msa' mak au 'alan au ta'uk. 11 Ho muhine msa' mmak sin nteil na'meuk kau, ma nasahab kau ha'mu'it ma ma'ne'at huma'-huma'. Au upein ha'mu'it ma ma'ne'at on le' nane, anbi koot Antiokia, Ikonium, ma Listra. Mes Uisneno nsoi nafetin kau na'ko lasin nane.b 12 Namneo, ale' apalsait eun neu Yesus Kristus le' anlomin he nmonin nok neek aknino' natuin Uisneno In i'lomin, lo teeb atoni' of anha'mui' sin. 13 Antalu ntein, amaufiunt eun ma aputa-bliu nuu, anmo'en lais maufinu piut-piut. Sin napoib natupa' biak enu. Te kahaf, tuaf bian napoib naan sin imsa'.
14 Mes ho lo mees he mnaa' mumep-mepan noina' le' ho msium mulail sin. Ma saa' le' ho mpalsai ye nane, lo mees he mutuin piut. Natuin, nane es le' amneot! Ho muhiin namneo, sekau es le' nanoina' ko lasin nane. Ho mube'i mpalsai sin!c 15 Anmulai na'ko ho fe' aan'-ana', ho msimo mlail noina' na'ko Uisneno In Sula Knino' in nesan. Sula Knino' nane in nesan, es le' natoon laan a'honis. Fun kaul ho mpalsai meu Yesus Kristus, nane anfei lanan he ho mube'i mmoni mmafuut mok Uisneno mbi sonaf neno tunan. 16 Ale' saa'-saa' le' matui et Sula Knino' nane, lo teeb Uisneno kuun es nana'at sin he mansian antui sin. Tuis eun le' nane, mapake' he: nanoina' tuaf anmatoom nok saa' es le' amneot, naklila' tuaf eun sin sanat, natuuk nafani' tuaf aseket neu laan amneot, ma nanoina' mansian he nmonin neno-neno anbin Uisneno In i'lomin. 17 Nok lanan nane, Sula Knino' nabei' nanokab ma namtisib Uisneno In tuaf eun nok a'be'if ma manoef, he sin nanaob eun ale' kanan meup alekot.