Hit le' atuina' Kristus, lo he tmoin on le' solauls eun le' natniin sin a'nakat
2
Timotius, au aan neka'! Yesus Kristus nane, Atoin neek leko. Tabu ii, ho mmafuut mokan ma In naloitan he nha'taen ho nekam. On nane te ho lo mees he msimo. 2 Un-unu' te, au unoina' ko 'bi too mfaun eun sin huumk eun ma sin maatk eun anmatoom nok Uisneno In laan a'honis le' amneot. On nane te tabu ii, au 'toit ko, he ale' saa'-saa' le' ho mneen amlail sin na'ko kau, ho meik sin ma mnao munoina' amtein sin meu tuaf-tuaf le' mapalsai. Tuaf eun le' nane, lo mees he nmanoen he nanoina' ntein tuaf bian.3 Hit al-aal kit le' ii, paap mese' on le' Yesus Kristus In solauls enu. On nane te hit al-aal kit atsutai ha'mu'it on le' In. Natuin ho le' nane, solalus leko wes, ho lo mees he msutai ho paa'. 4 Solalus le' nanaob in mepu, ka nsooln on fa neu lasi bian antein. Nok lanan nane, in nabe'i nhalinab in a'nakat.
5 Tait i'leta' bian na'ko mnaenat. Kaul he tok atbi mnaenat ate lo mees he tatuin mnaenat nane in atolan. Mes kaul ka tatuin fa te, of napoitan kit, ma ka tapein fa mnisat. On nane msa', kaul he tanaob Uisneno In mepu, lo mees he tatuin In atolan.
6 Amkius atoin atoof lene msa'. In nmeup nameep anbi in lene. On nane te in es le' antamiis nahuun neu in lene in nesan. 7 Mutenab mulek-leko' a'leet eun fe' le' ii. Uisneno of namnauba' ma an'eut sin ootk eun neu ko.
8 Mutenab mulek-leko' Yesus Kristus. In le' nane, kesel na' Daut in sufan ma in ka'un. In inmaet, mes Uisneno namonib nafani' nalali Ye. Nane anfain Lais Leko, le' au 'eki ma utoon anbi mee-mee. 9 Natuin au utoon Lais Leko nane, es na' au upein ma'ne'at ii. Saa' antein sin nfuut kau npaek koleen besi, paap mese' on le' au le' ii atoin maufinu. Mes sin ka nabe'in fa he nfuut' ma nkolen Uisneno In Lais Leko. 10 On nane te au ubalab au ta'uk he usaah kuuk ma'ne'at huma'-huma'. Lamun Uisneno In tuaf eun le' In npiil naan sin nane, napenin saok sanat ma lasi 'honis. Fun Uisneno of nait na'latan sin piut, natuin sin antaam anlalin Yesus Kristus Inin. 11 Uab eun le' ii, lo namneo:
“Kaul hit tsium tak, Kristus anmate nseka' kit,
nane on le' hit tmaet tasaitan 'monit amnaa',
nalalit hit of atmoin tabua tokan amsa'.
12 Kaul hit talan atbi ma'ne'at,
hit of atnaa' aplenat tokan amsa'.
Mes kaul hit sebuten In,
In of ansebuten kit imsa'.a
13 Maski hit ka ta'kii' fa,
In mes na'kii' piut,
natuin In ka nabei' napoib On fa. In na'uab saa' ate, In nmoe' natuina'.”
Ameput le' Uisneno npules
14 Tius! Mumnauba' apalsait eun, he sin kais annikan lasin le' ii ok-oke'. Amleek sin ampaek Uisneno In kanan, he sin nasnasab uab eun le' anmatoena' lasi anmatoom nok uab tuuk es in otan. Lasin nane ka manesa' fa. Ala nale'u waa aneent eun sin teenb enu. 15 Maim lanan lek-leko he mmoe' ho ta'um on le' ameput le' maso'ik anbi Uisneno. Tuaf on le' nane, kais anmae', natuin in nanaob in mepu nok lek-leko. Ho lo mees he mfain tuaf le' munoina' namneo waah anmatoom nok Uisneno In A'an ma Plenat. Fun In A'an ma Plenat nane, lo namneo! 16 Mu'loba' ho ta'um mu'ko uab eun le' ka ma'uu' fa, ma mu'ko uab eun le' ka neik fa tola' neu Uisneno. Natuin lasin nane anmoe' mansian anmaufiun piut-piut. 17 Sin uab maufiun eun nane anonos paap mese' on le' menas es, le' anteek ate nak, kanker. Na' Himenius ma na' Filetus sin uabk eun on le' nane! 18 Sin noin' enu ansanan. Sin nak, atoin amaets eun, anmonin nfain een. Mes nane ansaan! Nok lanan nane, sin anpeon nlalin na'kon noina' amneot. Saa'-saa' le' sin nanoina' sin nane, naleu' tuaf bian sin neek palsait.
19 Mes tu'in le' Uisneno nateke nlali ye nane, nameep. Anbi tu'in nane matui ma nak, “Uisneno nahiin nalek-leko' In nonot ma In asal sin”, ma “Sekau-sekau le' na'luli' ma na'bees neu Uisneno, lo mees he na'loba' in ta'un na'ko maufinu.” tu'in nane, es le' Uisneno Inin.b
20-21 Tait i'leta' anbi atoin amui't eun sin umen. Anbi nane, anmui' blua' huma'-huma'. Bian anmoe' sin na'kon noni mnatu' ma bian na'kon noin muti'. Mes bian na'kon hau ma nai 'kele. Blua' eun le' mamasa', uim tuaf anpaek sin anbin fesat a'naek. Mes blua' eun le' ka mamasa' fa, uim tuaf namaeb on kaul in anpaek sin anbin too mfaun eun sin maatk enu. On nane msa' mansian. Kaul anmui' tuaf na'loba' in ta'un na'ko maufinu, in on le' blua mamasa' sin. Uim tuaf anmaliin he npake, natuin in mapake' he nmeup leko huma'-huma'.
22 Muinf eun anmoufun labah natuin sin neek lomit. Mes ho lo mees he mpanat ho ta'um lek-leko, kais mutuin ho neek lomit. Maim meu 'moe' leko piut-piut. Ampalsai piut meu Uisneno. Ammoni mbi manekat, lais halan ma mamut mok tuaf bian. Ale' apalsait eun neu Uisneno, le' anmonin nok neek aknino' nane, sin anlomin he nmo'en lais leko piut-piut. On nane te Timotius, ho lo mees he mausan sin! 23 Au utoon ufani' ko sin! Kais amseitn om he mnao mmatoena' lasi-lasi le' ka ma'uu' fa. Natuin lasin nane ala neik ki meu matoes ma mabanat. 24 Ameput neu Uisneno ka nabei' fa he nlail amatoes. Sin lo mees he nneek ma'nulan nok too mfaun, nanoina' nahinen, ma nalan neu amatoes enu. 25 Sin lo mees he natuuk leko neu tuaf-tuaf le' biasa nlaban. Nok lanan nane, kaul leko te, Uisneno nabaina' sin neek eun ma na'pisan, nalalit sin nsium saa'-saa' le' alekot amneot. 26 Nok lanan nane, sin nabei' nate'un sin neek eun antein, nalalit sin nafeitn ok na'ko niut amleu't eun sin a'naak anesit, le' anfuut sin he natuin in i'lomin.